На ма́лой вече́рни

Стихиры глас 1.

Подобен: Небе́сных чинов:

Взя́сте на ра́мо крест Христов/ и распя́стеся миру, преподобнии,/ и после́довасте стопа́м созда́вшаго от не сущих вся, Божия Слова./ егоже моли́те, да прии́мем грехо́в проще́ние/ и насле́дницы будем жизни ве́чныя.

Яви́стеся сокро́вище доброде́телей/ и презре́сте вся яже в житии́ кра́сная,/ Христо́вою любо́вию распала́еми, и́щуще яже Богу уго́дная./ И Того ради бы́сте жи́теле Царства Небеснаго/ и о нас моли́те,/ да будем и мы тому соприча́стницы.

Безстра́стия бы́вше кра́снии сосу́ди, отцы́ преблаже́ннии,/ и чуде́с исто́чницы,/ мона́шествующих сто́лпи кре́пцыи, де́монов прогони́телие/ и страсте́й цели́телие,/ да почту́тся пе́сньми/ наста́вницы наши прему́дрии/ и мо́лят Христа да спасет ду́ши наша.

Слава, глас 6:

Кто дово́лен похвали́ти таковы́я святи́тели,/ возсия́вшия напосле́док лет,/ благода́тию бо Свята́го Ду́ха/ чуде́с исцеле́ний дар прие́мше от Бо́га/ и своих телес нетле́ние,/ нам же у Христа про́сят грехо́в проще́ния/ и ве́лия ми́лости.

И ныне, Богородичен:

На стиховне стихиры, глас 2

Подобен: Доме Евфрафов

Дом и жили́ще Духа Пресвята́го/ преподо́бнии отцы были есте́,/ темже и нас дом Того соде́лайте,/ святую вашу память почита́ющих.

Стих: Честна́ пред Господем/ смерть преподо́бных Его.

Не преста́йте моля́щеся, преподобнии,/ о при́сных рабе́х ваших,/ ихже нетле́нием теле́с ва́ших возвесели́сте,/ да вси честну́ю вашу па́мять, веселя́щеся, почита́ем.

Стих: Восхва́лятся преподо́бнии во сла́ве/ и возра́дуются на ло́жах свои́х.

Моли́теся приле́жно за ны, наста́вницы на́ши,/ и изба́вите ны от бед и скорбе́й,/ и́же на ны нахо́дят,/ ускори́те, святи́и, на помощь нашу,/ да по до́лгу вас ублажа́ем.

Слава, глас 3. Самогласен:

Мног труд и те́сен путь в житии́ своем прешли́ есте́,/ отцы преподобнии,/ и тем дости́гли есте́ в тихое приста́нище/ и радость неизрече́нную,/ идеже пра́ведных веселя́тся ли́цы,/ явля́ющеся нам, ча́дом своим,/ яко мзду прия́ли есте́ трудо́в своих.

И ныне, Богородичен:

Тропарь общий святых, глас 3

Подобен: Да веселя́тся:

Пе́рвии учи́телие пре́жде те́мному,/ ныне же све́тлому и новопросвеще́нному гра́ду Каза́ни,/ пе́рвии возвести́телие пути́ спаси́тельнаго,/ и́стиннии храни́телие апо́стольских преда́ний,/ столпи́ непоколеби́мии, благоче́стия учи́телие/ и Православия наста́вницы, Гу́рие и Варсоно́фие,/ Владыку всех моли́те/ мир вселе́нней дарова́ти и душа́м нашим ве́лию милость.

Слава, и ныне, Богородичен:

Не велицей вечерни

Блажен муж: На Господи, воззвах: поставим стихов 8 и поем стихиры святителя Гурия, глас 5

Подобен: Радуйся:

Преда́нием прилежа́в приле́жно,/ я́же прия́л еси от Спаса нашего Христа́ Бо́га,/ и святых Его учени́к,/ и вселе́нских учи́телей,/ ве́рою и благопокоре́нием к наказа́телю своему/ и дости́гл еси слове́сное наказа́ние/ и соверше́нное позна́ние Свяще́нных Писа́ний./ И того ради избра́ннаго Христова ста́да отец/ и учи́тель явля́ешися, святи́телю Гу́рие,/ Христа Бога моли́ спасти́ся нам,/ верою приходя́щим к ра́це моще́й твоих.

К три́десятем два ле́та/ земле́ю покрове́но бысть честно́е тело твое, святи́телю Гу́рие,/ и обрете́ся ра́ка моще́й твоих/ полна́ ми́ра благово́ннаго,/ гроб же и погреба́льная но́ва бя́ху,/ кре́постию же но́вых крепча́йша;/ тело же твое честно́е, аки гу́ба, верху́ ми́ра ноша́шеся;/ части же от чудотво́рнаго твоего те́ла/ ни еди́ней погруже́нней бы́вшей, це́лости ра́ди./ Темже мо́лим тя, святи́телю Гу́рие:/ моли́ Христа Бога спасти́ся душа́м нашим.

Мона́ха два подви́гшася к Богу до́бре,/ Ио́на и Некта́рий, еди́н еди́наго роди́вый,/ тебе же послужи́вша в мире верно,/ и по смерти твоей веру к тебе держа́ста несумне́нну/ и хра́мину ка́менну над гро́бом твоим согради́ста:/ в тойже и сами близ тебе погребо́шася, святи́и ти́и,/ многим нетле́нием от Бога почте́ни бы́вше./ Моли́ с ними, святи́телю Гу́рие, Христа Бога/ дарова́ти нам мир и ве́лию милость.

Егда́ обрето́шася мо́щи твоя, святи́телю Гу́рие,/ тогда испо́лнися весь град благоуха́ния,/ и стеко́шася всенаро́дное мно́жество,/ церко́внаго первопресто́льника и па́стыря своего зре́ти жела́юще,/ ра́дости и слез испо́лнишася, вопию́ще и глаго́люще:/ О первый учи́телю и наста́вниче гра́ду нашему,/ мо́лим тя, моли́ Христа Бога,/ да пода́ст мир миру и душа́м на́шим ве́лию ми́лость.

Ины стихиры святителя Варсонофия, глас 5

Подобен: Преподобне отче

Святи́телю преди́вный Варсоно́фие,/ споспешеству́й нам, ча́дом твоим,/ на ви́димыя и неви́димыя враги́ на́ша:/ и́маши бо на сие от Бога да́нную тебе си́лу,/ и́стинный Божий уго́дниче,/ моли́ изба́витися нам от вся́ких бед/ твоими, свя́те, моли́твами.

Восхоте́в по Христе́ жи́ти,/ показа́лся еси целому́дрен, святи́телю Варсоно́фие,/ и мно́гим путь показа́в ко спасе́нию,/ ко Христу приве́л еси, твоему Влады́це./ Име́я к Нему дерзнове́ние,/ за чту́щия тя моли́,/ да изба́вимся бед и печа́лей,/ да вси тебе велича́ем.

Со усе́рдием слове́с Бо́жиих послу́шатель быв/ и благоче́стно и пра́ведно, благоуго́дно житие пожи́в,/ святи́телю Варсоно́фие,/ Христа́ любя́ и Христо́м люби́м быв,/ и ве́чных благ насле́дник был еси./ Моли́ Христа Бога, преподобне,/ спасти́ и просвети́ти ду́ши наша.

Преподобныя твоя ру́ки просте́р моле́бно,/ Варсоно́фие, о́тче преподо́бне,/ о держа́ве нашей Христу моли́ся,/ о гра́де и о святе́й оби́тели,/ е́йже был еси первый зда́тель/ и па́стве нача́льник,/ в нейже трудолюбе́зно поще́нием и молитвою до́бре подви́гся,/ и многотру́дному твоему те́лу положи́тся Бог в той изво́ли;/ и пресла́вно обрето́шася честны́я твоя мо́щи нетле́нны,/ подаю́т чудеса́ и исцеле́ния./ Моли́, преподо́бне, и нам спасти́ся,/ твою память почита́ющим.

Слава, глас 4:

Духо́вною благода́тию отъе́млете неду́ги и стра́сти,/ и отго́ните ду́хи лука́выя, и исцеля́ете стра́сти неисце́льныя,/ и просвеща́ете ве́рныя, и неве́рных в веру претворя́ете/ блиста́нии чуде́с ваших, отцы преподо́бнии./ Темже днесь гла́сы немо́лчными/ воспева́ем вашу память пресве́тлую и мо́лим вас:/ моли́те Христа Бога/ спасти́ся душа́м нашим.

И ныне, Богородичен

Вход. Прокимен дне. Чтения 3 святительская

На литии стихиры, глас 3. Самогласны:

Чи́стою со́вестию и благи́м нра́вом/ мона́хи и мирески́я мно́гия/ уче́нием вашим ко Христу́ привели́ есте́/ и сего ради нетле́нием от Христа почте́ни есте́./ егоже моли́те спасти́ся душа́м нашим.

Ра́ки ваша вопию́т к Богу моли́тву вашу/ и про́чия доброде́тели,/ послушеству́ют же Тому и ри́зы ваша погреба́льныя;/ свята́я же телеса́ ваша вселе́нную удивля́ют и народ благочести́вый./ Но моли́те Господа да спасет и просвети́т души наша.

Умилосе́рдися, Владьшо, о нас, рабе́х Твоих,/ и о новопросвеще́нных Твоих лю́дех/ и не преда́ждь нас в руки пога́ных за мно́жество наших беззако́ний,/ но моли́твами преподо́бных Твоих уго́дник/ изба́ви ны от всякия ско́рби, и бед, и печа́лей.

Посто́м, и жесто́ким житие́м,/ и худо́ю пи́щею, и просто́ю трапе́зою/ на ки́йждо день обуча́юще себе, отцы преподобнии,/ многоце́нная же всяко и тле́нная презре́сте/и в нетле́нных веселите́ся,/ и мо́лите спастися душа́м нашим.

Слава, глас 8:

И́стиннии и нело́жнии учи́телие есте́ бы́ли,/ запове́данная бо Го́сподем/ пре́жде сами сотворя́юще,/ пото́м же уча́ще и наказу́юще ко благоче́стию приходя́щия люди ве́рныя,/ неве́рныя же вразумля́юще позна́ти веру и́стинну/ и просвеща́юще их святым Крещением,/ пе́рвии нача́льницы и учи́телие наши неле́стнии/ и Божиих за́поведей храни́телие,/ спаси́те нас, вас верою на помощь призыва́ющих.

И ныне, Богородичен

На стиховне стихиры, глас 3

Подобен: Велия Креста:

Христо́ву веру, яко свет на све́щнице, поста́висте, наста́вницы/ и просвети́телие града Каза́ни яви́стеся/ и многи от неве́рия ко Христу приведо́сте,/ отцы́ преподо́бнии.

Стих: Свяще́нницы Твои облеку́тся в правду,/ и преподо́бнии Твои возра́дуются.

Красу́йся, гра́де Каза́не,/ имея в себе мо́щи преподо́бных святи́телей,/ Гу́рия и Варсоно́фия, отгна́вших от Тебе тьму неве́рия/ и просвети́вших тя светом Богоразу́мия:/ иже и мо́лятся Христу за вся люди, в тебе живу́щия.

Стих: Восхва́лятся преподобнии во славе/ и возра́дуются на ло́жах своих.

Ве́лие чудо о вас зри́тся, отцы преподобнии,/ и у́жаса испо́лнено,/ како по погребе́нии во мно́га ле́та неруши́ма соблюдо́шася блаже́нная телеса́ ваша,/ судьба́ми, имиже весть вас Сам прославля́яй.

Слава, глас 6:

Иже пре́жде те́мный,/ ныне же светлый, град Казань красу́ется и весели́тся,/ име́я в себе нетле́нныя мо́щи ваша, святии чудотво́рцы:/ источа́ют бо нам неоску́дна исцеле́ния,/ с верою приходя́щим к ра́це моще́й ваших./ Мы же, веселя́щеся, мо́лим и те́пле зове́м:/ моли́те, святии, Христа Бога спасти́ся нам,/ святую память вашу почита́ющим.

И ныне, Богородичен:

Богородице, Ты еси лоза истинная

Тропарь писан на малой вечерни

На утрени

На Бог Господь: тропарь, дважды. Слава, и ныне,

Богородичен. По 1-м стихословии седален, глас 3:

Нам, после́днему ро́ду, яви́стеся, святи́телие, те́лом нетле́ннии/ и показа́сте надежду, яко и по смерти неотсту́пно ду́хом нас посеща́ете./ Темже и припа́даем вам, преподобнии:/ моли́те о нас, вашу память любе́зно почита́ющих,/ да изба́вимся от всех зол вашими молитвами.

Слава, и ныне, Богородичен:

Еди́но упова́ние наше, еди́на наде́жда,/ еди́но прибе́жище ве́рующим пречестно́му Твоему Рождеству,/ Пресвя́тая Преблагослове́нная Богома́ти,/ покры́й, и соблюди́, и от всяких бед изба́ви/ любо́вию велича́ющих Тя.

По 2-м стихословии седален, глас 4:

Бо́гом науче́нная ва́ша уста́ мона́шеским душа́м сладость райскую иска́паша,/ и всем о́браз бы́сте ко спасе́нию,/ о ди́внии отцы наши, Гу́рие и Варсоно́фие!/ Сего ради вопие́м вам, приле́жно моля́щеся:/ потщи́теся на помощь нашу/ и умоли́те за ны сохра́ньшаго вас Благодетеля, Христа Бога.

Слава, и ныне, Богородичен:

Светоно́сен Тя све́щник познахом, Богородице,/ Божественное Сияние во утробе носи́ла еси./ Темже Тя молим, Владычице:/ светом Твоим озари́ души всех, поющих Тя,/ да верою и любовию почитаем Тя,/ яко вои́стинну и́стинную су́щую Богородицу.

По полиеле́и седален, глас 6:

Иже прежде неве́рием помраче́нный,/ ныне же верою ко Христу просвеще́нный,/ преслову́щий град Казань вами хва́лится,/ име́я в себе мо́щи ваша нетле́нны, отцы преподо́бнии;/ и с верою приходя́щим источа́ете чудеса́/ и подае́те неоску́дно исцеле́ние,/ любовию святую вашу память почита́ющим.

Слава, и ныне, Богородичен:

Вмести́лище чи́стое Света Пречи́стаго,/ пророцы Тя премудро пропове́даша;/ мученицы покланя́ются, святители пропове́дают,/ мона́си и прости́и, бога́тии и убо́зии,/ и всяк возраст мо́лят:/ спаси, Владычице, души наша.

Таже степенна, 1-й антифон, глас 4. Прокимен: Честна́ пред Господем смерть преподобных Его. Стих: Что воздам Го́сподеви о всех, яже воздаде́ ми. Всякое дыхание да хвалит Господа. Евангелие от Луки, зачало 24

По 50-м псалме стихира, глас 5:

Не своего то́чию смотря́ста,/ но еже всем поле́знаго,/ и возненави́деста вся́ку вещь, на грех влеку́щую,/ непрело́жен иму́ще по́мысл благоче́стия/ и соблю́дше себе мно́гою кре́постию в доброде́телех./ Сего ради тве́рда и нетле́нна соблюде́ Бог телеса́ ваша,/ отцы преподобнии./ Того моли́те спасти́ся нам,/ вашу память почита́ющим.

Канон Богородицы на 6 и святых канона два на 8

Канон святителя Гурия, глас 8

Песнь 1

Ирмос: Изра́иля от рабо́ты изба́вил еси, Господи,/ десни́цею Твоею держа́вною:/ яко о́наго спасл еси,/ ныне нас спаси́.

Тро́ице Пресвята́я, песнь Тебе принести́/ и достойными похвала́ми уго́дника Твоего святителя Гу́рия воспе́ти пода́ждь ми:/ да, ра́дуяся, сла́влю Тя во веки.

Повеле́нием самоде́ржца первопресто́льник церко́вный новопросвеще́нному граду Казани явля́ешися/ и апо́стольски научи́л еси ве́ровати Троице во Едином Существе.

Моли́твенный храм в дому́ твое́м имея/ и в том многотру́дне подвиза́ся,/ все́нощная стоя́ния и молитвы принося́ вы́ну Богу.

Богороди чен:

Божия Мати, ро́ждшая Еди́наго от Святыя Троицы,/ слове́сное ми недоуме́ние разреши́/ и сло́во ми пода́ждь, имже Тя просла́влю.

Канон святителя Варсонофия, глас 8

Песнь 1

Ирмос: Во́ду проше́д, яко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Богу нашему пои́м.

Иже пресла́вную память пра́зднующих святи́теля Твоего Варсоно́фия,/ Слово Божие Единоро́дное,/ слове́сную же́ртву принести́ к Тебе сподо́би нас/ и уго́дника Твоего верно восхвали́ти пода́ждь нам.

Святи́телю отче наш Варсоно́фие,/ моли́ся Христу Богу,/ да по достоя́нию возмо́жем принести́ тебе пение во хвале́ние/ и Христа просла́вим.

Неусы́пными моли́твами твоими, свя́те,/ страстны́я наша неду́ги уврачу́й,/ душе́вныя наша болезни исцели́/ и прегреше́ний оставле́ние у Христа нам испроси́.

Богородичен:

Прииди́те, де́вы и ма́тери,/ воспо́йте Пречи́стей Божией Матери глас Гаврии́ла Архангела:/ радуйся, Обра́дованная, ра́досте всего мира,/ и ра́достию Твоею обра́дуй души всех, пою́щих Тя.

Песнь 3

Ирмос: Утвержде́й словом небеса/ и землю основа́вый на вода́х многих,/ утверди́ мя к пе́нию славосло́вия Твоего, Господи.

Ада́ма дре́внейша, Агнца Непорочнаго, Бо́жияго Сло́ва Соприсносу́щнаго, святителю Гу́рие, моли́,/ да пода́ст благочести́вому народу нашему здра́вие во благоде́нстве и на сопроти́вных победу.

Егоже измла́да возлюби́л еси,/ и вся тле́нная мира сего в ничто́же вмени́л еси,/ преходя́щая презре́в,/ да в бу́дущем утверди́шися сла́вити Господа.

Благове́рных закону наказу́я благоче́стия,/ неве́рный же науча́я позна́ти веру благочести́ву и и́стинну/ и пе́ти с нами при́сно песнь, Ангелы пева́ему в Троице Богу:/ Свят еси, Господи.

Богородичен:

Под кров Твой держа́вный с верою прибега́ем, Богородице:/ покры́й и соблюди́, Госпоже́, моли́твами Твоими,/ и спаси́ от бед и от клеветы́ злых челове́к раб Твоих, при́сно пою́щих Тя.

Ин

Ирмос: Ты еси утвержде́ние/ притека́ющих к Тебе, Господи,/ Ты еси свет омраче́нных,/ и поет Тя дух мой.

Царе́вым повеле́нием первую обитель прекра́сну в новопросвеще́нном граде Каза́ни воздви́гл еси/и в той многотру́дне подви́глся еси,/ и многих ду́ши ко Христу привел еси.

Ви́дехом и почуди́хомся, па́че же стра́хом и радостною бы́хом одержи́ми,/ це́лы бо и неразруши́мы обрето́шася честны́я твоя мощи, святителю Варсоно́фие,/ и вси единогла́сно возопие́м:/ слава Христу Богу.

Ча́емаго, еже в будущем ве́це, наслажде́ния, преподо́бне, дости́гл еси,/ и ныне во свете Святыя Троицы лику́еши поя́ со Ангелы:/ Свят еси, Господи.

Богородичен:

Ублажи́м Божию Матерь Боже́ственными пе́сньми:/ иде́же бо сла́вится Преблагослове́нная Богородица,/ та́мо де́моном стра́шное исчезнове́ние, Христи́аном же кре́пость и утвержде́ние.

Кондак святителю Варсонофию, глас 6:

Воздержа́нием тело ду́ху порабо́тив,/ ду́шу же равноа́нгельну сотвори́л еси,/ сего ради святи́тельства са́ном поче́тся,/ чи́сте Чисте́йшему предстои́ши./ Моли́ Христа Бога, святи́телю,/ спасти́ лю́ди твоя, свя́те,/ да вси вопие́м ти:/ радуйся, отче преподо́бне Варсоно́фие,/ гра́ду нашему Каза́ни похвала́ и утвержде́ние.

Икос:

Пе́рвый до́му духо́внаго соста́витель/ и первый мона́хом наста́вник был еси, первый трудополо́жником о́браз и учи́тель был еси,/ в новопросвеще́нном граде Казани/ мона́хи наставля́я, и мирски́я поуча́я,/ и неве́рныя приводя́ во Христову веру,/ и всем был еси сам о́браз и учитель неле́стен./ И славному во граде́х Тве́ри святитель поставля́ешися,/ уча́ и наказу́я пути Госпо́дню./ Последи́ же манове́нием Божиим в потружде́ние свое/ во оби́тель Спасову вселя́ешися/ и труды к трудом прилага́еши,/ до́ндеже ве́стник, с Небес соше́д, пое́млет душу твою во обители Царства Небеснаго,/ иде́же ныне весели́шися с ли́ки святых./ Мы же, людие твои, вопием ти:/ радуйся, преподо́бне о́тче Варсоно́фие,/ граду нашему Казани похвала́ и утвержде́ние.

Седален, глас 4

Подобен: Вознесыйся:

От земли́ Воззва́вый вас к ве́чным оби́телем/ соблюда́ет и по смерти телеса́ ваша, отцы преподо́бнии:/ вы бо в целому́дрии и чистоте житие́ пожи́ли есте́,/ Гу́рие Богому́дре и Варсоно́фие преди́вне./ Того ра́ди любо́вию почита́ем святую память вашу и молим:/ моли́те Христа Бога спасти́ся нам.

Слава, и ныне, Богородичен:

Егда́ хощу́ предста́ти пред лице́м Созда́теля моего/ в день пра́веднаго Суда́ Его,/ тогда, Влады́чице, предста́ни ми/ и му́ки изба́ви мя ве́чныя,/ моли́тву сотвори́вши о упова́ющем на Тя, Свята́я Богоро́дице,/ да не сни́ду во ад,/ но да спасу́ся Твоим заступле́нием.

Песнь 4

Ирмос: Из горы́ приосене́нныя, Сло́ве, проро́к,/ еди́ныя Богоро́дицы,/ хотя́ща воплоти́тися Богови́дно, усмотри́/ и со стра́хом славосло́вяше си́лу Твою.

Благ нрав и послуша́ние к твоему наста́внику имел еси/ и, во све́те Святыя Троицы свеселя́ся, с ним пое́ши:/ слава си́ле Твоей, Господи.

Благослове́нием кра́йняго святи́теля/ поставля́ешися пастырь и учитель новопросвеще́нному гра́ду Каза́ни,/ иже пре́лестию врага́ омраче́нныя лю́ди све́том Богоразу́мия просвети́л еси.

И́ова пра́веднаго терпе́нию подража́л еси,/ в боле́зни слежа́, и на одре́, те́лом дручи́м, изнемога́л еси,/ поя́ Творцу́ твоему пе́ние непреста́нно.

Богородичен:

Богоневе́сто и Богома́ти,/ Плотоно́сца без боле́зни ро́ждши и по рождестве́ Де́ва я́вльшися,/ Того моли́, Влады́чице, да изба́вимся бед и скорбе́й.

Ин

Ирмос: Ты моя кре́пость, Господи,/ Ты моя и си́ла,/ Ты мой Бог, Ты мое ра́дование,/ не оста́вль не́дра О́тча/ и нашу нищету́ посети́в./ Тем с проро́ком Авваку́мом зову́ Ти:/ си́ле Твоей сла́ва, Человеколю́бче.

Патриа́рха Авраа́ма до́блесть восприи́м, святи́телю Варсоно́фие,/ а́лчныя кормя́ и жадныя напая́я,/ и не иму́щим неску́дна тре́бования подава́я,/ душе́вным и теле́сным хле́бом кормя́ вся приходя́щия/ и вруче́ное тебе ста́до.

Му́жественне терпя́ от неве́рных, в пле́не сый,/ и смире́ния ра́ди нра́ва/ в кро́тость преложи́л еси неве́рных,/ и сего́ ра́ди от Бога мзду́ восприи́м, святи́телю Варсоно́фие.

Пресла́вными чудотворе́нии от Бога одарова́ни быша святи́и чудотво́рцы,/ исцеля́юще неду́ги и отгоня́юще де́моны,/ моли́те изба́витися нам от бед вашими моли́твами.

Богородичен:

К Преблаже́нней Де́ве и Богоро́дице, о преподо́бнии,/ припади́те и моли́твы простри́те,/ да умо́лит Сына Своего, Христа Бога нашего,/ пода́ти христолюби́вому наро́ду нашему здра́вие и на враги́ побе́ду.

Песнь 5

Ирмос: Мрак души́ моей разжени́, Светода́вче Христе Боже,/ началоро́дную тьму изгна́в бе́здны,/ и да́руй ми свет повеле́ний Твоих, Сло́ве,/ да, у́тренюя, сла́влю Тя.

Архиере́й сый, архиере́ем на́шим в моли́твах спосо́бствуй,/ да возмо́гут гра́ду Каза́ни, благоче́стия содержи́телю,/ и всему христиа́нскому наро́ду/ испроси́ти у Христа ми́ра и ве́лия ми́лости.

Ны́не, преблаже́нне Гу́рие, душа́ твоя почива́ет на Небеса́х,/ предстоя́ Престо́лу Христо́ву:/ честны́я же твоя мо́щи нетле́нием почте́ны,/ даю́т исцеле́ния приходя́щим с ве́рою.

Дре́вле помраче́нный зми́евою пре́лестию,/ ны́не же просвеще́нный Христо́вою благода́тию/ град Каза́нь, ви́дя в себе нетле́нны мо́щи твоя, ра́дуется./ Мы же, ча́да твоя, чудесы́ обогаща́еми, весели́мся,/ Христа́ сла́вяще, зове́м:/ спаси́ нас, Господи.

Богородичен:

Богоро́дице, всех Цари́це, благочести́вому наро́ду на́шему на враги́ побе́ду да́руй/ и сопроти́вных сове́ты разори́,/ и от междоусо́бныя бра́ни изба́ви,/ и клеветнико́в че́люсти сокруши́, Влады́чице,/ и от всех бед моли́твами Твоими спаси́ нас.

Ин

Ирмос: Вску́ю мя отри́нул еси́/ от лица́ Твоего, Све́те незаходи́мый,/ и покры́ла мя есть чу́ждая тьма, окая́ннаго;/ но обрати́ мя и к све́ту за́поведей Твои́х/ пути́ моя напра́ви, молю́ся.

Му́драя уче́ния всем показа́л еси/ и душе́вное естество́ чи́сто стя́жал еси,/ презира́я плоть, прехо́дит бо:/ и сего ра́ди со А́нгелы Престо́лу Влады́чню предстои́ши, святи́телю,/ моля́ Христа Бога спасти́ся нам.

Воспева́ющих тя и при́сно блажа́щих,/ и па́мять твою ве́рно прославля́ющих, святи́телю Варсоно́фие,/ освяти́ и просла́ви,/ и от напа́стей и бед изба́ви.

Боже́ственным манове́нием, о́тче,/ плотско́е жела́ние отри́нув,/ и после́довал еси любо́вию зову́щему тя Христу,/ блаже́нне Варсоно́фие, святи́телю всече́стне.

Богородичен:

Правове́рно чту́щия Тя лю́ди/ и ико́не Твоей святе́й любе́зно покланя́ющияся,/ о Бо́жия Ма́ти, спаси́/ и от клеветы́ злых челове́к изба́ви.

Песнь 6

Ирмос: Яко во́ды морска́я, Человеколю́бче,/ волна́ми жите́йскими обурева́юся./ Те́мже, яко Ио́на,/ та́ко вопию́ Ти:/ возведи́ от тли живо́т мой, Благоутро́бне Го́споди.

Утешая́ скорбя́щия, заступа́я оби́димыя, накормля́я а́лчущия/ и вся всем подава́я неоску́дно, Гу́рие святи́телю,/ Христа́ Бога моли́ спасти́ся нам.

Бо́жиим смотре́нием и святи́тельским благослове́нием, и ца́рским повеле́нием,/ руко́ю мое́ю недосто́йною приноси́мое ва́шим трудо́м похвале́ние,/ преподо́бныя чудотво́рцы, не отри́ните, но приими́те/ и моли́те Христа, да изба́вит мя шу́ияго стоя́ния.

Тече́ние восприя́ и путь соверши́, и зе́млю непло́дну моли́твами твои́ми добропло́дну показа́:/ и о мне, принося́щем тебе пе́ние сие́, святи́телю, моли́ Христа,/ да принесу́ и аз покая́ния плод,/ да изба́вит мя ве́чнаго муче́ния.

Богородичен:

Богоблаже́нная и от А́нгел покланя́емая, и от земны́х всегда́ славосло́вимая,/ Творца́ Твоего́ и Бо́га, Его́же родила́ еси, Пресвята́я Де́во,/ моли́ спасти́ся нам.

Ин

Ирмос: Моли́тву пролию́ ко Го́споду/ и Тому́ возвещу́ печа́ли моя,/ яко зол душа́ моя испо́лнися,/ и живо́т мой а́ду прибли́жися,/ и молю́ся, яко Ио́на:/ от тли, Бо́же, возведи́ мя.

Ки́ими похвала́ми возмо́жем тебе́ похвали́ти,/ преподо́бне святи́телю Варсоно́фие?/ По преставле́нии бо твое́м це́лы и нетле́нны обрето́шася цельбоно́сныя твоя мо́щи.

Вся сотво́ршаго, и всю вселе́нную кормя́щаго Сы́на Бо́жия/ и А́нгельскаго Царя́ Преве́чнаго, Спа́са Христа́/ умоли́, святи́телю Варсоно́фие, да пода́ст лю́дем нашим здра́вие,/ и земны́я плоды́ умно́жит, и гре́хи отпу́стит.

И́стиннаго всех Па́стыря Христа́, святи́телю Варсоно́фие,/ моли́ со все́ми освяще́нными ли́ки,/ да спасе́т лю́ди по вели́цей Его ми́лости,/ и сохране́ни бу́дем от диа́вольских кова́рств, чту́щии тя.

Богородичен:

Боже́ственней Твое́й покланя́емся ико́не, Богоро́дице,/ прося́ще от Тебе́ вели́кия ми́лости:/ да́руй, Влады́чице, согреше́ний оставле́ние рабо́м Твои́м,/ Еди́на Благослове́нная.

Кондак святителю Гурию, глас 4:

Чу́вственныя стра́сти победи́в, чистото́ю, яко со́лнце, возсия́л еси,/ чи́сто житие́ до конца́ сохрани́в, и от неве́рия в ве́ру мно́гих ко Христу́ приве́л еси,/ и Того ра́ди от Бо́га нетле́нием почте́н был еси и чудесы́ удивля́ем./ Мо́лим тя, святи́телю Гу́рие, моли́твами твои́ми от бед изба́ви нас, да зове́м ти:/ ра́дуйся, о́тче преди́вный, гра́ду Каза́ни похвала́ и утвержде́ние.

Икос:

Пе́рвый се́ятель был еси духо́вных доброде́телей и пе́рвый па́стырь и Це́ркви нача́льник,/ пе́рвый архиере́й и учи́тель христиа́нскому зако́ну в новопросвеще́нном гра́де Каза́ни,/ ве́рныя лю́ди кормя́ хле́бом уче́ния благода́тнаго зако́на, напая́я пи́вом духо́вныя благода́ти,/ неве́рный же уча́ позна́ти и́стину и крести́тися святы́м Креще́нием,/ и мно́жество наро́да от неве́рия в ве́ру ко Хри́сту приве́л еси, и чи́стым житие́м Бо́гу угоди́ти наста́вив их./ Сего́ ради Христо́с свято́му и трудолюбе́зному твоему́ те́лу дарова́ нетле́ние и дар чудотворе́ния./ Приходя́щии бо с ве́рою к цельбоно́сным твоим моще́м прие́млют неоску́дная страсте́й премене́ния/ и боле́зней исцеле́ние, и грехо́в проще́ние/ твои́ми, свя́те, ко Христу́ моли́твами, да зове́м ти:/ ра́дуйся, о́тче преди́вный, гра́ду Каза́ни похвала́ и утвержде́ние.

Песнь 7

Ирмос: О́троцы Богоче́стивии в Вавило́не/ о́бразу злато́му не поклони́шася,/ но посреде́ пе́щи о́гненный, ороша́еми,/ песнь воспева́ху, глаго́люще:/ Превозноси́мый отце́в и нас Бо́же, благослове́н еси.

Не то́кмо у́бо те́ло твое нетле́нием просла́вил есть Бог, святи́телю Гу́рие,/ но и погреба́льная вся и до ныне пребыва́ют но́вых крепча́йше./ Мы же, сим дивя́щеся, зове́м:/ благослове́н Бог отце́в на́ших.

По́двигов твои́х ра́ди и трудо́в, преподо́бне, те́ло твое нетле́нно показа́ Бог:/ гро́бу бо и ри́зам вме́сто тле́ния кре́пость дарова́,/ благослове́н Бог отце́в на́ших.

Не еди́но у́бо те́ло твое, святи́телю, тле́нию бысть неприча́стно,/ но и погре́бшихся с ве́рою во еди́ной гробни́це с тобо́ю,/ моли́твами твои́ми дву мона́хов нетле́нием одари́ Бог, Ему́же зове́м:/ благослове́н еси, Го́споди, Бо́же отце́в на́ших.

Богородичен:

О Всепе́тая и Всенепоро́чная Влады́чице,/ моли́ Сына Твоего́, Христа Бо́га нашего, да изба́вит нас ве́чнаго муче́ния, да пое́м:/ благослове́н Бог отце́в на́ших.

Ин

Ирмос: В нача́ле зе́млю основа́вый/ и небе́са сло́вом утверди́вый,/ благослове́н еси во ве́ки, Го́споди, Бо́же оте́ц на́ших.

Всех благи́х о́браз был еси, к вы́шнему житию́ веду́щ смире́нием и кро́тостию./ Те́мже и Христос па́стыря тя лю́дем Свои́м устроя́ет, пою́щим:/ благослове́н Бог оте́ц на́ших.

Не преста́й, Варсоно́фие, моля́ся о духо́вных твои́х ча́дех,/ и́хже духо́вным уче́нием породи́л еси, да пое́м:/ благослове́н Бог оте́ц на́ших.

Иже твою́ пресла́вную па́мять пра́зднующим, святи́телю Варсоно́фие,/ моли́ изба́витися всем от разли́чных бед и напа́стей,/ да вси зове́м:/ благослове́н Бог оте́ц на́ших.

Богородичен:

Вопло́щся от пречи́стых Твои́х ложе́сн Бо́жие Сло́во, Де́во Пречи́стая,/ всех к Богоразу́мию наста́ви, да пое́м Ему:/ благослове́н Бог оте́ц на́ших.

Песнь 8

Ирмос: Покрыва́яй вода́ми превы́спренная Своя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,/ яко Соде́телю всех во ве́ки.

Пречи́стая ра́ка, иде́же положено́ честно́е те́ло твое́, святи́телю Гу́рие,/ ми́ра благоуха́нна преиспо́лнена бысть./ Иже с ве́рою ма́жущийся неоску́дна исцеле́ния прие́млют, зову́ще:/ да благослови́т вся тва́рь Го́спода/ и превозно́сит Его во ве́ки.

Новопросвеще́нному гра́ду Каза́ни первопресто́льник посыла́ешися/ и мно́жество неве́рных к твоему́ Влады́це Христу́ приве́л еси,/ пою́щих Ему:/ благослови́те, пойте и превозноси́те Го́спода во ве́ки.

Па́стырский жезл прие́м, святи́телю,/ но́вым лю́дем учи́тель был еси, пресла́вне Гу́рие,/ и мно́ги лю́ди ага́рянска язы́ка свя́тым Креще́нием обнови́л еси, да вси с тобо́ю зове́м:/ благослови́те, по́йте и превозноси́те Го́спода во ве́ки.

Богородичен:

Богоизбра́нная, Еди́на Всенепоро́чная,/ Пречи́стая Богоневе́сто и Богома́ти,/ приими́ мольбы́ ве́рою упова́ющих на Тя/ и сотвори́ моле́ние ко Святе́й Тро́ице изба́витися нам от всех бед,/ Тя сла́вящим и превознося́щим Го́спода во ве́ки.

Ин

Ирмос: На горе́ святе́й просла́вльшася/ и в купине́ огне́м/ Присно де́вы Моисе́ови та́йну я́вльшаго,/ Го́спода по́йте/ и превозноси́те во вся ве́ки.

Любому́дрства душе́внаго не премо́же теле́сная твоя́ боле́знь, о́тче:/ о Бо́зе бо ре́вность восприи́м, в ничто́же вменя́еши мимоходя́щую скорбь,/ Того́ ра́ди ве́чныя боле́зни избе́гл еси.

Боле́ у́бо боле́знию боле́зненне, да мимотече́щи су́етных боле́зней/ и ны́не на Небесе́х со А́нгельскими ли́ки предстои́ши Святе́й Тро́ице, зовы́й:/ вся дела́ Госпо́дня Го́спода по́йте и превозноси́те Его во ве́ки.

Яко бо ино́ю пи́щею пита́яся,/ зо́льным поще́нием и всено́щным стоя́нием изнуря́я плоть твою́,/ поя́ непреста́нно:/ вся дела́ Госпо́дня Го́спода по́йте и превозноси́те Его во ве́ки.

Богородичен:

Пречи́стая Богоро́дице, приими́ недосто́йную моли́тву мою/ и сохрани́ мя от клеветы́ злых челове́ков/ и от напра́сный сме́рти,/ и да́руй мне пре́жде конца́ покая́ние.

Песнь 9

Ирмос: Сне́дию дре́ва ро́ду прибы́вшая смерть,/ Кресто́м упраздни́ся днесь:/ ибо прама́терняя всеро́дная кля́тва разруши́ся прозябе́нием/ Чи́стыя Богома́тере,/ ю́же вся си́лы Небе́сныя велича́ют.

Прия́л еси от Христа Боже́ственное Его дарова́ние:/ от мно́гих бо лет сокрове́ны честны́я твоя́ мо́щи в три́десять же второ́е ле́то обрето́шася невреди́мы ничи́мже,/ исцеле́ния разли́чна подава́юща.

Па́мять обре́тения честны́х моще́й твои́х наста́ нам све́тло пра́зднество, пречу́дный святи́телю Христо́в, прехва́льне Гу́рие,/ в ню́же чуде́с благода́ть прия́л еси от всех Царя́ Христа́ Бо́га./ Те́мже зове́м: изба́ви нас от враго́в на́ших.

Благода́рственныя пе́сни принесе́м Христу́ Бо́гу на́шему,/ такова́го нам святи́теля дарова́вшему, Це́ркви Свое́й пречестно́е удобре́ние/ и гра́ду Каза́ни вели́кое утвержде́ние.

Богородичен:

Умири́ мир, Христе́, мольба́ми Чи́стыя Богоотрокови́цы,/ и низложи́ вра́жия си́лы, и тишину́ неизглаго́ланну устро́й и во ве́ки сохрани́.

Ин

Ирмос: Проя́вленное на горе́ законополо́жнику во огни́ и купине́/ Рождество́ Присноде́вы,/ в на́ше ве́рных спасе́ние/ пе́сньми немо́лчными велича́ем.

Пра́зднующим све́тло па́мять обре́тения честны́х моще́й твои́х лю́дем на́шим мир испроси́/ и усо́бныя бра́ни укроти́, и изба́ви нас от нахожде́ния пога́ных,/ и клеветнико́в че́люсти сокруши́.

Свобо́ден твой ум от страсте́й соблю́д, и сосу́д освяще́н Ду́ху Пресвято́му был еси,/ и Христа́ прии́м в се́рдцы твое́м,/ и чудотво́рец яви́лся еси, прогоня́я де́моны./ Сего́ ра́ди мо́лим тя изба́витися нам от сете́й их твои́ми, свя́те, моли́твами.

Царю́ сил Вы́шних, Христе́, кре́постию десни́цы Твоея́ покори́ враги́ нечести́выя,/ и лю́ди Твоя́ спаси́, и земны́я плоды́ умно́жи.

Богородичен:

На моле́ние мое умилосе́рдися и ра́дость ми в печа́ли ме́сто да́руй, Влады́чице,/ и от клеветы́ злых челове́к изба́ви мя, да пою́ Ти:/ ра́дуйся, Обра́дованная, с Тобо́ю Госпо́дь.

Светилен

Подобен: Посети́л ны:

Егда́ убо честны́я ва́ша и святы́я мо́щи нетле́нны обрето́шася,/ тогда́ благоуха́ние от гробо́в ва́ших изноша́шеся,/ исцеля́ющее неду́ги и отгоня́ющее ду́хи лука́выя.

Слава, и ныне, Богородичен:

Вознеси́, Богоро́дице, рог Це́ркви,/ и наро́ду на́шему пода́ждь на враги́ одоле́ние и кре́пость,/ и Це́рковь, Чи́стая, утверди́, и лю́ди Твоя́ поми́луй,/ да Тя всяк язык христиа́нский велича́ет.

На хвалитех стихиры на 4, глас 2

Подобен: Егда́ от Древа:

Тобо́ю освяти́л есть Госпо́дь, святи́телю Гу́рие,/ град вели́кий, неве́рием погруже́нный./ Тобо́ю наста́ви неве́рныя лю́ди позна́ти ве́ру и́стинну./ Тобо́ю же приведо́шася ко Христу́ мно́жество неве́рных./ И неиму́щим неоску́дное подава́ние,/ а́лчущим корми́тель и пита́тель, и в беда́х помо́щник,/ и всем к тебе́ прибега́ющим бога́тное приобре́тение,/ Гу́рие преподо́бне.

Тобо́ю, преподо́бне святи́телю Варсоно́фие, пе́рвая и вели́кая оби́тель Спа́сова свята́го Преображе́ния/ в новопросвеще́нном гра́де Каза́ни соста́вися./ И тобо́ю, яко древеса́ добропло́дна, и яко сад присноцвету́щий,/ и яко плод кра́сен, мно́жество мона́хов твое́му Влады́це Христу́ принесо́шася:/ тобо́ю же мно́жество ве́рных мона́шеская натрижне́ния и труды́ возлюби́ша,/ и мно́жество неве́рных от тьмы вознико́ша/ и к Све́ту, Христу́ Бо́гу, притеко́ша,/ и уче́нием твои́м мно́зи спасо́шася.

Вы убо в ми́ре сем на́ши нача́льницы и наста́вницы/ и учи́тели ко спасе́нию нам яви́стеся:/ о́в у́бо нача́льный па́стырь и святитель гра́ду Каза́ни был есть,/ о́в же о́бщему житию́ соста́витель и мона́хом учи́тель и па́стырь бысть;/ ку́пно же уча́ще и наказу́юще Бо́жия лю́ди пути́, вводя́щу в Ца́рство Небе́сное,/ вку́пе же и во един час обрето́шася святы́я ва́ши мо́щи нетле́нны/ и чуде́с дар прия́ли есте́ от Бо́га,/ исцеле́ние подава́ете неоску́дно приходя́щим к вам с ве́рою.

По достоя́нию убо не мо́жем вас похвали́ти, отцы́ преподо́бнии:/ и по сме́рти убо, не яко во сне, но на я́ве стра́ждущему от бесо́в явля́етеся/ и мно́жество духо́в злых от обурева́емаго отго́ните,/ и глаго́лати подае́те, от бесо́в язы́ку отре́заемому./ Моли́те Христа, преподо́бнии святи́телие,/ и о нас, чи́сто чту́щих святу́ю ва́шу па́мять,/ да спасе́т ду́ши на́ша.

Слава, глас 8. Самогласен:

Яко зве́зды пресве́тлыя,/ во страна́х Восто́ка яви́стеся:/ поне́же от ю́ности своей плотска́я мудрова́ния преоби́десте вся;/ впери́вше же ум ваш к жела́емому Христу́ Бо́гу,/ и сконча́сте тече́ние до́брое посто́м и моли́твою, и ми́лостынею, и бде́нием, и чистото́ю теле́сною./ И отве́рзеся вам Ца́рство Небе́сное,/ и ви́дите, я́же ви́дят А́нгели,/ и воздая́ние трудо́в прие́млете:/ Бог бо весть прославля́ти Своя́ уго́дники/ и подава́ти венцы́ нетле́нныя./ Мы же мо́лим вас:/ моли́те, святи́и чудотво́рцы,/ и о нас непреста́нно Христа́ Бо́га спасти́ся душа́м на́шим.

И ныне, Богородичен

Славословие великое, и отпу́ст

На Литургии: Блаженна от канона святых, песнь 3 и 6, на 8. Прокимен, глас 7: Честна́ пред Го́сподем/ смерть преподо́бных Его. Стих: Что́ возда́м Го́сподеви о всех,/ яже воздаде́ ми. Апостол к Евреем, зачало 335. Аллилуиа, глас 2. Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются. Евангелие от Матфея, зачало 11. Причастен: Ра́дуйтеся, пра́веднии, о Го́споде.

 

На вечерни:

На Господи, воззвах: стихиры, глас 4

Подобен: Дал еси зна́мение:

Благода́ть прие́м Всесвята́го, всесла́вне Иерофе́е, Духа,/ всю проше́л еси ны́не вселе́нную,/ уча́ Еди́ницу в Трех Ипоста́сех чести́:/ Отца́ Безнача́льна, нача́ло Божества́,/ с Ни́мже Сы́на яко Сопресто́льна Отцу́ и Единосу́щна,/ от Девы ражда́ема плотоно́сца яко Челове́ка.

Дар священнобоже́ственный, твою душу,/ яко благоприя́тен, прине́сл еси/ и тело пре́дал еси свяще́нно яко Боже́ственное/ и священноде́йствующее ду́ши ве́рующих Вседержи́телю Богу,/ спасе́ние ве́рным источа́ющее./ Тем твою память и погребе́ние ублажа́ем,/ и чудеса́ любим, и словеса́ пропове́дуем.

Ты двоенадеся́тное число́ апо́столов/ ви́дел еси на Успе́нии Преславныя/ Присноде́вы же Пречи́стыя Богоро́дицы, Ма́тере Госпо́дни,/ и Диони́сий с тобою,/ иже Боже́ственныя списа́в чи́ны,/ с нимиже твое́ всепра́зднственное и пресвято́е торжество́,/ ве́рнии, ублажа́ем, Иерофе́е сла́вне.

Слава, глас 2

Предста́в Успе́нию Боже́ственному, Богопове́стниче, Богома́тере,/ веща́нии Боже́ственными/ возвесели́л еси сердца́, блаже́нне, ве́рных/ и свяще́нное сосло́вие Богопропове́дателей апо́столов услади́в,/ изступле́нием Боже́ственнейшим воспева́я Божия тайны./ Тем дерзнове́ние ко Христу прие́м, иера́рше Иерофе́е,/ моли́ся о душа́х наших.

И ныне, Богородичен или Крестобогородичен

Подобен: Егда от Древа:

Егда Нескве́рная А́гница ви́де Своего А́гнца/ на заколе́ние, яко челове́ка, во́лею влеко́ма,/ пла́чущи, глаго́лаше:/ безча́дствовати Мя ныне тщи́шися, Хри́сте, Ро́ждшую Тя,/ что́ сие́ сотвори́л еси, Изба́вителю всяческих,/ оба́че воспева́ю и сла́влю Твою, юже паче ума́ и сло́ва,/ кра́йнюю бла́гость, Человеколю́бче.

Тропарь, глас 4:

Бла́гости научи́вся и трезвя́ся во всех/ благо́ю со́вестию священноле́пно обо́лкся,/ поче́рпл еси от сосуда избра́ннаго неизрече́нная/ и, ве́ру соблю́д, равное тече́ние соверши́л еси,/ священномучениче Иерофе́е./ Моли Христа Бога спасти́ся душа́м нашим.

Слава, и ныне, Богородичен или Крестобогородичен

На утрени

Оба канона Октоиха, и святаго канон, егоже краегранесие: Светоно́сную твою, всеблаже́нне, память почита́ем. Творе́ние Феофа́ново. Глас 8.

Песнь 1

Ирмос: Во́ду проше́д, яко сушу,/ и еги́петскаго зла избежа́в,/ изра́ильтянин вопия́ше:/ Изба́вителю и Богу нашему пои́м.

Небе́снаго ученика́, тайноводи́теля, Богоприя́тне,/ Павла, мирска́го ловца́, учи́теля имея,/ виде́ния Го́рнейшаго ученик был еси.

Духодви́жный я́вственно/ Павлов тя язык, веща́ющ Бо́жия тайны, блаже́нне,/ объя́ше и Боговеща́теля соде́я.

Унзе́н любо́вию духо́вною/ и Боже́ственными словесы́ в ра́зуме бесе́дуя всех Влады́це, всесвяще́нне,/ свяще́нная словеса́ возложи́л еси.

Богородичен:

Све́та присносу́щнаго прия́телище Боголе́пное бы́вши, Дево Чистая,/ скверн мя всякаго греха́ и тиме́ний измый, Влады́чице.

Песнь 3

Ирмос: Небе́снаго круга Верхотво́рче, Господи,/ и Церкве Зижди́телю,/ Ты мене утверди́ в любви Твоей,/ желаний краю,/верных утверждение,/ Едине Человеколюбче.

Яко священносло́вяща свяще́нная пи́смена и благоче́стия слово пропове́дающа,/ вси почитаем тя, ве́село соше́дшеся, и твою свяще́нную память славим.

Крепостию, и ма́нием, и Боже́ственным раче́нием к Благоде́телю всех возпростира́яся,/ ум твой озари́л еси луча́ми та́мошними/ и душу просвети́л еси, преблаже́нне.

Тезоиме́нне наре́клся еси свяще́нное Боже́ственное/ и святое Богомудрое яви́лся еси возложе́ние Вседержи́телю и Творцу веко́в,/ и храм украси́л еси Небесный.

Богородичен:

Небо Простры́й и земны́й, Чистая, Содержай круг,/ и по всему естеством Божества́ во обя́тиих Твоих пло́тски содержа́ся/ и верным Тя утверждение всем показа́.

Кондак, глас 8

Подобен: Взбра́нной:

Священнонача́льника Афи́нскаго восхваля́ем тя,/ яко тайноучи́вшеся тобою странным и неизрече́нным:/ явился бо еси Богоприя́тный песносло́вец./ Но моли, всеблаже́нне Иерофе́е,/ от вся́ких нам грехопаде́ний изба́витися, да зове́м:/ радуйся, отче Богомудре.

Таже седален, глас 5

Подобен: Собезначальное Слово:

Апо́стольским веща́нием огласи́в твой ум/ и упа́с, преподо́бне, верных составле́ния,/ жертву чи́сту принеся еси Царю и Творцу,/ вопло́щшемуся за ны от Девы Богоро́дицы/ и воскре́сши со сла́вою, испове́дав Его, Иерофе́е.

Слава, и ныне, Богородичен:

Те́плая Предста́тельнице и непобеди́мая,/ упова́ние изве́стное и непосты́дное,/ сте́но, и покро́ве, и приста́нище прибега́ющим к Тебе, Присноде́во Чи́стая,/ Сына Твоего и Бога моли со А́нгелы/ умире́ние да́ти миру, и спасе́ние, и ве́лию милость.

Крестобогородичен:

На Кресте зря́щи Тя, Христе, Мати Твоя,/ во́лею посреде́ разбойников ви́сяща,/ растерза́ющися утро́бою ма́терски, глаго́лаше:/ Безгрешный Сыне, како непра́ведно на Кресте, якоже злодей, пригвожде́н еси,/ человеческий род хотя́ оживи́ти, яко Благоутро́бен.

Песнь 4

Ирмос: Ты моя кре́пость, Господи,/ Ты моя и сила,/ Ты мой Бог, Ты мое ра́дование,/ не оста́вль не́дра о́тча/ и нашу нищету́ посети́в./ Тем с пророком Авваку́мом зову́ Ти:/ силе Твоей слава, Человеколюбче.

Вити́йскими Боговещаньми украси́л еси ликостоя́ния, блаже́нне Иерофе́е, ве́рных/ и свяще́нный собор, Богомудре, возвесели́л еси апостольский,/ удивле́нием Боже́ственным де́йствуя и поя́:/ силе Твоей слава, Человеколюбче.

Весь Богу освяще́н был еси всеобра́зно, блаженне,/ изступа́я к Нему Богословными священносло́вии, священноявле́н, Богоприя́тне,/ и Боже́ствен песносло́вец, и мудр Боговещатель, прису́щим смы́сленно суди́мь.

Ныне ви́дя, отче, Божественная ясне́йше/ мимошедших всех священнейше гада́ний и се́ний, сущих на земли,/ и́стиннейшая Боговидения сияний,/ моли спастися верно пою́щим:/ силе Твоей слава, Человеколюбче.

Богородичен:

Ты Бога Невместимаго, вме́щшагося во чрево Твое, Пречистая, родила́ еси,/ яко Чистая де́встветными укра́шена светлостьми́, Всеблаженная./ Тем Тя, Богородицу, истинно благохва́лим и Рождество Твое вси славим.

Песнь 5

Ирмос: Вску́ю мя отри́нул еси/ от лица Твоего, Свете незаходи́мый,/ и покры́ла мя есть чужда́я тьма окаяннаго:/ но обрати мя и к свету заповедей Твоих/ пути моя направи, молюся.

Купножи́тель, отче, апостольскому сый собранию,/ с нимиже предстал еси на Успение Божественное, Богогласе,/ Жизнодавца плотию нам ро́ждшия Пресвятыя и Чистыя Богоматере.

Преестественно разумев и старчески, яже паче словесе, виде́ния,/ испове́да всем прие́млющим верно сияние/ и твоя, всеблаженне, созри́тельная Богословия,/ разуме́ти лю́бящим, вседо́блественнейше.

Пребога́тными луча́ми паче естества светозаре́нием светя́ся,/ извествова́нием Божественных откровений и чистотою,/ многих одержал еси временным испытанием, и видением, мудре́йшая Божественная науча́ем.

Богородичен:

Неискусому́жно, Дево, Непредельнаго естеством Божества́,/ вмужи́вшагося Слова нас ра́ди, человеков, зачала еси от крове́й, Отроковице, девственных,/ воображе́на паче слова, и закона, и естества.

Песнь 6

Ирмос: Очи́сти мя, Спасе,/ мно́га бо беззакония моя,/ и из глубины́ зол возведи́, молюся:/ к Тебе бо возопи́х, и услыши мя,/ Боже спасения моего.

Навыче́нием Боголепным Божественному знанию научаемь,/ словеса, отче, твоя, яко втора́я словеса оставил еси я́ве священнозна́ния,/ ду́ши наша просвеща́ющая.

Блажен истинно был еси, Богоблаженне,/ очище́нное душею и су́щее блаженство,/ и едино желаемое возлюбил еси, добро́ты Спа́совы, Иерофе́е.

На пречистыя лучи́ взирая, Богоприятне,/ разумными блиста́ньми Божественных све́тлостей,/ тех наслаждения и светодая́ния о́бщник явился еси, блаженне.

Богородичен:

Госпо́дственно и истинно Тя, Богородице, славим,/ су́що бо Сущаго Бога неизреченно родила́ еси,/ плотию по Ипостаси совоку́пльшася,/ Пресвятая Мати Дево.

Кондак, глас 4

Подобен: Вознесыйся:

Якоже столп непоколеби́м, Иерофе́е,/ преще́ния врагов не устраши́ся,/ но пре́лести разруши́л еси твердыню,/ яко камень че́стен валя́яся, отче./ Тем Владыка тя, хра́брствовавша, венча́ет/ живоначальною и Божественною десницею./ егоже о всех нас умоли.

Икос:

Закону покаря́ющеся Твоему, Христе, ученицы́ Твои/ и и́же от язык всем пропове́дающе слово Божественнаго Твоего пришествия,/ Це́рквам всем рукополага́ют верныя, па́стыри же и пропове́датели./ Па́стыря убо и сего положи́ша, егоже избрал еси от младенства,/ и просвети́в, яко непоро́чна, Тебе, и произво́ли на сие того возвед,/ и стадо Твое вручи́в, свидетеля явил еси Твоего Царствия, моля́щася о всех нас.

Песнь 7

Ирмос: Божия снизхожде́ния/ огнь устыде́ся в Вавилоне иногда,/ сего ра́ди о́троцы в пещи́ ра́дованною ного́ю,/ яко во цве́тнице, лику́юще, поя́ху:/ благословен еси, Боже отец наших.

Святых святая тща́ся видети, Богоблаженне,/ чистотою жития́ и зрения Божественнаго высокое, мудре, стяжа́л еси,/ и, поя, взыва́л еси:/ благословен Бог отец наших.

Глагол веща́ние твоих и списа́ний доброслове́сие возвеселяет любовию че́ствующия/ и поущает к песнопе́нию, звати науча́я:/ благословен еси, Боже отец наших.

Еди́ницу, Божество́м знаемую, благосло́вил еси,/ в Ли́цех Троицу и поему во Ипостасех Трех, Богомудре,/ и, поя, взывал еси:/ благословен Бог отец наших.

Богородичен:

Законных естеств, Дево Ма́ти, кроме́ родила́ еси/ Влады́чествующаго всеми видимыми и разумными, Чистая,/ егоже пое́м, согласно зову́ще:/ благословен Бог отец наших.

Песнь 8

Ирмос: Седмери́цею пещь/ халде́йский мучитель/ Богочестивым неи́стовно разжже́,/ силою же лу́чшею спасе́ны, сия видев,/ Творцу и Изба́вителю вопия́ше:/ о́троцы, благословите,/ свяще́нницы, воспо́йте,/ людие, превозноси́те во вся веки.

Всесильное Духа Святаго де́йство в чисте́йшую твою душу все́льшися,/ Богоприятна проповедника и Богоглаго́льника показа́,/ священноле́пно Изба́вителя пою́ща и верою хва́ляща:/ свяще́нницы, воспо́йте, людие, превозносите во вся веки.

С благоче́стным взысканием испыта́в неизрече́нная строе́ния Христовых та́йн,/ ясно изъяви́л еси, высокослове́сием действуя/ и сладчайшим твоих веща́ний сложением, вопия́ непрестанно:/ священницы, воспо́йте, людие, превозноси́те во вся веки.

Всебогатая тя благодать Божественнейшим вдохновением и Богословием испы́тным исполнила есть:/ отсюду источил еси, яко ре́ки, учения,/ апостольская возвеселя́ща ликостоя́ния, с ни́миже ныне воспеваеши:/ священницы, воспо́йте, людие, превозноси́те во вся веки.

Богородичен:

Умерщвле́ну, Пречистая, душу мою грехми́/ и озло́блену ядовитым угрызе́нием,/ Бога, могу́щего животвори́ти всяческая,/ неискусобра́чно паче естества ро́ждши, возстави вопию́щую:/ дети, благословите, священницы, воспо́йте, людие, превозноси́те во вся веки.

Песнь 9

Ирмос: Ужасе́ся о сем Небо/ и земли удиви́шася концы,/ яко Бог яви́ся человеком пло́тски,/ и чрево Твое бысть простра́ннейшее Небес:/ тем Тя, Богородицу,/ Ангелов и человек чиноначалия величают.

Мудрости Премудраго яко рачи́тель быв,/ благодатный венец благолепный, ра́дуяся, приял еси ныне от нея;/ и лико́вник Небесный у всяческих Содетеля быв,/ моли спастися от бед хва́лящим тя, Иерофе́е.

Вселился еси в Вы́шния Боже́ственныя дворы́ и, обители вечный насле́див,/ с во́инствы Ангельскими ныне пра́зднуеши и с апостольскими чи́нми, имже свесели́шися радостне,/ с нимиже и соводворя́яся, верою честву́ющим тя Божественнаго мира проси.

Известная воздая́ния восприе́м, иже на земли явления стяжа́л еси, присною любовию взирая к Богу,/ ныне прилежно моли, отче Иерофе́е,/ милость и очищение пода́ти верою память твою совершающим, светоно́сную и всесвяще́нную.

Богородичен:

Яко Мати всех Содетеля,/ ма́терним Твоим дерзновением умоли Твоего Сына/ спасти от наси́лия мучительскаго плене́нныя рабы́ Твоя/ и клеветы́ человек лукавых упраздни́ти,/ мир же пода́ти и спасение поющим Тя.

Светилен

Подобен: Жены́, услышите:

Хуждшее покорил еси лучшему, Богоприятне,/ ум страсте́й вожда́ предвчини́в всемудро,/ отвсюду, Иерофе́е, Богословия был еси орга́н/ и апостол Христов, мудре иерарше,/ о мире моли́ся.

Богородичен:

Успению Твоему пречистому пришед Иерофе́й с прочими апостолы,/ песнь поет Тебе, Отрокови́це, странную и неизреченную,/ Божественно изступа́я, яко истинно Богоприятен;/ емуже подо́бники и нас покажи, Богомати Девице.