В 28-й день

НА ВЕЧЕ́РНИ

На Го́споди, воззва́х: стихи́ры, глас 8.

Подо́бен: Му́ченицы Твои́:

Моисе́й многонаро́читый,/ мирско́е украше́ние оста́вль му́дре,/ боле́зньми воздержа́ния кре́пкими/ стра́сти покори́ плотски́я/ и, низложи́в многоко́зненнаго,/ побе́ды вене́ц прия́т./ Того́ моли́твами, Го́споди,/ всем пода́ждь ве́лию ми́лость.

Воздержа́ние изря́дное,/ стоя́ние всено́щное, бде́нное о́ко,/ ум, смотря́ющ Боже́ственныя добро́ты,/ име́л еси́, блаже́нне Моисе́е,/ те́мже исцеле́ний благода́ть прия́л еси́,/ стра́сти цели́ти лю́тыя./ сего́ ра́ди тя мо́лим:/ испроси́, о́тче, всем ве́лию ми́лость.

Де́монския ко́зни, и стреля́ния, и ловле́ния,/ Боже́ственною покрыва́емь, Моисе́е, дла́нию,/ о́тче, проше́л еси́ невре́дно/ и, безстра́стием украша́емь,/ всем преподо́бным приче́лся еси́./ Моли́ дарова́ти ве́рою чту́щим тя ве́лию ми́лость.

Сла́ва, и ны́не, Богоро́дичен:

Помышле́ния нечи́ста и устны́ льсти́вы,/ дела́ же моя́ вся оскве́рнена,/ и что сотворю́? Ка́ко усря́щу Судию́?/ Влады́чице Де́во,/ моли́ Сы́на Твоего́, и Зижди́теля, и Го́спода,/ я́ко да в покая́нии прии́мет дух мой,/ я́ко еди́н Благоутро́бен.

Крестобогоро́дичен:

Не терплю́, Ча́до, ви́дящи Тя на Дре́ве усну́вша,/ бо́дрость всем подаю́щаго,/ я́ко да и́же дре́вле преступле́ния плодо́м/ сном поги́бельным усну́вшим/ Боже́ственную и спаси́тельную бо́дрость пода́си, –/ Де́ва глаго́лаше, пла́чущися, Ю́же велича́ем.

На стихо́вне Окто́иха.

Сла́ва, и ны́не, Богоро́дичен.

Тропа́рь, глас 1:

Пусты́нный жи́тель, и в телеси́ А́нгел,/ и чудотво́рец яви́лся еси́, Богоно́се о́тче наш Моисе́е:/ посто́м, бде́нием, моли́твою Небе́сная дарова́ния прии́м,/ исцеля́еши неду́жныя и ду́ши ве́рою приходя́щих ти./ Сла́ва Да́вшему тебе́ кре́пость,/ Сла́ва Венча́вшему тя,/ Сла́ва Де́йствующему тобо́ю всем исцеле́ния.

На У́ТРЕНИ

О́ба кано́на Окто́иха и свята́го на 4, глас 8.

Пе́снь 1

Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко Еди́н сла́вно просла́вися.

Грызе́нием грехо́вным помраче́нное се́рдце мое́/ убели́, о́тче, покая́ния ту́чами, моли́твами твои́ми.

Стра́ху Влады́чню пло́ть пригвозди́в,/ вся́ко помышле́ние стра́стное от се́рдца, Богоно́се преблаже́нне, изсуши́л еси́.

В бразда́х мы́сленных скрыв Сло́ва, о́тче, се́мена,/ возде́лал еси́ пшени́цу, в сокро́вищах неистоща́емых соблю́дшему.

Богоро́дичен: Всего́ мя спаса́ет Сло́во Пребоже́ственное бла́гостию,/ восхоте́в из чре́ва Твоего́ воплоти́тися, Чи́стая Ма́ти Де́во.

Пе́снь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Ду́хом дви́жимь, духо́вными, му́дре, дея́нии,/ терпя́, лука́вствия покори́л еси́ ду́хи.

Си́лою укрепля́емь Богонача́льною, Моисе́е преподо́бне,/ кре́пкаго, я́ко безпло́тен, смири́л еси́ зми́я.

Ту́чами слез твои́х, о́гненное опале́ние страсте́й угаси́л еси́/ и река́ яви́лся еси́ дарова́ний, наполня́ема Ду́хом.

Богоро́дичен: Име́я Тя по́мощь, враго́в стремле́ния, Чи́стая, не убою́ся:/ име́я Тя Предста́тельницу, тех побежда́ю полки́.

Седа́лен, глас 3.

Подо́бен: Боже́ственныя ве́ры:

Боже́ственными сия́нии разбогате́в, и тьму́ разруши́л еси́ страсте́й, всеблаже́нне,/ и бо́дрыми моли́твами твои́ми увяди́л еси́ пло́ти возвыша́емая мудрова́ния,/ и к Го́рнему преше́л еси́ кра́йнему гра́ду./ О́тче преподо́бне, Христа́ Бо́га моли́ дарова́ти нам ве́лию ми́лость.

Сла́ва, и ны́не, Богоро́дичен:

Боже́ственнаго естества́ не отлу́чся, пло́ть быв во чре́ве Твое́м,/ но Бог вочелове́чся и пребы́сть,/ И́же по Рождестве́ Ма́терь Тя Де́ву, я́ко пре́жде рождества́, сохрани́в Всенепоро́чну, еди́н Госпо́дь./ Того́ приле́жно моли́ дарова́ти нам ве́лию ми́лость.

Крестобогоро́дичен:

Нескве́рная А́гница Сло́ва, Нетле́нная Де́ва Ма́ти,/ на Кресте́ зря́щи пове́шена из Ней без боле́зни Прозя́бшаго,/ ма́терски подо́бно рыда́ющи, вопия́ше:/ увы́ Мне, Ча́до Мое́, ка́ко стра́ждеши во́лею,/ хотя́ изба́вити от страсте́й безче́стия челове́ка?

Пе́снь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Любопло́тнаго де́мона непреста́нными, о́тче, мольба́ми и боле́зней придая́ньми/ от души́, преблаже́нне, отгна́л еси́.

Преложи́в помышле́ние к су́щим па́че ума́ же и сло́ва, преподо́бне,/ воздержа́ния зной, я́коже Боже́ственную ро́су, терпе́л еси́.

Ве́трилом воскрили́вся нестяжа́ния,/ легко́ преплы́л еси́ жите́йское, о́тче, мо́ре,/ ко приста́нищу ти́хому направля́емь.

Богоро́дичен: Де́вства сосу́де и невмести́маго естества́ селе́ние,/ ду́шу мою́ просвети́ омраче́нную, Богоневе́сто.

Пе́снь 5

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.

У́глем разжига́емь, блаже́нне, безстра́стия,/ ве́щь удобопальную страсте́й попали́л еси́.

Звезда́ воздержа́ния, высота́ми сия́я, яви́лся еси́,/ ду́ши на́ша просвеща́я, пресла́вне.

На высоту́ доброде́телей возше́л еси́/ и во о́стров дости́гл еси́ Небе́сный,/ о́тче Моисе́е досточу́дне.

Богоро́дичен: Де́ву по рождестве́ пое́м Тя, Богоро́дице:/ Ты бо Бо́га Сло́ва пло́тию ми́ру родила́ еси́.

Пе́снь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Но́щию мя грехо́вною и сласте́й омраче́нием окруже́на,/ и́же в тебе́ духо́вными сия́нии всего́ просвети́,/ всего́ ко приста́нищу спасе́ния, о́тче, напра́ви.

Я́коже пчела́ трудолюби́вая, со́том ума́ твоего́ цве́ты доброде́телей собра́в,/ источи́л еси́ сла́дость безсме́ртную,/ го́ресть, о́тче, де́монскую отгоня́щую.

В пусты́нях претерпева́я, Вы́шний град насле́довал еси́,/ пло́ть порабоща́я поще́ньми, чу́дне,/ к пи́щи неоскуде́ваемей и к ра́йским селе́нием отше́л еси́.

Богоро́дичен: Свяще́ние у́мное и неприкоснове́нное очисти́лище,/ свети́льник златови́ден и трапе́зу одушевле́нну, Хлеб носи́вшую жи́зни, Де́во,/ ве́рнии, Тя имену́ем.

Конда́к, глас 4:

Му́рины зауши́в и лица́ де́монов поплева́в,/ мы́сленно просия́л еси́,/ я́коже со́лнце све́тлое,/ све́том жития́ твоего́/ и уче́нием наставля́я ду́ши на́ша.

Пе́снь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су о́гнь преложи́ша, вопию́ще:/ благослове́н еси́, Го́споди Бо́же, во ве́ки.

Ка́ла страсте́й очище́н, духо́вными блиста́яся сия́ньми,/ к Све́ту вои́стинну невеще́ственному преста́вился еси́,/ иде́же ли́цы, блаже́нне, по́стников во ве́ки.

Вся́кия избе́гл еси́ зло́бы,/ присво́ився же до́брым преложе́нием и до́брым жела́нием,/ невеще́ственно примеси́лся еси́, вопия́, блаже́нне:/ Бо́же, благослове́н еси́.

Боле́зньми воздержа́ния безме́рными/ боле́зненный изсуши́л еси́ грех, Богоно́се,/ те́мже безболе́зненное обре́л еси́ благи́х наслажде́ние,/ благословя́ твоего́ Влады́ку.

Богоро́дичен: Се, Ю́же рече́ Де́ву Ду́хом вели́кий Иса́ия,/ во утро́бе Бо́га зача́т и ражда́ет, Ему́же пое́м:/ благослове́н Бог оте́ц на́ших.

Пе́снь 8

Ирмо́с: Седмери́цею пе́щь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сии́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Моли́твами вжиля́емь, смире́нием возвыша́емь, пра́вдою ду́шу облиста́я,/ любо́вию украша́емь, к доброде́телей соверше́нию,/ к явле́нней, о́тче, восте́кл еси́ высоте́, зовы́й Влады́це:/ свяще́нницы, благослови́те, лю́дие, превозноси́те во вся ве́ки.

Черн сый те́лом, ду́шу же светле́йшу со́лнечных сия́ний стяжа́в,/ де́монов очерни́ омраче́нная ли́ца,/ ве́рных же просвеща́ет сердца́ свои́м подо́бием, те́пле пою́щих:/ лю́дие, превозноси́те Христа́ во ве́ки.

Смире́нием всю́ду огражде́н,/ убежа́л еси́, о́тче, ефио́пов мы́сленных стреля́ния,/ о́браз же был еси́ мона́хом к боре́нию враго́в, де́лы же и словесы́, с ни́ми взыва́я:/ , свяще́нницы, воспо́йте,/ лю́дие, превозноси́те во вся ве́ки.

Богоро́дичен: Па́че естества́ зача́ла еси́,/ па́че сло́ва родила́ еси́ Соде́теля челове́ческаго естества́,/ бы́вша Челове́ка, Отцу́ неразлу́чна, Влады́чице Чи́стая,/ Ему́же пое́т вся тва́рь:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Пе́снь 9

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.

В де́лех вои́стинну благи́х жи́знь сконча́в,/ пости́гл еси́ благи́х исто́чник и твоего́ жела́ния коне́ц прия́л еси́,/ пра́зднующих же иде́же глас с хвале́нием, ра́дуяся, всели́лся еси́,/ досточу́дне Моисе́е, о́тче преподо́бне.

Иска́пают, о́тче, сла́дость по́льзы по́тове боле́зней твои́х/ и го́ресть на́шу стра́стную отго́нят,/ источа́ют нам исцеле́ния мо́щи,/ и гное́ния зол и душ скве́рну очища́ют.

Венцы́ венча́ Христо́с неувяда́ющими твою́ главу́, чу́дне,/ победи́вша тве́рдо полки́ мироде́ржца,/ и преподо́бных ли́ком преподо́бно приче́лся еси́,/ с ни́миже моли́ся изба́витися напа́стей чту́щим тя.

Богоро́дичен: Уста́вила еси́ еди́на в жена́х кля́тву первозда́нных, Богоневе́сто,/ Неопи́саннаго пло́тию ро́ждши опису́ема,/ обнови́ла еси́ зако́ны естества́, Нескве́рная,/ разстоя́щая пе́рвее, пресла́вным хода́тайством Твои́м соединила еси́.

ВЕ́ЧЕР

Блаже́н муж: 1-й антифо́н. На Го́споди, воззва́х: стихи́ры, глас 8.

Подо́бен: О, пресла́внаго чудесе́:

Небе́снаго Царя́ воево́да, Феодо́сий Богому́дрый,/ полк во́инов духо́вных, преподо́бных оте́ц, собра́,/ и́хже по́двиги ублажа́юще,/ пе́сненныя похвалы́ им принесе́м и возопии́м, глаго́люще:/ я́ко иму́щим дерзнове́ние ко Влады́це всех и Бо́гу,/ проси́те душа́м на́шим ве́лия ми́лости/ и ми́ру всему́ умире́ния.

Ви́дение у́мным очесе́м зри́тся чуде́сно:/ пламеноно́снеи криле́ иму́ще, во́ини духо́внии,/ от Небе́с прихо́дят отцы́ всеблаже́ннии/ и в по́мощь на́шу ускоря́ют, на мироде́ржца ополча́ющеся./ К ни́мже припаде́м, зову́ще:/ вас призыва́ем, неусы́пнии засту́пницы на́ши,/ потщи́теся изба́вити нас от находя́щих враго́в на́ших/ и да́ти нам от скорбе́й избавле́ние.

Разруши́ нападе́ния вра́жия, преподо́бне о́тче наш Феодо́сие,/ ста́до твое́ огражда́я во́и Небе́сными,/ при́сно бо сове́туют нахожде́нии злы́ми разори́ти е,/ но ты, я́ко скор сый в по́мощь,/ да́ждь заступле́ние к тебе́ притека́ющим/ и прося́щим твоего́ избавле́ния/ и не отщети́ в печа́лех посеще́ния.

Сла́ва, глас то́йже:

Престо́лу Трисо́лнечнаго Божества́ предстоя́щий/ и бога́тно осиява́ет ми непристу́пными све́тлостьми,/ отцы́ на́ши всеблаже́ннии,/ и́же на земли́ любе́зно предстоя́щих/ и собо́р ваш дне́сь гла́сы воспева́ющих/ страсте́й и бед свободи́те,/ я́ко при́снии к Бо́гу хода́таи/ и моли́твенницы о душа́х на́ших.

И ны́не, Богоро́дичен: Ца́рь Небе́сный:

Вход. Проки́мен дне. И чте́ния три преподо́бническая (зри день сей ни́же).

На стихо́вне стихи́ры, глас 2.

Подо́бен: До́ме Евфра́фов:

Богоизбра́ннии де́лателие,/ преподо́бнии отцы́ на́ши Пече́рстии,/ мы́сленный доброде́телей на земли́ виногра́д насади́сте,/ от него́же возрасте́ вам/ досто́йный плод ве́чнаго живота́.

Стих: Восхва́лятся преподо́бнии во сла́ве/ и возра́дуются на ло́жах свои́х.

Посе́ясте в горе́ сле́зы,/ да плод дово́льный,/ ра́дость во дво́рех Госпо́дних, процвете́т;/ ея́же вы наслажда́ющеся во ве́ки,/ моли́теся за ны ко Го́споду.

Стих: Блаже́ни вси боя́щиися Го́спода,/ ходя́щий в путе́х его́.

Молв жите́йских изба́витися жела́юще,/ всели́стеся в пеще́ру,/ иде́же трудолю́бие пожи́вше,/ в ве́чный поко́й внидо́сте;/ моли́теся та́мо за ны Влады́це Христу́.

Сла́ва, глас 1:

Волнобу́рныя молвы́ жития́ избе́гше,/ ко оти́шию же пеще́ры святы́я дости́гше/ и та́мо трудолю́бие Го́сподеви угоди́вше,/ ны́не Вы́шняго Сио́на есте́ гра́ждане,/ и, Ца́рствия Бо́жия су́ще сы́нове,/ моли́теся, отцы́ Богоно́снии,/ прича́стие сла́вы ва́шея улучи́ти/ при́сно собо́р ваш любо́вию почита́ющим.

И ны́не, Богоро́дичен: Небе́сных чино́в ра́дование: (зри 2-е приложе́ние).

Тропа́рь, глас 4:

Мы́сленное со́лнце и све́тлую луну́,/ первонача́льных Пече́рских,/ со всем собо́ром преподо́бных дне́сь почти́м,/ ти́и бо, церко́вную тве́рдь озаря́юще,/ просвеща́ют во тьме́ страсте́й бе́дствующих,/ и подаю́т от Христа́ Бо́га моли́твами свои́ми по́мощь во всех ско́рбех,/ и душа́м на́шим про́сят избавле́ния.

Сла́ва, и ны́не, Богоро́дичен: Е́же от ве́ка утае́ное:

НА У́ТРЕНИ

На Бог Госпо́дь: тропа́рь преподо́бных два́жды. Сла́ва, и ны́не, Богоро́дичен.

По 1-м стихосло́вии седа́лен, глас 4.

Подо́бен: Яви́лся еси́:

Мно́гими скорбьми́ пу́ть жи́зни сея́ преидо́сте и, дости́гше кра́я у́мнаго жела́ния,/ в Черто́г Боже́ственный сла́вы всели́стеся;/ и ны́не, ра́дующеся со всех Царе́м и Бо́гом,/ моли́теся, я́ко да и мы ва́шего весе́лия прича́стницы бу́дем,/ ваш собо́р почита́ющим, отцы́ всеблаже́ннии.

Сла́ва, и ны́не, Богоро́дичен:

Обра́дованная, хода́тайствуй Твои́ми моли́твами/ и испроси́ душа́м на́шим мно́жество щедро́т и очище́ние прегреше́ний,/ всем пою́щим Тя, Чи́стую Ма́терь и Де́ву.

По 2-м стихосло́вии седа́лен, глас 3:

Брак А́гнчий в Черто́зе Небе́снем услы́шавше,/ и зва́нию Царя́ Вы́шняго ко всем бы́вшу,/ вся мирска́я пристра́стия оста́висте, отцы́ Богоно́снии,/ и, сле́зными струя́ми ри́зы своя́ испра́вивше, чи́сти внидо́сте в трапе́зу Христа́ Бо́га;/ но, пре́жде да́же не затворя́тся две́ри того́ вхо́да,/ моли́теся, я́ко да и мы, покая́нием вше́дше, вам прича́стницы бу́дем.

Сла́ва, и ны́не, Богоро́дичен:

Черто́г, присносу́щною сла́вою укра́шен, ви́дяще вы́ну,/ жела́ние и́мамы совни́ти в о́нь,/ но, оде́жды не иму́ще, стыди́мся,/ да не свя́зани от А́нгел и изве́ржени бу́дем./ Ты, су́щи оде́жда наги́х дерзнове́ния, Де́во Мари́е, украси́ ны/ и введи́ вну́трь Ца́рствия Христо́ва.

Велича́ние:

Велича́ем вас,/ преподо́бнии отцы́ на́ши Пече́рстии,/ и чтим святу́ю па́мять ва́шу,/ вы бо моли́те о нас/ Христа́, Бо́га на́шего.

Стих 1: Ра́дуйтеся, пра́веднии, о Го́споде, пра́вым подоба́ет похвала́. 

Стих 2: Се́ющии слеза́ми ра́достию по́жнут. 

Стих 3: Восхва́лятся преподо́бнии во сла́ве и возра́дуются на ло́жах свои́х. 

Стих 4: Весели́теся о Го́споде и ра́дуйтеся, пра́веднии, и хвали́теся, вси пра́вии се́рдцем.

По полиеле́и седа́лен, глас 8.

Подо́бен: Прему́дрости:

Зва́нию Го́спода своего́ после́дующе,/ крест, а́ки жезл, в ру́це восприе́мше, не убоя́стеся стра́ха, предстоя́щаго во тьме́,/ но упова́нием преидо́сте к безбе́дному приста́нищу/ и, по́двигов свои́х обре́тше воздая́ние, весели́теся во Све́те непристу́пнем;/ те́мже вас почита́ем, отцы́ всеблаже́ннии,/ я́ко при́сно моля́щих Христа́ Бо́га согреше́ний оставле́ние дарова́ти/ пра́зднующим любо́вию святу́ю па́мять ва́шу.

Сла́ва, и ны́не, Богоро́дичен:

Я́ко еди́ну в жена́х Благослове́нную и де́вам похвалу́ и украше́ние,/ в бране́х непребори́мую по́мощь, немощны́м утвержде́ние/ и ско́рое посеще́ние в печа́ли су́щим иму́ще Тя, Богоневе́стная Де́во,/ дне́сь в пречестне́м Твое́м хра́ме припа́даем и мольбы́ на́ша к Тебе́ прино́сим,/ я́ко да мо́лиши Христа́ Бо́га согреше́ний оставле́ние дарова́ти/ благоче́стно покланя́ющимся Пресвято́му Рождеству́ Твоему́.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 8: Престо́лу Трисо́лнечнаго Божества́: (зри сла́вник на Го́споди, воззва́х:)

Кано́н Богоро́дицы со ирмосо́м на 6, и преподо́бных на 8, глас 8.

Пе́снь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/Изба́вителю и Бо́гу на́шему пои́м.

Во́ду преходи́ти пе́сненных слове́с в па́мять ва́шу, Богоно́снии отцы́, хотя́ща мя,/ в тишине́ у́мней всегда́ испра́вите/ и от бу́рных страсте́й удержи́те,/ да в ва́шем хвале́нии с пе́снию возвели́чу И́мя Бо́га моего́.

Изше́д на зла́чное по́ле мы́сленнаго рая́ пеще́ры святы́я,/ услажда́юся благово́нными арома́ты, я́же источа́ют мо́щи ва́ша, преподо́бнии отцы́,/ и ве́село Созда́телю Бо́гу пе́снь умо́м возсыла́ю.

Вертогра́д заключе́н ты еси́, пеще́ро свята́я,/ в тебе́ бо Сади́тель Вы́шний насади́ мно́жество древе́с,/ богоно́сных оте́ц, а́ки ке́дров лива́нских, и́же досяго́ша Небе́с высото́ю,/ и́мже удивля́лся, пою́ пе́снь Бо́гу моему́.

Стра́жу неусы́пне, Лонгине вра́тарю,/ дар име́вый прозира́ти мы́сли входя́щих,/ обреты́й по́чести Вы́шняго зва́ния,/ вни́ди и обыми́ хвалы́ богоно́сных оте́ц,/ в и́хже па́мяти пе́снь Бо́гу на́шему пое́м.

Игна́тие, па́стырю и́ночествующих и цели́телю боля́щих,/ в неду́зех на́ших посо́бствуй тя почита́ющим,/ да в па́мяти твое́й пе́снь хвалы́ Бо́гу на́шему принесе́м.

Силуа́не преподо́бне, чистоты́ рачи́телю и храни́телю садо́вий,/ та́тей чу́вственных и мы́сленных, плоды́ обоя́ окрасти́ хотя́щих, моли́твою связа́вый,/ от тех нападе́ний и нас спаси́, мо́лимся.

Богоро́дичен: Мно́гими та́ти обстои́мь, не чу́вствую всегда́,/ и окрада́ют ми врази́ покая́ния плоды́,/ но бо́дренною Твое́ю моли́твою и неисче́тною благосты́нею, Ма́ти Бо́жия,/ изба́ви мя, молю́ся.

Пе́снь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Небе́снаго и земна́го кру́га Созда́тель созда́ ме́сто сие́/ и вас, до́брыя гра́жданы, в нем поста́ви, треблаже́ннии отцы́,/ причти́те нас в сожи́тие ва́ше нетле́нное/ и жела́емаго кра́я ми́лости дости́гнути моли́теся, мо́лим вас.

Агафо́не блаже́нне, бла́гости веща́ния имени́те,/ по́стником красото́, проро́че нело́жный и цели́телю неду́жных,/ скажи́ нам, нечу́вственным, а́ще пу́ть беззако́ния е́сть в нас,/ и ты наста́ви ны моли́твами твои́ми на пу́ть ве́чен.

Пое́м ди́внаго Зинона, сия́ющаго посто́м,/ и Мака́рия, блаже́нству тезоимени́та,/ сих двои́х ра́ди отце́в, мо́лимтися, Влады́ко,/ изми́ нас душе́вных и теле́сных страсте́й, Еди́не Человеколю́бче.

Сла́вим Ахи́лу, служи́теля же́ртвы,/ и я́ко и́стиннаго по́стника приво́дим Ти, Христе́, в моли́тву,/ его́же ра́ди изми́ нас от порабоще́ния чре́вных страсте́й/ и воздержа́нию того́ научи́ ны, Еди́не Человеколю́бче.

Ипа́тие, служи́телю немощны́м,/ я́ко име́яй дар больны́х цели́ти возложе́нием руку́, тя мо́лим,/ посети́ свы́ше нас, душе́вными неду́ги обдержи́мых,/ и спаси́ моли́твами твои́ми.

Я́ко в житии́ сем любве́ свя́зани сою́зом,/ по сме́рти же в еди́нем гро́бе су́ще положе́ни,/ та́ко и в нетле́нней жи́зни ны́не вку́пе живу́ще, Паи́сие и Мерку́рие,/ хода́тайством ва́шим к Бо́гу в единомы́слии и любви́ утверди́те ны, мо́лимся.

Лавре́нтие, по́стником свети́ло, и Моисе́е крестоно́сне,/ в тьме́ страсте́й нас су́щих и ходя́щих освети́те и моли́твами ва́шими наста́вите,/ да и мы в крестоноше́нии на́шем не преткне́м о ка́мень собла́зна ног на́ших.

Богоро́дичен: Тьма́ страсте́й объя́т ны,/ и в пути́ сласте́й уклони́хомся непрохо́дны,/ све́та и справле́ния не ви́дим./ Наста́внице, наста́ви нас и свет покая́ния возсия́й нам,/ Ты бо еси́ всем многосве́тлое свети́ло, просвеща́ющее ду́ши на́ша.

Седа́лен, глас 2:

Поще́нием просия́вших и све́тлыми по́двиги/ преподо́бных оте́ц Пече́рских чи́стое житие́ и труды́ кто восхвали́ти мо́щен?/ Оба́че от любве́, я́же к ним, пе́сненныя да́ры прино́сим,/ ти́и бо, со А́нгелы предстоя́ще, при́сно мо́лятся Го́сподеви о всех нас.

Сла́ва, и ны́не, Богоро́дичен:

Милосе́рдия су́щи исто́чник, ми́лости сподо́би нас, Богоро́дице,/ при́зри на лю́ди согреши́вшия,/ яви́, я́ко при́сно, си́лу Твою́,/ на Тя бо упова́юще: ра́дуйся, – вопие́м Ти,/ я́коже иногда́ Гаврии́л, безпло́тных Архистрати́г.

Пе́снь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Дре́вних оте́ц стопа́м после́дующе,/ не уклони́стеся ни ма́ло от их трудо́в,/ те́мже ра́вный дина́рь ве́чныя жи́зни от Христа́ прие́мше,/ со А́нгелы сла́вит е преве́чное Того́ Божество́.

Илларио́н ди́вный, вели́каго о́браза чин име́вый/ и, по чи́ну своему́ ревну́я житию́ преподо́бнаго Феодо́сия,/ еди́ною всегда́ в седми́це яды́й, кре́пок бе во славосло́вии пе́ти:/ Сла́ва си́ле Твое́й, Го́споди.

По́стническое стече́ся во́инство,/ в не́мже просия́ све́тлая звезда́, Диони́сий,/ и́же ны́не сия́ет во сла́ве святы́х и сла́вит Еди́но Божество́.

Трудолю́бцем о́браз изве́стный, Арсе́ний, му́жеству тезоимени́тый,/ в труде́х де́нь и но́щь живы́й,/ прия́т возме́здие, дар чудотворе́ния,/ от него́же подае́т тре́бующим всем неоску́дно.

Пи́мене, по́стником единонра́вне,/ кровопо́тными труды́ труди́выйся в послуша́нии вы́ну,/ дрова́ нося́, в же́рновех меля́,/ на вся́ку же но́щь непреста́нно поя́ Бо́га и Того́ Еди́но Божество́.

Сто́лпе непоколеби́ме, Афана́сие затво́рниче,/ водруже́н сый в затво́ре, не тре́бовал еси́ све́тлости чу́вственныя,/ поне́же тебе́ мы́сленная светя́ше,/ то́ю моли́, блаже́нне, просвети́тися тя почита́ющим.

Тро́ичен: Сла́ва Тебе́, Тро́ице Пресвята́я,/ я́ко просла́вила еси́ ме́сто земно́е, Небе́сному гра́жданы подо́бное,/ в и́хже па́мяти приноси́мым от нас пе́нием/ Тя, О́тче, и Сы́не, и Ду́ше Святы́й, с раболепным поклоне́нием, гре́шнии, сла́вим/ и Твое́ Еди́но Божество́ превозно́сим.

Богоро́дичен: Сла́ва Тебе́, правосла́вных сла́во, Чи́стая,/ Тя бо сла́вит со А́нгелы род челове́ческий и, припа́дая, вопие́т:/ Сла́ва бо Твоя́, Богоро́дице, всем простре́ся во спасе́ние.

Пе́снь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.

Просвети́ша всю Русскую зе́млю да́нною им благода́тию отцы́ всеблаже́ннии,/ и тьма́ уже́ злове́рия вконе́ц поги́бе./ Ты́я лучи́ простри́ на ны моле́ния их ра́ди,/ мо́лимтися, Еди́не Человеколю́бче.

Сисо́е чу́дне и Григо́рие, и́мя от бо́дрости име́вый,/ о́ба посто́м обуздавший своя́ стра́сти,/ свире́пеющую по́хоть и на́шея пло́ти смири́те,/ вам бо дана́ е́сть благода́ть в страсте́х нам посо́бствовати.

Воздержа́ния рачи́телю, Па́вле блаже́нне, со двема́ канона́рхома,/ простри́те о нас мольбы́ ко Влады́це,/ да Того́ благода́тию от чре́вняго несы́тства уде́ржимся/ и вам в воздержа́нии насле́дницы бу́дем.

Сло́во Бо́жие, вразумля́ющее челове́ки,/ не кни́жныя му́дрости научи́ тя, Не́сторе свя́те, но Вы́шния,/ е́юже зрел еси́ при моли́твах А́нгелы и кончи́ну свою́ предви́дел еси́./ Той и нас прича́стники сотвори́, мо́лим тя,/ па́мять твою́ почита́юще.

Ти́те всему́жественне, во́инствующу ти иногда́,/ поби́ша сопроти́внии ору́жием главу́ твою́,/ и бы́сть я́зва вино́ю, я́ко прише́л еси́ в Пече́рскую го́ру/ и та́мо пла́кал еси́ о гресе́х свои́х,/ о и́хже проще́нии извеще́ние прие́м,/ ра́достно отше́л еси́ к Го́рним селе́нием Небе́сным, преподо́бне.

Па́мву послушли́ваго почита́ти дерза́ю и удивля́юся:/ той бо в послуша́нии от неве́рных и ве́ры ра́ди во у́зах претерпе́ мно́го,/ оба́че, от А́нгел восхище́н и пренесе́н, в ке́ллии свое́й обре́теся,/ и сбы́стся на нем, я́ко послуша́ние от сме́рти избавля́ет.

Тро́ичен: Впадо́х в ру́ки враго́в мы́сленных/ и око́ван е́смь от них тя́жкими пу́ты, от ни́хже брат не изба́вит./ Ты, Тро́ице Пресвята́я, я́ко Ми́лостивая, созда́ние Твое́ поми́луй/ и бла́гостию Твое́ю от уз сме́ртных свободи́.

Богоро́дичен: Свя́зан е́смь мно́гими плени́цами страсте́й,/ и не́сть ми разреше́ния наде́жды,/ но Ты поми́луй мя, я́ко Ма́ти Бо́га Вы́шняго,/ и разреши́ мя от них,/ Ты бо Еди́на си́льна еси́ по Бо́зе грехо́вныя плени́цы разреши́ти.

Пе́снь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися,/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Моли́твы на́ша прино́сим вам, о Богоно́снии отцы́,/ вы бо есте́ моли́твенницы о нас к Бо́гу и хода́таи,/ хода́тайством у́бо ва́шим от тли грехо́вныя изба́вите/ честны́й ваш собо́р почита́ющих.

Неусы́пне серде́чное виде́ние иму́ще к Бо́гу,/ бы́сте незло́бивии, а́ки младе́нцы,/ но яро о́ко име́ете на бе́сы, я́ко и и́мене ва́шего им трепета́ти./ Мо́лим вас, моли́теся,/ да и от нас нападе́ния вра́жия со студо́м возвратя́тся.

Заха́рие, па́мяти Госпо́дней тезоимени́те,/ по и́мени твоему́ и житие́ стяжа́вый,/ та́ко бо на враги́ посто́м му́жески вооружи́влся еси́,/ я́ко во всем житии́ твое́м зе́лием пита́яся, дово́лен был еси́,/ тем и́мене твоего́ боя́хуся бе́си;/ от сих у́бо злоде́йства избавля́я, ускори́ на по́мощь на́шу,/ смире́нно мо́лимтися.

Фео́доре блаже́нне,/ сла́ву благоро́дства своего́ в пе́рсть всели́вый,/ измени́в княже́ние на и́ноческий о́браз,/ в не́мже Влады́це своему́ до́бре угоди́вый/ и ны́не со А́нгелы в Небе́сных живы́й,/ моли́ся о нас, да сла́вы неги́бнущия прича́стницы бу́дем.

Софро́ние преподо́бне, в те́мнем ме́сте себе́ затвори́вый,/ непреста́нно во псалме́х пел еси́ Бо́гу;/ и ны́не в простра́нней селе́нии Го́рнем наслажда́лся а́нгельских пе́ний,/ моли́ся, да и мы та́я слы́шати сподо́бимся.

В преподо́бии и пра́вде свяще́нствуя Вы́шнему, Панкра́тие чу́дне,/ чудотво́рными да́ры обогати́вся,/ от сих подава́л еси́ неоску́дно тре́бующим;/ пода́ждь у́бо сия́ и нам, в боле́знех к тебе́ усе́рдно приходя́щим.

Тро́ичен: Сла́вы ра́ди И́мене Твоего́, Пресу́щественная Тро́ице,/ просла́вила еси́ пра́ведных Твои́х и ме́сто сие́;/ бла́гостию у́бо Твое́ю пода́ждь и нам, Бла́же, сла́ву святы́х во сла́ве Твое́й зре́ти/ и с ни́ми Тебе́ сла́вит и, в трие́х Ипоста́сех Еди́наго Бо́га.

Богоро́дичен: И́же Тя не просла́вит, Пресвята́я Де́во,/ той да не ви́дит сла́вы жи́зни ве́чныя;/ нам же да́ждь ви́дети ту́ю,/ и́бо зна́ем Тя, сла́виму от всех сил Небе́сных, и сие́ прино́сим Ти:/ ра́дуйся, ве́рным изве́стная похвало́.

Конда́к, глас 8:

Избра́ннии от родо́в уго́дницы Бо́жии,/ святи́и преподо́бнии Пече́рстии,/ на сих гора́х доброде́тельми просия́вшим,/ вас земля́ не потаи́ла е́сть,/ но Не́бо отве́рзеся вам и ра́йское селе́ние./ Те́мже мы похва́льныя пе́сни Бо́гу, просла́вльшему вас,/ в па́мяти ва́шей прино́сим;/ вы же, я́ко иму́щии дерзнове́ние,/ ваш собо́р почита́ющих от всех бед моли́твами ва́шими заступа́йте,/ я́ко засту́пницы на́ши и к Бо́гу хода́таи.

И́кос:

Восхвали́ти по еди́ному кто возмо́жет святы́я Твоя́, Бла́же:/ изочту́ их, и па́че песка́ умно́жатся,/ но Сам, Влады́ко Христе́, исчита́яй мно́жество звезд и всем имена́ нарица́яй,/ приими́ всех их мольбы́ о нас и яви́ щедро́ты Твоя́ на лю́дех Твои́х;/ ве́мы бо, я́ко мно́го и́мут дерзнове́ние к вели́честву Твоему́ и хода́тайствуют к Тебе́,/ я́ко при́сно моли́твенницы о душа́х на́ших.

Пе́снь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

Ту́чная еси́ и усыре́нная, Пече́рская горо́,/ в твои́х бо гра́жданех изво́ли Вы́шний селе́ние Свое́ полжи́ти,/ те́мже и мы с ни́ми пое́м:/ оте́ц на́ших Бо́же, благослове́н еси́.

Сми́рны испо́лнена и хо́лму Лива́нскому подо́бна еси́, Пече́рская горо́,/ ка́плющая ми́ры Богоно́сных оте́ц на исцеле́ние боле́зней тлетво́рных,/ и́хже мы благоуха́ние прие́млюще, пое́м:/ оте́ц на́ших Бо́же, благослове́н еси́.

Аммо́не и Марда́рие, подви́жный супру́г⁴⁵,/ бы́вше нищеты́ рачи́телие,/ ны́не же бога́тство неги́блющее стяжа́вшии,/ моли́теся и нам то́ежде стяжа́ти в Вы́шних, иде́же пою́т:/ Бо́же, благослове́н еси́.

Пое́м Ру́фа, по́стником и трудолюбцем зерца́ло, с Вениами́ном Блаже́нным,/ и́же все свое́ име́ние отдаде́ ни́щим,/ да еди́н би́сер Христа́ стя́жет,/ Ему́же ревни́телие да бу́дем, пою́ще:/ Бо́же, благослове́н еси́.

Фео́филе, иера́рхом удобре́ние, Нова́града престо́л содержа́вый/ и Сама́го Го́спода ви́девый,/ умоли́ Того́ бла́гость, да и мы Лице́ его́ у́зрим с тобо́ю и воспое́м:/ оте́ц на́ших Бо́же, благослове́н еси́.

В диа́конех свети́ло и в трудолю́бцех о́бразе, Марти́рие, чистоты́ рачи́телю,/ дар име́вый прогоня́ти от челове́к лука́выя ду́хи и не́мощи цели́ти,/ ду́ха зло́бы и вся́кия ле́сти отжени́ от нас, да чи́сто воспое́м:/ Бо́же, благослове́н еси́.

Тро́ичен: Прославля́ющия святы́х Твои́х просла́ви, Преблага́я Тро́ице, сла́вою,/ ю́же угото́вала еси́ от ве́ка рабо́м Твои́м, и сподо́би пе́ти:/ оте́ц на́ших Бо́же, благослове́н еси́.

Богоро́дичен: Прера́дованная Ма́ти и Цари́це,/ ра́достная Тебе́ принося́щих ра́дости ве́чныя сподо́би/ и отве́рзи ра́йския две́ри христиа́нскому всему́ ро́ду, при́сно Тебе́ пою́щему:/ Богоро́дице, благослове́нна еси́.

Пе́снь 8

Ирмо́с: Царя́ Небе́снаго,/ Его́же пою́т во́и а́нгельстии,/ хвали́те и превозноси́те во вся ве́ки.

Цари́цы Небе́сныя селе́ние еси́, Святопече́рская горо́,/ ю́же си́льных мно́жество преподо́бных оте́ц окружа́ют,/ вси ору́жия изощре́нна иму́ще, моли́твы проти́ву мироде́ржца, пою́т пе́снь Бо́гу:/ пое́м и превозно́сим его́ во ве́ки.

Восто́к и за́пад, юг и се́вер/ ви́дит во огра́де твое́й, Пече́рская горо́, исто́чник,/ кипя́щий ми́ры чуде́с Богоно́сных оте́ц, излива́ющийся всем изоби́льно,/ и́же пою́т и превозно́сят Го́спода во ве́ки.

Ко́е хвале́ние вам принесе́м, о Богоно́снии отцы́,/ ка́ко испове́мы труды́ и по́двиги ва́ша тупогру́бым язы́ком, не ве́мы./ Но ты, свя́те Евфи́мие молчали́ве, научи́ ны,/ да с тобо́ю пое́м Го́спода во ве́ки.

По́стником и трудолюбцем сия́ние, Кассиа́не и Пио́ре блаже́нне,/ о́ба светя́щийся житие́м, а́ки небе́сная свети́ла,/ све́тлостию благода́ти, да́нныя вам, озари́те ны,/ да сподо́бимся с ва́ми пе́ти Го́спода во вся ве́ки.

Пла́чущих помина́я блаже́нство, Пафну́тие преподо́бне, всегда́ пла́кал еси́,/ ны́не же ра́достная насле́див ме́ста,/ моли́ся та́мо и нам во кров безплаче́вный всели́тися,/ да с тобо́ю превозно́сим Го́спода во ве́ки.

Со Ио́сифом чу́дным ва́шу, вси святи́и, па́мять почита́ем,/ посто́м и труды́ до́бре Бо́гу угоди́вшии, и мо́лим,/ да от всех бед заступле́ние ва́ми обря́щем/ и сподо́бимся Го́спода превозноси́ти во ве́ки.

Во огра́де пеще́ры святы́я проходя́ще умо́м,/ зрим на тве́рди ея́ мно́жество, а́ки звезд, оте́ц преподо́бных,/ и́хже исчи́слити невозмо́жно./ Тем о всех возда́вше хвалу́ Бо́гу, мо́лим,/ да даст нам с ни́ми превозноси́ти его́ во ве́ки.

Богоро́дичен: Гони́м сый зми́ем миролюбным,/ к Твое́й огра́де прибего́х, Чи́стая:/ кро́вом у́бо ми́лости Твое́й защити́ мя и того́ зубо́в изба́ви,/ я́ко да спасе́н, превозношу Тя, Ма́терь Бо́жию, во ве́ки.

Пе́снь 9

Ирмо́с: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,/ с безпло́тными ли́ки Тя велича́юще.

Вои́стинну пре́жде юдо́ль бе плаче́вная и верте́п разбо́йником гора́ сия́ Свята́я,/ ны́не же дом Бо́жий е́сть,/ и живу́щии в нем блаже́нни, я́ко ва́ми освяти́ся, Богоно́снии отцы́:/ сего́ ра́ди всех вас велича́ем.

Глас ра́дования и шум празднолю́бных стека́ется восхвали́ти собо́р ваш, отцы́ Пече́рстии;/ тех у́бо хвале́ния прие́мше,/ от всех скорбе́й и печа́лей спаса́йте,/ да всегда́ вас велича́ем.

Ра́достною душе́ю взе́мше кре́стное и́го/ и ра́лом трудо́в го́ру сию́ возде́лавше,/ насади́сте сады́ по́тов ва́ших, Богоно́снии отцы́, мы́сленных,/ и́хже плоды́ объе́мше, увеселя́ем ду́ши на́ша и всех вас велича́ем.

Во еди́н пу́ть за́поведей Госпо́дних ходя́ще, разли́чная се́мена се́ясте,/ ов чистоту́, ов послуша́ние, ин пост,/ други́й нищету́, труды́ и сле́зы./ Оба́че вси ра́вно ра́дости рукоя́ти пожинаете,/ от ни́хже и нам да́рствуйте, да вы́ну вас всех велича́ем.

Госпо́дь пасе́т вас ны́не на ме́сте зла́чне, преблаже́ннии отцы́,/ и ко́е уже́ вас лиша́ет бла́го?/ Пото́к бо сла́дости вас напая́ет,/ от него́же поне́ каплею еди́ною жития́ на́шего го́ресть, мо́лимся, услади́те,/ да ра́достно Бо́гу на́шему воспое́м.

От ме́ста плаче́внаго на безплаче́вное преше́дших, мо́лим вас, отцы́ преблаже́ннии,/ нас, па́мять ва́шу вку́пе почита́ющих, вся́кия ско́рби избавля́йте,/ да вси вас велича́ем.

Тро́ичен: Сла́ва Ты еси́, Тро́ице, преподо́бных оте́ц ли́ку, и неги́блющее весе́лие,/ о Тебе́ бо мир и пло́ть с неви́димым враго́м победи́вше, прия́ша венцы́/ и ра́дуются со А́нгелы, Тя всегда́ велича́юще.

Богоро́дичен: Сла́вим Тя, пресла́вный гра́де Бо́жий,/ Тебе́ бо Сам основа́ Вы́шний/ и даде́ в прибе́жище всем от лица́ вра́жия бежа́щим./ И нам бу́ди в приста́нище, да Тя вы́ну велича́ем.

Свети́лен:

Ца́рское свяще́ние, ро́де избра́нный,/ иера́рси святи́и, свяще́нницы, мона́си, де́вственницы, чудотво́рцы/ и все по́стническое сосло́вие преподо́бных оте́ц Пече́рских,/ собери́теся дне́сь на моли́тву,/ да вас ра́ди Ца́рь сла́вы спасе́т правосла́вныя лю́ди,/ благоче́стно собо́р ваш почита́ющих.

Сла́ва, и ны́не, Богоро́дичен:

Святы́х Святе́йшую Тя сла́вим, Чи́стая Де́во,/ и велича́ем от Тебе́ рожде́нное Сло́во,/ Ты же приими́ и от нас славосло́вие сие́, и да́ждь сла́вити и Тя,/ иде́же вси святи́и Ма́терь Тя Бо́жию сла́вят.

На хвали́тех стихи́ры, глас 4.

Подо́бен: Дал еси́ зна́мение:

Плотско́е мудрова́ние,/ покоре́нием ума́ плени́сте в послуша́ние Христо́во,/ отцы́ преблаже́ннии,/ и, стра́стное мо́ре преплы́вше,/ достиго́сте кра́йняго жела́ния,/ тем дарова́ вам по́чести зва́ния Вы́шняго/ Иису́с Человеколю́бец/ и Спас душ на́ших.

Угаси́сте пе́щь мирски́х пристра́стий/ и самохо́тныя молвы́,/ сле́зными пото́ки и коне́чною нището́ю,/ отцы́ преподо́бнии,/ и, я́ко в черто́зе све́тле,/ в те́мных пребы́сте пеще́рах,/ а́нгельски славосло́вяще Иису́са Человеколю́бца/ и Спа́са душ на́ших.

От бре́нныя страсте́й глубины́,/ скорбе́й и попече́ний жите́йских/ ум очи́стивше, отцы́ Богоно́снии,/ упова́нием бу́дущия жи́зни вся тле́нная презре́сте./ И ны́не, в нетле́нней жи́зни су́ще,/ моли́те за ны Иису́са Человеколю́бца/ и Спа́са душ на́ших.

Сла́ва, глас 6:

Блаже́нства непоро́чных вожделе́вше,/ в пу́ть за́поведей Госпо́дних теко́сте/ и, свиде́ния во́ли Бо́жией взыску́юще,/ в го́ры, в верте́пы и в те́мныя пеще́ры всели́стеся,/ мир с похотьми́ распя́сте/ и, бесо́вския полки́ победи́вше,/ ны́не жи́знь и сла́ву безконе́чную насле́дисте./ Моли́теся за ны, мо́лим вас, отцы́ преподо́бнии,/ улучи́ти прича́стие с ва́ми Вы́шняго Иерусали́ма/ и спасе́ние душа́м на́шим.

И ны́не, Богоро́дичен, глас то́йже:

Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы и со все́ми святы́ми/ спасти́ся душа́м на́шим.

Славосло́вие вели́кое. Ектении́. И отпу́ст.

НА ЛИТУРГИ́И

Блаже́нны от кано́на, пе́сни 3-я и 6-я.

Проки́мен, глас 7: Честна́ пред Го́сподем/ сме́рть преподо́бных его́. Стих: Что возда́м Го́сподеви о всех, я́же воздаде́ ми? 

Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех его́ восхо́щет зело́. Стих: Си́льно на земли́ бу́дет се́мя его́. 

Ева́нгелие от Матфе́я, зача́ло 43, или́ от Луки́, зача́ло 24. Прича́стен: В па́мять ве́чную бу́дет пра́ведник:

Слу́жбы о́бщии преподо́бным Пече́рским зри: еди́ному (день сей ни́же), двема́ или́ мно́гим (день сей ни́же).