ВЕ́ЧЕР

Блаже́н муж: 1-й антифо́н. На Го́споди, воззва́х: стихи́ры на 8, глас 1.

Подо́бен: Всехва́льнии му́ченицы:

Ри́за честна́я Твоя́, Влады́ко,/ я́же Твое́ Боже́ственное и пречи́стое те́ло покрыва́ющая,/ оде́жду исцеле́ний дарова́ нам/ и исто́чник, источа́ющий благода́ти присноживо́тныя во́ды,/ тоя́ пра́зднуем положе́ние,/ воспева́юще Тя, всех Соде́теля.

Храм Твой, Влады́ко,/ Твою́ свяще́нную ри́зу я́ко сокро́вище спасе́ния/ и исцеле́ния нося́, освяща́ет вся,/ и́же ве́рою притека́ющия/ и Тя по до́лгу пою́щия всегда́,/ упова́ние душа́м на́шим/ и тве́рдый покро́в и держа́ва.

Держа́ва непобеди́мая нам, христиа́ном, дарова́ся –/ ри́за Твоя́, Иису́се Спа́се наш,/ е́юже иноплеме́нных язы́цы при́сно побежда́ются,/ и мир Це́ркви Твое́й, Христе́, осеня́ет./ Сего́ ра́ди ве́рою целу́юще ю,/ покланя́емся Тебе́, Человеколю́бче, и мо́лим/ ча́сти сподо́бити нас святы́х Твои́х.

Сла́ва, и ны́не, глас 8:

Кресту́ Твоему́ Честно́му/ и ри́зе святе́й покланя́емся, Преблаги́й,/ и любо́вию облобыза́ем,/ сла́вяще Твое́ е́же па́че ума́ соше́ствие,/ и безме́рную ми́лость, и бога́тую благосты́ню,/ и́миже исцеле́ния подава́еши боля́щим/ и спаса́еши челове́ческое еестесто́,/ содержи́мо бы́вшее во тьме прегреше́ний,/ я́ко Человеколю́бец.

Вход. Проки́мен дне. Чте́ния 3.

Исхо́да чте́ние (глава́ 15):

Поя́т Моисе́й сы́ны Изра́илевы от мо́ря Чермна́го/ и веде́ их в пусты́ню Сур,/ и идя́ху три дни в пусты́ни,/ и не обрета́ху воды́, да бы́ша пи́ли./ Приидо́ша же в Ме́рру/ и не можа́ху пи́ти воды́ от Ме́рры, горька́ бо бе./ Сего́ ра́ди нарече́ся и́мя ме́сту тому́ го́ресть./ И ропта́ху лю́дие на Моисе́я, глаго́люще: что́ пие́м?/ Возопи́ же Моисе́й ко Го́споду,/ и показа́ ему́ Госпо́дь дре́во,/ и вложи́ е в во́ду, и сладка́ бысть вода́./ Та́мо положи́ ему́ Бог оправда́ния и суды́./ И та́мо искуша́ше его́ и рече́:/ а́ще слу́хом услы́шиши глас Го́спода Бо́га твоего́,/ и уго́дная пред Ним сотвори́ши,/ и внуши́ши за́поведи Его́, и сохрани́ши вся оправда́ния Его́,/ вся́ку боле́знь, ю́же наведо́х на еги́птяны, не наведу́ на тя,/ Аз бо есмь Госпо́дь, исцеля́яй тя./ И приидо́ша во Ели́м,/ и бя́ху та́мо двана́десять исто́чник вод и се́дмьдесят стебль фи́никовых,/ и ополчи́шася та́мо при вода́х./ И воздви́гшеся от Ели́ма,/ и прии́де весь сонм сыно́в Изра́илевых в пусты́ню Син,/ я́же есть между́ Ели́мом и между́ Си́ною.

При́тчей чте́ние (глава́ 3):

Сы́не, не пренебрега́й наказа́ния Госпо́дня,/ ниже́ ослабева́й от Него́ облича́емый./ Его́же бо лю́бит Госпо́дь, наказу́ет,/ бие́т же вся́каго сы́на, его́же прие́млет./ Блаже́н челове́к, и́же обре́те прему́дрость,/ и сме́ртен, и́же уведе́ ра́зум,/ лу́чше бо сию́ купова́ти, не́жели зла́та и сребра́ сокро́вища,/ честне́йшая же есть ка́мений многоце́нных,/ не сопротивля́ется ей ничто́же лука́вое,/ благоразу́мна есть всем, лю́бящим ю,/ и вся́кое же честно́е недосто́йно ея́ есть./ Долгота́ бо жития́ и ле́та жи́зни в десни́це ея́,/ в шу́ице же ея́ бога́тство и сла́ва,/ от уст ея́ исхо́дит пра́вда,/ зако́н же и ми́лость на язы́це но́сит./ Путие́ ея́ – путие́ добры́,/ и вся стези́ ея́ с ми́ром./ Дре́во живота́ есть всем, держа́щимся ея́/ и восклоня́ющимся на ню, я́ко на Го́спода, тверда́.

Проро́чества Иса́иина чте́ние (глава́ 60):

Та́ко глаго́лет Госпо́дь:/ отве́рзутся врата́ твоя́, Иерусали́ме,/ вы́ну день и нощь, и не затворя́тся,/ е́же ввести́ к тебе́ си́лу язы́ков и цари́ их ведо́мыя./ Язы́цы бо и ца́рие, и́же тебе́ не порабо́тают, поги́бнут,/ и язы́цы запусте́нием запусте́ют./ И сла́ва Лива́нова к тебе́ прии́дет, в кипари́се, и пе́вке, и ке́дре,/ вку́пе просла́вити ме́сто свято́е Мое́,/ и ме́сто ног Мои́х просла́влю./ И по́йдут к тебе́ боя́щиися,/ сы́нове смири́вших тя и прогне́вавших тя,/ и покло́нятся следа́м ног твои́х вси, прогне́вавнши тя,/ и нарече́шися град Госпо́день,/ Сио́н Свята́го Изра́илева./ За е́же бы́ти тебе́ оста́влену и возненави́дену, и не бе помога́яй тебе́,/ и положу́ тя в ра́дость ве́чную, весе́лие родо́м родо́в./ И изссе́ши млеко́ языков, и бога́тство царе́й сне́си,/ и разуме́еши, я́ко Аз Госпо́дь, спаса́яй тя/ и избавля́яй тя, Бог Изра́илев.

На лити́и стихи́ры, глас 4, самогла́сны:

Град Москву́, почита́ющий Тя, Спа́се,/ и по до́лгу сла́вящий,/ огражда́еши, Человеколю́бче,/ и лю́ди ри́зою Боже́ственною Твое́ю/ от безбо́жных иноплеме́нник, от гла́да же, и тру́са,/ и междоусо́бныя бра́ни при́сно/ и боля́щим исцеле́ния подава́еши, приходя́щим с ве́рою,/ и́же земны́х не́мощь све́дый,/ Го́споди, сла́ва Тебе́.

Ри́зу Твою́ Боже́ственную, Влады́ко Христе́,/ дарова́л еси́ гра́ду Твоему́ Москве́, бога́тство неотъе́млемое,/ покро́в же, и сла́ву, и необори́мую сте́ну,/ и исцеле́ний сокро́вище,/ и чуде́с исто́чник приснотеку́щ,/ приста́нище же спаси́тельное обурева́емым всегда́./ Сего́ ра́ди пое́м Ти:/ Го́споди, сла́ва Тебе́.

Почерпи́те, челове́цы,/ спасе́ние душа́м и исцеле́ние телесе́м,/ ра́ка бо всем днесь предлежи́т,/ в не́йже положи́ся архиере́йскими рука́ми/ честна́я ри́за Христа́ Бо́га на́шего,/ е́же есть хито́н,/ источа́ющи нам чуде́с струи́ оби́льно,/ и отмыва́ющи серде́ц омраче́ния,/ и страсте́й отъе́млющи скве́рну Боже́ственною благода́тию.

Сла́ва, и ны́не, глас 6:

Одея́йся све́том, я́ко ри́зою,/ наг на суде́ стои́т/ и в лани́ту ударе́ние прие́млет от рук, я́же созда́,/ беззако́ннии лю́дие на Кресте́ пригвозди́ша Го́спода сла́вы./ Тогда́ и заве́са церко́вная распаде́ся,/ со́лнце поме́рче, не терпя́ зре́ти Бо́гу досажда́ему,/ Его́же трепе́щут вся́ческая./ Тому́ поклони́мся, глаго́люще:/ Долготерпели́ве Го́споди, сла́ва Тебе́.

На стихо́вне стихи́ры, глас 4.

Подо́бен: я́ко до́бля:

Во гла́сех воскли́кнем, пе́сньми воспои́м,/ Крест Честны́й облобыза́юще, и к нему́ возопии́м:/ Кре́сте преблаже́нне,/ освяти́ на́ша ду́ши и телеса́ си́лою Твое́ю/ и от вся́каго вре́да сопроти́вна соблюди́ неврежде́ны/ благоче́стно покланя́ющияся Тебе́.

Стих: Бог же, Царь наш пре́жде ве́ка,/ соде́ла спасе́ние посреде́ земли́.

Приступи́вше, челове́цы,/ почерпи́те неистоща́емыя во́ды,/ Креста́ благода́тию пролива́емы./ Се предложи́ма, зри́тся ны́не/ и ри́за Христа́ Бо́га на́шего,/ дарова́ния исто́чник,/ напое́на кро́вию Боже́ственною Влады́ки всех,/ оде́ющаго не́бо о́блаки,/ И́же в сию́ облещи́ся изво́ливый,/ Го́споди, сла́ва Тебе́.

Стих: Возноси́те Го́спода Бо́га на́шего/ и покланя́йтеся подно́жию но́гу Его́, я́ко свя́то есть.

Це́ркве утвержде́ние,/ благове́рных христиа́н держа́ва,/ мона́шествующих похвало́ и спасе́ние,/ ты еси́, Кре́сте всече́стне./ Те́мже покланя́емся тебе́ се́рдцем и душе́ю/ и просвеща́емся днесь ри́зою Боже́ственною,/ ю́же плотска́го ра́ди соше́ствия Своего́/ поноси́ти изво́лившему Христу́ Бо́гу на́шему/ и честне́ю Кро́вию Свое́ю обагри́вшему.

Сла́ва, и ны́не, глас 8:

Пре́жде Честна́го Твоего́ Креста́/ во́ином руга́ющимся Тебе́, Го́споди,/ у́мная во́инства дивля́хуся:/ обложи́лся бо еси́ венце́м поруга́ния,/ зе́млю живописа́вый цве́ты,/ багряни́цею поруга́ния оде́ялся еси́,/ облака́ми одева́яй твердь./ Таковы́м бо смотре́нием разуме́ся Твое́ благоутро́бие, Христе́,/ ве́лия Твоя́ ми́лость, сла́ва Тебе́.

Тропа́рь, глас 4:

Днесь притеце́м, ве́рнии,/ к Боже́ственней и цельбоно́сней ри́зе Спаси́теля на́шего Бо́га,/ благоизво́лившаго сию́ пло́тию носи́ти/ и на Кресте́ святу́ю Свою́ Кровь излия́ти,/ е́юже искупи́ нас от рабо́ты вра́жия./ Тем, благодаря́ще, вопие́м Ему́:/ спаси́ оте́чество на́ше! и архиере́ев, и град, и вся лю́ди,/ честно́ю Твое́ю ри́зою защити́/ и спаси́ ду́ши на́ша,/ я́ко Человеколю́бец.

НА У́ТРЕНИ

На Бог Госпо́дь: тропа́рь пра́здника три́жды.

По 1-й стихоло́гии седа́лен, глас 6:

Днесь проро́ческое испо́лнися сло́во,/ се бо покланя́емся на ме́сто, иде́же стоя́сте но́зе Твои́, Го́споди,/ и, Дре́во спасе́ния вкуси́вше, грехо́вных страсте́й свобо́ду улучи́хом/ моли́твами Богоро́дицы, еди́не Человеколю́бче.

Сла́ва, и ны́не, то́йже.

И чте́ние в толково́м Ева́нгелии, от Матфе́я, зача́ло 112: Тогда́ во́ини иге́моновы, прие́мше Иису́са на суди́ще:

По 2-й стихоло́гии седа́лен, глас 8:

На Кресте́ Тя возвы́шена ви́девши со́лнце,/ незаходи́маго Со́лнца, Христе́, стра́хом помрачи́ся а́бие,/ земля́ же поколеба́ся, ка́мение тре́петом распада́шеся, и церко́вная раздра́ся заве́са,/ и ме́ртвии от гробо́в воста́ша,/ славосло́вяще стра́шное и Боже́ственное схожде́ние/ еди́наго Тебе́ Бо́га на́шего.

Сла́ва, и ны́не, то́йже.

И чте́ние в толково́м Ева́нгелии, от Ма́рка, зача́ло 67.

Посе́м полиеле́й, та́же припе́в:

Велича́ем Тя,/ Живода́вче Христе́,/ и почита́ем вси Боже́ственныя ри́зы Твоея́/ честно́е положе́ние

Псало́м избра́нный Воздви́жению.

По полиеле́и седа́лен, глас 6:

На дре́во Кре́стное, Спа́се, за милосе́рдие ми́лости возне́слся еси́/ и, в ре́бра пробо́дься копие́м,/ раздра́л еси́ согреше́ний рукописа́ние лю́тое, я́ко Всеси́лен Бог./ Те́мже Твое́ неизглаго́ланное, Сло́ве, смотре́ние пое́м благоче́стно.

Сла́ва, и ны́не, то́йже.

Чте́ние в Луке́, зача́ло 111.

Степе́нна, 1-й антифо́н 4-го гла́са. Проки́мен, глас 4: Раздели́ша ри́зы Моя́ себе́/ и о оде́жди Мое́й мета́ша жре́бий. Стих: Да́ша в снедь Мою́ желчь/ и в жа́жду Мою́ напои́ша Мя о́цта. Вся́кое дыха́ние: Ева́нгелие от Матфе́я, зача́ло 112: Во вре́мя о́но, во́ини пое́мше Иису́са на суди́ще:

По 50-м псалме́ стихи́ра, глас 6:

Совлеко́ша с Мене́ ри́зы Моя́/ и облеко́ша Мя в ри́зу червле́нную,/ возложи́ша на главу́ Мою́ вене́ц от те́рния/ и в десну́ю Мою́ ру́ку вда́ша трость,/ лице́ же Мое́ не отврати́х от заплева́ния,/ суди́щу Пила́тову предста́х/ и распя́тие претерпе́х за мирско́е спасе́ние.

Кано́н со ирмосы́ на 14, глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Отве́рзем уста́, челове́цы, и язы́к уясни́м/ в наро́читый день пра́здника на́шего,/ положе́ние Боже́ственныя ри́зы Христа́ Бо́га на́шего све́тло сла́вяще.

Сказа́ти хотя́ Свою́ благода́ть Вы́шний и прия́т ра́бий о́браз нас ра́ди,/ на увере́ние естества́ челове́ческаго/ честну́ю ри́зу Свою́ ве́рным днесь дарова́.

Ри́зу Твою́ честну́ю, Христе́, дарова́л еси́ нам, свяще́нное огражде́ние,/ вся́кое сопроти́вных настоя́ние/ при́сно побежда́ющую си́лою духо́вною.

Богоро́дичен: Воздви́жена ви́дящи, е́же на Кресте́ Твое́ долготерпе́ние,/ рыда́ше Тебе́ Ро́ждшая, зову́щи:/ ка́ко суди́м ви́дится, хотя́й всем суди́ти сла́вы Госпо́дь?

Катава́сия: Отве́рзу уста́ моя́:

Песнь 3

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик Себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Влады́ко сый по существу́, соеди́нился еси́ рабо́м пло́тию/ и, на́ше де́тельствуя разли́чно спасе́ние, Христе́,/ е́же и ны́не промы́шля́я, Твое́ю Боже́ственною ри́зою нам чудоде́йствуеши.

Пло́тию нас ра́ди явле́йся на земли́,/ Боже́ственныя ри́зы Твоея́ приближе́нием нас освяти́л еси́,/ е́йже покланя́ющеся, Христе́, Тя воспева́ем.

Животе́ Ипоста́сный, ны́не вкуси́л еси́ сме́рти плотски́я,/ е́юже живо́т источи́л еси́ ме́ртвым, воста́нием Твои́м, Христе́,/ ны́не же, я́ко животу́ хода́тая,/ ри́зу Твою́ боготеле́снаго одея́ния пода́л еси́ нам.

Богоро́дичен: Из Тебе́, Де́во, обновле́ние я́ве яви́ся,/ вои́стинну Бог, пло́тию ражда́емь, и на Крест возвы́ша́емь,/ низлага́я де́моны, Богора́дованная Влады́чице.

Седа́лен, глас 4.

Подо́бен: Вознесы́йся:

Сше́дый с Небесе́ за милосе́рдие ми́лости, Благоутро́бне Спа́се,/ пло́ти Твоея́ пресвяты́я днесь Боже́ственную ри́зу гра́ду, чту́щему Тя,/ и лю́дем христоимени́тым, сокро́вище пода́л еси́, я́ко тве́рдое всеору́жие,/ от нея́же почерпа́юще освяще́ние, сию́ ве́рою те́пле вси почита́ем.

Сла́ва, и ны́не, то́йже.

И чте́ние во Иоа́нне Евангели́сте толково́м: Во́ини же егда́ распя́ша Иису́са:

Песнь 4

Ирмо́с: Неизсле́дный Бо́жий сове́т,/ е́же от Де́вы, воплоще́ния/ Тебе́, Вы́шняго,/ проро́к Авваку́м усмотря́я, зовя́ше:/ сла́ва си́ле Твое́й, Го́споди.

Я́ко многоце́нное сокро́вище стяжа́в, Христе́,/ чту́щий Тя град Москва́ ри́зу Твою́, Влады́ко,/ ве́рою облобыза́ет и благода́ть прие́млет.

Ви́дите чу́дная, вси лю́дие, и духо́вно ны́не возвесели́теся, Христа́ пою́ще,/ дарова́вшаго нам, я́ко многоце́нное бога́тство,/ Боже́ственныя пло́ти Своея́ одея́ние.

Боговиде́ния сла́вы дре́вле сено́вно,/ Твои́х за́дних сподо́бися ви́дети Моисе́й, просия́в,/ мы же но́вый Изра́иль ны́не лице́м в лице́,/ Твою́ честну́ю ри́зу, Изба́вителя на́шего, ви́дим я́сно.

Богоро́дичен: Раздра́ся рукописа́ние Ада́мово копие́м прободе́ну Ти, Влады́ко, –/ Богоро́дица вопия́ше, у Креста́ предстоя́щи, Го́споди,/ и боле́зненно восклица́ющи.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Просвети́ся днесь правосла́вных со́нмище,/ ерети́ческий же полк да посрами́тся,/ покланя́емую ви́дя Боже́ственную ри́зу Твою́, Влады́ко,/ пло́тию нам я́вльшагося.

Ты, Влады́ко, нам, Твои́м рабо́м, дарова́л еси́ утвержде́ние,/ ри́зу боговочелове́чения Твоего́ Боже́ственное огражде́ние,/ и душа́м спасе́ние, и телесе́м исцеле́ние.

Воспле́щем днесь рука́ми и воскли́кнем гла́сом хвале́ния Го́сподеви:/ се бо во́истинну прии́де и яви́ся,/ вся озара́я ве́рныя Боже́ственныя ри́зы положе́нием.

Богоро́дичен: Пло́тию, Его́же родила́ еси́, Сы́на, Богора́дованная,/ я́ко ви́де на Дре́ве воздви́жена, пла́чем испо́лнися/ и долготерпе́нию Его́ дивла́шеся вои́стинну,/ те́мже велича́ше Его́ схожде́ние.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Ме́ртвым живо́т возсия́, слепы́м же свет прише́ствова,/ немощны́м лю́те врачевство́ отве́рзеся,/ и всем спасе́ние днесь прибли́жися.

Вода́м Тя животеку́щий исто́чник ве́мы, Влады́ко,/ и почита́ем Боже́ственную ри́зу Твою́,/ от нея́же исщеле́ния всегда́, ве́рнии, почерпа́ем.

Стра́нствует всяк ра́зум,/ живоно́сныя пло́ти Твоея́ ви́дя Боже́ственное одея́ние/ и просвеще́ние источа́ющее покланя́ющимся Тебе́.

Богоро́дичен: Приста́нище бу́ди ми, Всенепоро́чная, в пучи́не лю́тых пла́вающему,/ я́же бе́дствующую всю тварь/ Рождество́м Твои́м, Богороди́тельнице, спасла́ еси́.

Конда́к, глас 4:

Одея́ние нетле́ния, спаси́тельнаго целе́ния/ всем челове́ком, Влады́ко, дарова́л еси́,/ Твое́ Боже́ственное сокро́вище – честну́ю ри́зу,/ я́же есть хито́н,/ е́юже живоно́сную и святу́ю плоть вочелове́чения Твоего́ оде́яти благоволи́л еси́./ Сию́ жела́нием прие́млюще, све́тло пра́зднуем,/ стра́хом же и любо́вию, я́ко Благода́телю воспева́юще, зове́м Ти, Христе́:/ сохрани́ в ми́ре оте́чество на́ше, и архиере́ев, и вся лю́ди,/ по вели́цей Твое́й ми́лости.

И́кос:

О, пресла́внаго чудесе́!/ Каково́ Бо́жие дарова́ние ру́сстей земли́ дарова́ся?/ Ри́за, е́юже безгре́шный Госпо́дь оде́емь,/ сию́ неблагода́рнии лю́дие от да́льных стран,/ я́ко дар не́кий, в ца́рствующий град Москву́ принесо́ша./ Тогда́ у́бо ю благове́рный царь Михаи́л со отце́м свои́м Филаре́том Патриа́рхом,/ не я́ко зе́млен дар, но я́ко Небе́сную жизнь,/ вели́ким жела́нием и со свиде́тельством духо́вным ра́достно прия́ша/ и боголе́пным поклоне́нием Влады́це Христу́ Бо́гу на́шему/ благода́рственная хвале́ния возда́ша, си́це глаго́люще:/ сла́ва Ти, Го́споди,/ я́ко премно́гия ра́ди бла́гости Твоея́ ру́сскую страну́ на́шу назира́еши;/ сла́ва Ти, Влады́ко,/ я́ко благи́м сокро́вищем святы́ни Твоея́ держа́ву, ю́же дал еси́ нам, обогаща́еши;/ сла́ва Ти, Святы́й,/ я́ко боготеле́сную Твою́ ри́зу на спасе́ние нам дарова́л еси́,/ по вели́цей Твое́й ми́лости.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Всяк град ра́дуется, пра́зднуя ве́рно с но́вым Сио́ном,/ мона́си и прости́и, бога́тии и убо́зии,/ я́вльшуся днесь Боже́ственному Твоему́, Христе́, одея́нию светода́тельными исцеле́нии.

Черто́г Бо́жий избра́нный, в честне́м сем черто́зе/ ве́рою ри́зу Твою́, Влады́ко, положе́ну архиере́йскими освяще́нными рука́ми,/ ю́же почита́ем, я́ко благочести́вый покро́в.

Обновля́ется всяк, приступа́яй ве́рою и святы́й облобыза́яй ковче́г,/ держа́щий Твою́, Влады́ко Христе́, светови́дную оде́жду.

Скве́рны вся́кия душе́вныя чисти́тельна есть/ Твоя́, Влады́ко Христе́, Боже́ственная оде́жда,/ покрыва́ющая живоно́сное и пречи́стое те́ло Твое́.

Свяще́нницы, в пра́вду облецы́теся вси,/ и преподо́бнии, возра́дуйтеся све́тло:/ се бо дарова́ нам свет Христо́с,/ святы́я пло́ти Своея́ оде́жду, душа́м и телесе́м во спасе́ние.

Богоро́дичен: Богороди́тельнице Де́во,/ Тебе́ чту́щий град гла́да, и тру́са, и озлобле́ния вся́каго спаса́й,/ и язы́ческаго нахожде́ния, и сопроти́внаго вре́да.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́ емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Соверше́н Сый по существу́ Бог, и Челове́к ви́ден бысть соверше́н,/ спаса́я по обоему́ Своя́ вои́стинну сво́йства:/ я́ко Бог бо, богочелове́ческий о́браз уверя́я,/ и Боже́ственныя пло́ти Своея́ ри́зу нам, я́ко сте́ну и покро́в, дарова́л есть.

Вознеси́ рог, Бо́жий Сло́ве, испове́дающих Тя, Бо́га и Челове́ка,/ и Боже́ственней ри́зе Твое́й покланя́ющихся,/ е́юже исцеле́ние всем ве́рным дарова́ся,/ и упраздни́ пога́нская шата́ния неве́дущих Твоея́ си́лы Боже́ственныя.

Све́тится Твоя́ собо́рная и апо́стольская Це́рковь положе́нием ри́зы Твоея́:/ сла́вы бо свет нам дарова́л еси́, Христе́,/ Боже́ственныя пло́ти Твоея́ одея́ние,/ е́юже нас просвети́ во спасе́ние,/ мы же ве́рою и любо́вию сию́ почита́ем.

Богоро́дичен: Ви́девши усну́вша на Дре́ве Христа́,/ всем бо́дрость подава́ющаго Боже́ственную и спаси́тельную,/ Ма́ти Всенепоро́чная восклица́нием пла́каше и взыва́ше:/ что́ сие́ но́вое чу́до?/ Обновля́яй вся умира́ет хотя́.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Пое́м Бо́гу песнь благода́рную, изво́лившему бога́тство превели́кое нам пода́ти,/ сте́ну необори́мую и небла́зненное утвержде́ние,/ Боже́ственныя пло́ти Своея́ одея́ние,/ е́же чту́ще, ве́рнии, велича́ем.

О, па́че ума́ чуде́с Твои́х, Го́споди, я́же сотвори́л еси́ нам, на Тя наде́ющимся!/ Я́коже бо име́вый неизрече́нное рождество́,/ та́ко стра́нно всем показа́л еси́ Боже́ственныя пло́ти Твоея́ ри́зу,/ ко исцеле́нию и просвеще́нию чту́щим Тя.

Предложи́ся ны́не честна́я ра́ка, держа́щи Боже́ственную ри́зу Изба́вителя на́шего Христа́,/ и, я́ко исто́чник све́та, зарю́ исцеле́ний испуща́ющи,/ и тьму неду́гов отгоня́ющи, ю́же любо́вию целу́ем.

Богоро́дичен: Просвети́, Чи́стая, любо́вию чту́щих и велича́ющих Тя,/ и разруши́ стра́сти на́ша, Отрокови́це, и бу́рю укроти́,/ и лука́ваго собла́зны от среды́ отжени́,/ ага́рянская ча́да Ты, Богоро́дице, покори́ во́инству на́шему моли́твами Твои́ми.

Свети́лен:

Се́рдца моего́ стру́пы, от мно́гих грехо́в прозя́бшия, ми исцели́, Спа́се,/ я́ко душа́м и телесе́м Врач,/ и, подая́ прося́щим прегреше́ний проще́ние и неду́гов всех исцеле́ние,/ от честны́я Твоея́ и боготеле́сныя ри́зы благода́ти сподо́би,/ я́ко Благ и Всеми́лостив.

Сла́ва, и ны́не, то́йже.

На хвали́тех стихи́ры на 4, глас 4.

Подо́бен: Я́ко до́бля:

Зако́ну Творца́ от ученика́ купи́ша беззако́ннии/ и, я́ко законопресту́пника,/ Того́ Пила́тову суди́щу предста́виша, зову́ще:/ распни́, И́же в пусты́ни сим Маннода́вшаго./ Мы же, Христе́, страсте́м Твои́м/ и честне́й ри́зе покланя́ющеся,/ ве́рою, Спа́се, зове́м:/ поми́луй нас.

Живоно́сная Твоя́ ре́бра,/ я́ко из Еде́ма исто́чник источа́ющая,/ Це́рковь Твою́, Христе́,/ я́ко слове́сный напая́ет рай,/ отсю́ду разделя́яся, я́ко в нача́ла, в четы́ре Ева́нгелия,/ мир напая́я, тварь веселя́./ Тем вси притека́ем, покланя́ющеся святе́й ри́зе Твое́й,/ ве́рою зову́ще:/ Спа́се, поми́луй нас.

Распина́ему Тебе́, Христе́,/ вся тварь, ви́дящи, трепета́ше,/ основа́ния земли́ поколеба́шася/ стра́хом держа́вы Твоея́./ Во́ини же тогда́ ри́зы Твоя́ раздели́ша себе́/ и о имати́сме Твое́й мета́ша жре́бия,/ ю́же ны́не предложе́ну зря́ще, ве́рнии,/ стра́хом и любо́вию зове́м:/ тоя́ ра́ди, Спа́се, поми́луй нас.

Сла́ва, и ны́не, глас 5:

Избавле́ние це́ну вели́кую,/ пречи́стую кровь Твою́ изво́лил еси́ да́ти нас ра́ди,/ Безгре́шне Христе́ мой,/ всем хотя́й спасе́ние получи́ти./ Те́мже воспева́ем Твое́ сла́вное хоте́ние/ и, покланя́ющеся, чтим копие́, и гу́бу, и трость,/ с си́ми же святу́ю и честну́ю ри́зу Твою́,/ ю́же на боготеле́сней пло́ти Твое́й/ нас ра́ди, гре́шных, носи́л еси́,/ и́миже да́руеши всем нам нетле́ние и жизнь,/ просвеще́ние и ве́лию ми́лость.

Славосло́вие вели́кое. И ектении́. И отпу́ст. И час пе́рвый. И коне́чный отпу́ст.

НА ЛИТУРГИ́И

Блаже́нны, пе́сни 3-я и 6-я. Проки́мен, глас 7: Возноси́те Го́спода Бо́га на́шего/ и покланя́йтеся подно́жию но́гу Его́, я́ко свя́то есть. Стих: Госпо́дь воцари́ся, да гне́ваются лю́дие. Апо́стол к Кори́нфяном, зача́ло 125: Бра́тие, сло́во Кре́стное погиба́ющим: Аллилу́ия, глас 1: Помяни́ сонм Твой, его́же стяжа́л еси́ испе́рва. Стих: Бог же, Царь наш пре́жде ве́ка, соде́ла спасе́ние посреде́ земли́. Ева́нгелие от Ма́рка, зача́ло 67: Во вре́мя о́но, во́ини ведо́ша Иису́са внутрь двора́: Прича́стен: Зна́менася на нас:

Моли́тва

Благодари́м Тя, Влады́ко Человеколю́бче, Царя́ веко́в и Пода́теля благи́х, разруши́вшаго вражды́ средосте́ние и мир пода́вшаго ро́ду челове́ческому. Да́руй и нам, рабо́м Твои́м, мир ри́зою Твое́ю честно́ю, вкорени́ во всех страх Твой и друг ко дру́гу любо́вь утверди́, угаси́ вся́кую ра́спрю, вся разногла́сия и собла́зны. Я́ко Ты еси́ мир наш, и Тебе́ сла́ву возсыла́ем со Отце́м и Святы́м Ду́хом, ны́не, и при́сно, и во ве́ки веко́в. Ами́нь.