ВЕ́ЧЕР

На Го́споди, воззва́х: стихи́ры Андре́я 3, глас 1.

Подо́бен: Небе́сных чино́в:

Вла́сти земны́я возненави́дев телесе́,/ чи́стым нра́вом и просты́м се́рдцем/ Го́сподеви присво́ился еси́,/ о́тче му́дре,/ и Богодохнове́нен орга́н Уте́шителя показа́лся еси́,/ пе́ние нам воспе́в спаси́тельное.

Госпо́дню Ма́терь обре́т,/ вину́ вели́ких похва́л,/ медото́чными словесы́ воспе́л еси́, Андре́е,/ свяще́нных апо́стол/ и му́ченик же блаже́нных сосло́вие,/ с ни́ми же нас, чту́щих тя, помина́й.

Правосла́вия тя столп, о́тче, зна́ем,/ о́браз целому́дрия, и кро́тости начерта́ние,/ и Боже́ственна песнопи́сца,/ Христо́вы Це́ркви просвеща́юща,/ священнотаи́нниче Андре́е,/ те́мже твое́ пра́зднуем торжество́.

И́ны стихи́ры Ма́рфы три, глас 4.

Подо́бен: Я́ко до́бля:

К боле́зненному воздержа́нию,/ к му́жеским боре́нием,/ проти́ву врага́ ополче́нию,/ запе́ншаго естество́ челове́ков,/ отлучи́лася еси́ поще́нии и слеза́ми,/ не пощаде́вши пло́ти любве́ ра́ди Боже́ственныя./ Те́мже подъя́ла еси́ Боже́ственныя по́двиги,/ смири́вши ра́зум сопротивобо́рца,/ Ма́рфо честна́я и пресла́вная.

Возгнуша́лася еси́ вре́менных,/ и тле́нных любве́ отбе́гла еси́,/ и жре́бий возжеле́ла еси́ Небе́сный,/ пра́ведным досто́йный, ве́чнующий, нетле́нный, чи́стая,/ и жизнь непреста́нную./ Те́мже ве́рою твою́ све́тлую и светоно́сную соверша́юще па́мять,/ пе́сньми Боже́ственными почита́ем,/ Ма́рфо сла́вная.

Сла́ва, глас то́йже, самогла́сен:

Духо́вною благода́тию отъе́млеши неду́ги,/ отгоня́еши ду́хи лука́выя,/ и цели́ши стра́сти, Ма́рфо всесла́вная,/ и просвеща́еши ве́рныя блиста́нии чуде́с твои́х./ Те́мже днесь гла́сы немо́лчными воспева́ем/ све́тлую, и светоно́сную, и досточу́дную па́мять твою́.

И ны́не, Богоро́дичен или́ Крестобогоро́дичен:

А́гнца и Па́стыря Тя/ на Дре́ве я́ко ви́де, А́гница ро́ждшая/ рыда́ше и ма́терски Ти веща́ше:/ Сы́не возжеле́нне,/ ка́ко на Дре́ве Кре́стнем пове́шен еси́, Долготерпели́ве?/ Ка́ко ру́це и но́зе Твой, Сло́ве,/ пригвозди́шася от беззако́нных/ и кровь Твою́ излия́л еси́, Влады́ко?

На стихо́вне Окто́иха.

Сла́ва, глас 8:

Мона́хов мно́жества,/ наста́вника тя почита́ем, о́тче наш Андре́е:/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ Ангелов собесе́дниче, преподо́бных соприча́стниче и пра́ведных,/ с ни́ми же моли́ся Го́сподеви/ поми́ловатися душа́м на́шим.

И ны́не, Богоро́дичен или́ Крестобогоро́дичен.

Подо́бен: О, пресла́внаго чудесе́:

Ю́ница Нескве́рная,/ Юнца́ ви́дящи на Дре́ве, пригвожда́ема во́лею,/ рыда́ющи жа́лостне,/ увы́ Мне, – вопия́ше, – люби́мейшее Ча́до!/ Что́ Ти сонм воздаде́ безблагода́тный евре́йский,/ хотя́ Мя обезча́дствовати/ от Тебе́, Вселюбе́зне?

Тропа́рь преподо́бнаго Андре́я, глас 1:

Христо́ву Це́рковь цевни́цею язы́ка твоего́,/ песносло́вя уми́льно, возвесели́л еси́,/ богосло́вием же Препе́тыя Тро́ицы/ сла́ву всем сказа́л еси́ я́сно,/ тем тя, я́ко тайноглаго́льннка, пое́м,/ Андре́е, па́стырю Кри́тский,/ и велича́ем па́мять твою́,/ Христа́ сла́вяще ди́внаго во святы́х Свои́х.

Ин тропа́рь преподо́бнаго, глас 4:

Пра́вило ве́ры и о́браз кро́тости,/ воздержа́ния учи́теля/ яви́ тя ста́ду твоему́,/ я́же веще́й и́стина./ Сего́ ра́ди стяжа́л еси́ сми́рением высо́кая,/ нището́ю бога́тая,/ о́тче Андре́е,/ моли́ Христа́ Бо́га/ спасти́ся душа́м на́шим.

Тропа́рь преподо́бныя Ма́рфы, глас 4:

Житие́м чи́стым и любо́вию, я́же ко Пречи́стей Бо́жией Ма́тери,/ стяжа́ла еси́ дар чадоро́дия пресла́вный,/ свети́льника ми́ру, ди́внаго Симео́на,/ тем тя, Ма́рфо,/ я́ко ма́терь, о ча́де веселя́щуюся, пе́сньми ублажа́ем.

Ин тропа́рь преподо́бныя, глас 8:

В тебе́, ма́ти, изве́стно спасе́ся, е́же по о́бразу:/ прии́мши бо крест, после́довала еси́ Христу́/ и, де́ющи, учи́ла еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней./ Те́мже и со А́нгелы сра́дуется, преподо́бная Ма́рфо, дух твой.

Кано́н, еди́н Окто́иха и святы́х два. Кано́н свята́го Андре́я, его́же краегране́сие: Пе́сньми воспле́щем му́жескими Андре́я. Глас 5.

Песнь 1

Ирмо́с: Коня́ и вса́дника в мо́ре Чермно́е/ сокруша́яй бра́ни мы́шцею высо́кою/ Христо́с истрясе́, Изра́иля же спасе́,/ побе́дную песнь пою́ща.

Сон от ве́ждей оттря́с, тебе́ сама́го Влады́це доброде́телию угото́вал еси́/ све́тло жили́ще, Богоявле́нне преподо́бне, и Боже́ственное поко́ище.

Пе́нием всесли́чным твою́ цевни́цу движа́,/ Христо́ву Це́рковь, песносло́вя, уясни́л еси́, Андре́е чу́дне,/ Свята́го Ду́ха оглаша́емь Боже́ственною благода́тию.

Зако́ну богопи́санному му́дре повину́яся,/ теле́сныя стра́сти по́стнически умертви́л еси́,/ ум же возвы́сил еси́ кре́пким твои́м жела́нием,/ поя́ пе́сни Бо́жия, всему́дре.

Богоро́дичен: Весь жела́ние и пречи́сто наслажде́ние,/ Сын и Бог Твой благи́х исполне́ние есть, Всенепоро́чная,/ Его́же моли́ изба́вити ве́рою ны́не к Тебе́ притека́ющия.

Кано́н преподо́бныя, глас 8.

Песнь 1

Ирмо́с: Истря́сшему в мо́ри мучи́тельство фарао́не/ и Изра́иля су́шею наста́вльшему,/ пои́м Христу́,/ я́ко просла́вися во ве́ки.

Боже́ственным жела́нием уя́звена ве́чных благ,/ сла́ву тле́нную и пи́щу преоби́дела еси́./ Те́мже и А́нгельское, преподо́бная, житие́ пожила́ еси́ Боже́ственне.

Распаля́ема Боже́ственным рве́нием,/ богому́жно пожи́вши, родила́ еси́ свети́льника ве́рным и забра́ло,/ втора́го Саму́ила, и пусты́ни кра́сное воспита́ние.

Прозябе́ние яви́ся воздержа́ния, возсия́вши нам со́лнце многосве́тлое,/ и вели́ка целе́бника, прему́драго Симео́на,/ и восто́чней стране́ предста́теля же и сте́ну.

Богоро́дичен: Земли́ исча́дие, Богоро́дице, сы́нове Бо́жии благода́тию Боже́ственною/ и неизрече́нным рождество́м Твои́м,/ пое́м Тя приле́жно, еди́ну вино́вну су́щаго спасе́ния.

Песнь 3

Ирмо́с: Водрузи́вый на ничесо́мже зе́млю повеле́нием Твои́м/ и пове́сивый неодержи́мо тяготе́ющую/ на недви́жимем, Христе́, ка́мени за́поведей Твои́х,/ Це́рковь Твою́ утверди́, Еди́не Бла́же и Человеколю́бче.

Упра́вил еси́ доброде́телию житие́ твое́, преподо́бне,/ и, Боже́ственным жела́нием Бо́гу соедина́яся, орга́н яви́лся еси́ слове́сен,/ всю вселе́нную уясня́я пе́сньми, Боже́ственная сокро́вища почерпа́я.

Прему́дрости Небе́сныя был еси́ испо́лнен,/ душе́вная бо уста́ разшири́в, преподо́бне,/ всю прия́л еси́ я́ве зарю́ светоно́сную трисо́лнечныя све́тлости,/ я́ко священноде́йственник свяще́нен.

Утверди́в душе́вныя си́лы твоя́, преподо́бне, и плоть удержа́в воздержа́нием,/ был еси́ весь пресве́тлая звезда́,/ украша́я Це́рковь правосла́вными твои́ми уче́нии и пе́сненными пе́нии.

Богоро́дичен: Изба́вити мя стра́стнаго плене́ния ны́не молю́ Тя, Ма́ти Бо́жия Всенепоро́чная,/ и грехо́вныя я́звы вся очи́стити,/ грех Взе́млющаго ми́ра пресла́вно ро́ждшая.

Ин

Ирмо́с: Несть свят, я́ко Госпо́дь,/ и несть пра́веден, я́ко Бог наш,/ Его́же пое́т вся тварь:/ несть пра́веден, па́че Тебе́, Го́споди.

Плод прече́стен из утро́бы твоея́ Влады́це прине́сши, же́ртву соверше́нну,/ сама́ же себе́ воздержа́ния огне́м принесла́ еси́, Ма́рфо,/ песносло́вящи Его́.

Же́ртву благоприя́тну и присноживо́тну Христу́ твоему́ принесла́ еси́,/ прозя́бшаго из ложе́сн твои́х, Богоно́сице преподо́бная,/ ве́рных утвержде́ние, и сте́ну, и забра́ло.

К высоте́ Небе́сней впери́ла еси́ ду́шу с те́лом/ и была́ еси́ единожи́тельница му́дрым де́вам/ и Боже́ственное изображе́ние ве́рою притека́ющим к Бо́гу.

Богоро́дичен: На ка́мени, Пречи́стая, упова́ния моего́ души́ моея́ восхо́ды поло́ж,/ недви́жим при́сно пребыва́я, хвалю́ и сла́влю Тя, еди́ну Засту́пницу мою́.

Конда́к Ма́рфы, глас 2.

Подо́бен: В моли́твах:

В моли́твах Го́сподеви предстоя́щи,/ Пречи́стей Де́ве Богоро́дице пе́ние и хвалы́ принося́щи,/ Ма́рфо честна́я,/ породила́ еси́ свяще́нное отроча́,/ Симео́на преди́внаго, свети́льника всеми́рнаго,/ с ни́мже моли́ при́сно о всех нас.

Та́же седа́лен Андре́я, глас 4.

Подо́бен: Ско́ро предвари́:

Я́ко ка́мением, словесы́ твои́ми церко́вный, прему́дре, украси́в вене́ц,/ священноде́йственник свяще́нен, Андре́е, был еси́./ Те́мже по мно́гих в житии́ труде́х прия́л еси́ нестаре́емое Ца́рство и сла́ву,/ в не́мже помина́ющих тя, о́тче, помина́й.

Сла́ва, седа́лен Ма́рфы, глас то́йже

Непреста́нно в моли́твах бдя́щи и ми́лостынею Бо́гу угожда́ющи,/ в Боже́ственныя хра́мы, прехва́льная, ча́сто ходя́щи, Ма́рфо,/ слеза́ми, и посто́м, и ве́рою моля́щися, прия́ла еси́ свяще́нно отроча́,/ с ни́мже моли́ся спасти́ся от бед нам, любо́вию чту́щим тя.

И ны́не, Богоро́дичен:

Де́во Всенепоро́чная, Я́же Пресу́щнаго Бо́га ро́ждшая,/ со Безпло́тными Того́ непреста́нно моли́/ оставле́ние прегреше́ний и исправле́ние жития́ да́ти нам пре́жде конца́,/ и́же ве́рою и любо́вию пою́щим Тя по до́лгу, еди́на Всепе́тая.

Крестобогоро́дичен:

Де́во Пренепоро́чная, Ма́ти Христа́ Бо́га,/ ору́жие про́йде Твою́ пресвяту́ю ду́шу,/ егда́ распина́ема ви́дела еси́ во́лею Сы́на и Бо́га Твоего́,/ Его́же, Благослове́нная, моля́щи не преста́й/ проще́ние прегреше́ний нам дарова́ти.

Песнь 4

Ирмо́с: Боже́ственное Твое́ разуме́в истоща́ние прозорли́во,/ Авваку́м, Христе́, со тре́петом вопия́ше Тебе́:/ во спасе́ние люде́й Твои́х/ спасти́ пома́занныя Твоя́ прише́л еси́.

Сло́во Твое́, житие́м укра́шено, Богосло́вия изве́стное пра́вило показа́лся еси́, чу́дне,/ Препе́тыя Тро́ицы сла́ву сказу́я я́сно.

Дея́нием виде́ния восхо́д показа́в, му́дре, и виде́нием объе́мся,/ жития́ о́бразом, Андре́е Богогла́се, уподо́бился еси́.

Я́ко Боже́ствен святи́тель, пребога́те, па́стырски побора́я,/ от Це́ркве отгна́л еси́ львов наше́ствия, Андре́е, му́жеству тезоимени́те.

Вели́ку похвала́м вину́, Богоро́дицу обре́т, тща́ние показа́л еси́ сугу́бо,/ превы́шшую похва́л хвала́ми многообра́зными почита́я, му́дре.

Богоро́дичен: Кроме́ у́бо совокупле́ния зачала́ еси́ нетле́нно во утро́бе,/ и пре́жде боле́зни родила́ еси́,/ и по рождестве́ Де́вою, Бо́га пло́тию ро́ждши, сохрани́лася еси́.

Ин

Ирмо́с: Из горы́ приосене́нныя, Сло́ве, проро́к,/ еди́ныя Богоро́дицы,/ хоти́ща воплоти́тися богови́дно усмотри́/ и со стра́хом славосло́вяше си́лу Твою́.

Иму́щи Христа́ при́сно во уме́, любве́ тле́нных и жела́ния возгнуша́лася еси́/ и сего́ ра́ди дарова́ния сподо́билася еси́,/ Ма́рфо, Того́ просла́вльши.

Попали́вши страсте́й, Ма́рфо, треволне́ние,/ угаси́ла еси́ звере́й ди́вних наше́ствия,/ мы́сленнаго же Амали́ка многоплете́нныя се́ти посрами́ла еси́.

Была́ еси́ ве́рных предгра́дие и стена́, чи́стою любо́вию тя чту́щим/ и святу́ю твою́ па́мять творя́щим, Богоблаже́нная, ве́рных помо́щнице.

Богоро́дичен: Яви́лася еси́ мы́сленный о́блак, Богоро́дице,/ нося́щи Самаго́ Со́лнца сла́вы с пло́тию,/ озаря́ющаго всю тварь све́том Боже́ственныя благода́ти.

Песнь 5

Ирмо́с: Одея́йся Све́том, я́ко ри́зою,/ к Тебе́ у́тренюю и Тебе́ зову́:/ ду́шу мою́ просвети́ омраче́нную, Христе́,/ я́ко Еди́н Благоутро́бен.

Ны́не крася́щиися твои́ми уче́нии/ и пе́сньми богодохнове́нными свяще́нно наслажда́ющеся,/ Андре́е всеблаже́нне, па́мять твою́ почита́ем.

Заре́ю просвеща́емь я́ве духо́вною,/ святы́х ликостоя́ния пресвя́то похвали́л еси́,/ с ни́миже ны́не ра́дуешися, Андре́е всеблаже́нне.

Ны́не не чу́вствы тле́ннаго те́ла, ни мечта́ньми зри́ши Боже́ственная,/ у́мно же, прему́дре, душе́вными де́йствы соединя́яся лу́чшим.

Богоро́дичен: Со слеза́ми припа́даю Ти, зело́ моля́ся,/ мои́х согреше́ний ны́не изба́витися Тобо́ю, Всенепоро́чная,/ и ве́чныя ра́дости сподо́битися.

Ин

Ирмо́с: От но́щи неве́дения/ Богове́дением просвети́вый концы́,/ просвети мя у́тром человеколю́бия Твоего́, Го́споди.

На Не́бо зря́щи твое́ прозябе́ние, столпо́м вознесе́на,/ сего́ Боже́ственными дея́нии, Ма́рфо,/ Вы́шняго воспева́ла еси́ Христа́.

С Небесе́ отве́т, Богоблаже́нная Ма́рфо, прия́т я́ве/ и зачала́ еси́ от Боже́ственнаго открове́ния вели́ка служи́теля.

Твое́ прозябе́ние, преподо́бная,/ Антиохи́йский у́бо град предлага́ет те́пла предста́теля,/ и сте́ну, и прибе́жище су́щим в ско́рбех.

Богоро́дичен: Жезл си́лы Тя наде́ющиися на Тя, Богоневе́сто, иму́ще,/ побежда́ем супоста́тныя полки́.

Песнь 6

Ирмо́с: Неи́стовствующееся бу́рею душетле́нною,/ Влады́ко Христе́, страсте́й мо́ре укроти́/ и от тли возведи́ мя,/ я́ко Благоутро́бен.

Вити́и обличи́л еси́ безбо́жныя усты́ све́тлыми,/ честны́х бо ико́н уясни́л еси́ вои́стинну, священнотаи́нниче, поклоне́ние.

Свяще́нно украси́л еси́ твою́, о́тче сла́вне, жизнь:/ стра́стное бо смуще́ние угаси́л еси́/ и к жи́зни безстра́стия прите́кл еси́.

Добро́тами слове́с твои́х и уче́нии/ вси́ ве́рнии благоче́стно наслажда́ющеся, ра́дуются,/ ерети́к языкобо́лия побежда́юще.

Богоро́дичен: Весь примеша́ется ми, Иже безнача́льно возсия́в от Отца́,/ воплоще́нием, Пренепоро́чная, из Тебе́ бы́вшим, Богоневе́сто.

Ин

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.

Вся́ческих Цари́цу от души́ вожделе́вши,/ украси́лася еси́ сама́ чистото́ю/ и дарова́ния Ея́ ра́ди, Ма́рфо, улучи́ла еси́.

Ста́рей му́дрости твое́й, честна́я, удиви́шася А́нгели,/ и челове́цы пою́т вся́ческих Творца́, тя просла́вльшаго.

Я́ко дре́во благора́слено же и красно́, себе́ украси́ла еси́/ и зерца́ло была́ еси́ нескве́рно явле́нием Свята́го Ду́ха.

Богоро́дичен: Тишину́ Тя в бу́ри страсте́й и скорбе́й, Влады́чице, при́сно предзра́,/ во приста́нище спасе́ния притека́ю.

Конда́к, глас 2.

Подо́бен: Вы́шних ища́:

Воструби́в я́сно Боже́ственная сладкопе́ния,/ яви́лся еси́ свети́льник ми́ра светле́йший,/ све́том сия́я Тро́ицы, Андре́е преподо́бне./ Те́мже вси вопие́м ти:/ не преста́й моля́ся о всех нас.

И́кос:

Восхвали́ти твое́, о́тче, житие́, окая́нный, хощу́,/ ве́дый ны́не, исправле́ний твои́х ра́ди,/ ищу́ отту́ду, я́коже дарова́ния, похвалы́ прия́ти твои́х украше́ний/ и честно́му верху́ твоему́, Андре́е, исплести́,/ е́же А́нгели почита́ют, зовы́й:/ моля́ не преста́й о всех нас.

Песнь 7

Ирмо́с: Превозноси́мый отце́в Госпо́дь/ пла́мень угаси́, о́троки ороси́,/ согла́сно пою́щия:/ Бо́же, благослове́н еси́.

Да све́тлость святы́х, преподо́бне, у́зриши,/ све́тлостию дел просвети́л еси́ житие́ твое́, зовы́й:/ Бо́же, благослове́н еси́.

Те́лом обложе́н, Безпло́тных чино́м поревнова́л еси́, преподо́бне,/ с ни́миже согла́сно, ра́дуяся, взыва́еши:/ Бо́же, благослове́н еси́.

Иерусали́м ны́не све́тло весели́тся,/ свети́льника многосве́тла ми́ру тя возсия́в, блаже́нне, поя́:/ Бо́же, благослове́н еси.

Богоро́дичен: И́же пре́жде у́бо Безпло́тный воплоща́ется, Пречи́стая,/ за милосе́рдие безчи́сленное из ложе́сн Твои́х святы́х./ Ему́же вси пое́м:/ Бо́же, благослове́н еси́.

Ин

Ирмо́с: В нача́ле зе́млю основа́вый/ и Небеса́ сло́вом утверди́вый,/ благослове́н еси́ во ве́ки, Го́споди, Бо́же оте́ц на́ших.

Страстну́ю совле́кши ри́зу, в безстра́стную оде́жду оде́ялася еси́,/ и Жениху́ чи́сто, преподо́бная, обручи́лася Христу́, и угоди́ла еси́.

Столп о́гнен твое́ прозябе́ние яви́ся, Ма́рфо честна́я,/ просвеща́ющ мир и я́же в ми́ре очища́я от неразу́мия те́мнаго/ и вся́каго ина́го гне́ва.

Плотска́я погаси́ла еси́ возноше́ния,/ и мы́сленных враг кова́рствия возгнуша́лася еси́, преподо́бная Ма́рфо,/ и сих сплете́ния на зе́млю низве́ргла еси́.

Богоро́дичен: Ви́дети нам сла́ву Сы́на Твоего́/ и чи́сте ея́ наслади́тися, жела́ющим и воспева́ющим Тя,/ моли́ся приле́жно, Богоблагода́тная.

Песнь 8

Ирмо́с: Тебе́, Вседе́телю,/ в пещи́ о́троцы, всеми́рный лик спле́тше, поя́ху:/ дела́ вся́кая, Го́спода по́йте/ и превозноси́те во вся ве́ки.

Но́ваго киво́та Це́рковь, о́тче,/ я́сно обвесели́л еси́, ли́ки соста́вль, взыва́я:/ вся дела́ Госпо́дня, Го́спода по́йте/ и превозноси́те во вся ве́ки.

Пе́ние но́вое в Це́ркви, блаже́нне, преподо́бно взыва́л еси́ Вседержи́телю:/ вся дела́ Госпо́дня, Го́спода по́йте/ и превозноси́те во вся ве́ки.

Воздая́ доброде́тели боголе́пно дела́, страда́ния воспе́л еси́, Андре́е прему́дре, всех святы́х,/ дре́вле удивле́нных и соверше́нных Христу́ во ве́ки.

Богоро́дичен: Прииди́те, Чи́стую Богоотрокови́цу воспое́м,/ глаго́люще, Боже́ственными пе́сньми:/ ра́дуйся, Де́во, Ея́же ра́ди ра́дость даде́ся естеству́ челове́ческому, Преблагослове́нная.

Ин

Ирмо́с: На горе́ святе́й просла́вльшася/ и в купине́ огне́м Присноде́вы Моисе́ови та́йну я́вльшаго,/ Го́спода по́йте/ и превозноси́те во вся ве́ки.

Нището́ю вре́менных стяжа́ла еси́ бога́тство, Ма́рфо, ве́чное и сла́ву./ И сего́ ра́ди любо́вию взыва́ла еси́:/ Го́спода по́йте и превозноси́те Его́ во ве́ки.

Ве́дый Бог твое́ се́рдце и жела́ние,/ его́же родила́ еси́ от младе́нства, преподо́бная Ма́рфо,/ ве́рою серде́чною венча́ Боже́ственне ве́рою вопию́ща Ему́ во ве́ки вся.

Све́тлый твоего́ пра́здника день озаря́ет ве́рных мы́сли/ и просвеща́ет всю зе́млю, я́коже денница, да́же до коне́ц зе́мли́ всесия́я.

Богоро́дичен: И́же естество́ на́ше созда́вый,/ из Тебе́ сие́ обле́к, Богоро́дице, вообража́ет и обновля́ет я́ко Человеколю́бец/ Тя песносло́вящия и славосло́вящия вои́стинну Богоро́дицу.

Песнь 9

Ирмо́с: Иса́ие, лику́й,/ Де́ва име́ во чре́ве и роди́ Сы́на Емману́ила,/ Бо́га же и Челове́ка, Восто́к и́мя Ему́,/ Его́же велича́юще, Де́ву ублажа́ем.

Глаго́л твои́х веща́ние всю обтече́ зе́млю,/ уче́ний же красота́ и све́тлость, Андре́е блаже́нне,/ те́мже Христо́с, И́же всех Царь, тя венча́л есть благоле́пия венце́м.

Соедине́нием лу́чшим наслажда́яся зари́ трисия́нныя,/ Андре́е, таи́нниче пачеесте́ственных,/ любо́вию творя́щих твою́ святу́ю па́мять свяще́нно/ ны́не моли́твами твои́ми от бед сохрани́.

Со Безпло́тными чи́нми весели́шися ны́не на Небесе́х:/ сих бо на земли́ житие́ неукло́нно я́ко пожи́в/ и пра́выя ве́ры я́влься пропове́дник изря́ден, Богоглаго́ливе досточу́дне.

Богоро́дичен: Приноси́мое уста́вила еси́ сме́рти неуста́вное стремле́ние,/ ро́ждши пло́тски, вои́стинну па́че ума́, Жизнь ве́чную,/ Е́йже прирази́вся усты́, го́рький ад упраздни́ся,/ Пресвята́я Де́во Ма́ти.

Ин

Ирмо́с: Велича́ем Тя, Ма́терь Бо́жию,/ и сла́вим Тя, Богоро́дице Де́во,/ я́ко Спа́са ро́ждшую душ на́ших.

Единообра́зно, Ма́рфо, лику́ющи с сы́ном,/ моли́ Христа́ Бо́га на́шего о почита́ющих тя.

Благоче́стно пожи́вши, в труде́ му́жески подвиза́лася еси́/ от него́же сокры́ла еси́ бога́тство Небе́сное.

Облобыза́ем твои́х моще́й ра́ку, Ма́рфо всечестна́я,/ из нея́же почерпа́ем исцеле́ний во́ды.

Богоро́дичен: Па́че со́лнечных луч моли́тва Твоя́ возсия́вши,/ просвеща́ет, Пречи́стая, Тя велича́ющия.

Свети́лен.

Подо́бен: Не́бо звезда́ми:

А́нгельскаго жития́ жела́я, преподо́бне,/ те́мже покори́л еси́ стра́сти плотски́я му́жески,/ равноа́нгелен быв, Богоно́се о́тче.

Богоро́дичен:

Тя Предста́тельницу и́мамы, вси гре́шнии, о Пресвята́я Де́во,/ Ты благопреме́нна сотвори́ Твоего́ Сы́на ма́терними Твои́ми моли́твами.

На стихо́вне Окто́иха.

Сла́ва, глас 6:

Преподо́бне о́тче Андре́е,/ во всю зе́млю изы́де веща́ние исправле́ний твои́х./ Тем на Небесе́х обре́л еси́ мзду трудо́в твои́х,/ де́монския погуби́л еси́ полки́/ и а́нгельския дости́гл еси́ чи́ны,/ и́хже житию́ без поро́ка поревнова́л еси́./ Дерзнове́ние име́я ко Христу́ Бо́гу,/ мир испроси́ душа́м на́шим.

И ны́не, Богоро́дичен или́ Крестобогоро́дичен.

Подо́бен: Тридне́вен:

Зача́тие Твое́ безсе́менное/ и рождество́ неизрече́нное помышля́ющи,/ удивля́юся зело́:/ ка́ко си́це, я́коже злоде́й,/ благоволи́л еси́ умре́ти, Сы́не? –/ Пречи́стая, пла́чущи, взыва́ше.

НА ЛИТУРГИ́И

Проки́мен, глас 7: Восхва́лятся преподо́бнии во сла́ве/ и возра́дуются на ло́жах свои́х. Стих: Воспо́йте Го́сподеви песнь но́ву: Апо́стол к Евре́ем, зача́ло 318 от полу́. Аллилу́ия, глас 2: Свяще́нницы Твои́ облеку́тся в пра́вду,/ и преподо́бнии Твои́ возра́дуются. Ева́нгелие от Матфе́я, зача́ло 21. Прича́стен: В па́мять ве́чную: