На Го́споди, воззва́х, стихи́ры свята́го Григо́риа, глас 5.

Подо́бен: Преподо́бне о́тче:

Преподо́бне о́тче свяще́ннейше Григо́рие,/ тро́сть испо́лнена Уте́шителя дыха́ния,/ и язы́че ясне́йший благоче́стия,/ свети́льниче многосве́тлый Боже́ственныя зари́,/ пропове́дниче и́стины,/ основа́ние Богосло́вия,/ исто́чниче догма́тов высо́ких,/ наказа́ний пото́че медото́чных,/ цевни́це Боговеща́нная,/ пе́сньми Богопи́санными наслажда́ющая ве́рных мы́сли./ Христа́ моли́, Христу́ помоли́ся, всему́дре,/ в струя́х Иорда́нских обно́вльшему мир,/ спасти́ ро́д наш.

Преподо́бне о́тче всече́стне Григо́рие,/ секи́ра, секу́щая еретико́в стремле́ния,/обоюдуо́стрый мечу́ Уте́шителя:/ ору́жие, посека́ющее прелюбоде́йная се́мена:/ о́гнь, хвра́стныя е́реси попаля́ющий:/ и лопа́та, вои́стинну земледе́лательная,/ е́юже тя́жкое и ле́гкое уче́ний благоразсужда́ется,/ и ме́рило, изве́ства вся пра́вящее ко стези́ спасе́ния,/ Христа́ моли́, Христу́ моли́ся всегда́,/ во струя́х Иорда́нских назда́вшему мир,/ спасти́ ро́д наш.

Преподо́бне о́тче всеблаже́нне Григо́рие,/ уста, источа́ющая блаже́нныя гласы,/ от неоску́дных спасе́ния че́рплющая и Боже́ственных исто́чников,/ словеса́ же моли́твы всем сказу́я,/ пра́вило, пра́вящее к доброде́тели,/ и́же виде́ньми Боже́ственными просвеще́н,/ заре́ю осия́емь Тро́ицы несозда́нныя,/ Ея́же и побо́рник непобеди́мь бы́л еси́,/ Христу́ моли́ся, Христа́ моли́, всему́дре,/ в струя́х Иорда́нских назда́вшаго мир,/ спасти́ род наш.

И́ны стихи́ры Дометиа́на, глас 1

Подо́бен: Всехва́льнии му́ченицы:

И́же зе́млю истреби́ти/ пе́рвее запрети́в всю́,/ и изсуши́ти мо́ре хваля́йся,/ наруга́емь ве́рными показа́ся,/ я́ко пти́ца днесь,/ и посмея́тельнейш кома́р:/ ему́же суди́ся вид,/ я́коже не́кое страши́лище,/ и попра́вся Христо́вым уго́дником.

Дометиа́н нас, ве́рнии,/ созыва́ет днесь/ к трапе́зе Богоуго́дней,/ к сему́ сни́демся/ благоду́шия нра́вом,/ и спра́зднуим ему́,/ того́ исправле́ния,/ моля́ще Спа́са душ наших,/ мир мирови дарова́ти.

Возрасти́л еси́ тала́нт Христо́в,/ да́нный тебе́, всече́стне,/ сугу́бою благода́тию,/ я́ко ра́б и́скренний./ Те́мже слы́шиши:/ благи́й ра́бе, бу́ди тебе́,/ я́ко и́стинну благо́му уго́днику,/ и ны́не вни́ди в ра́дость Го́спода твоего́,/ трудо́в прие́м воздания.

Сла́ва, глас 4:

Прему́дрости сло́во твое́/ украси́в доброде́телию непоро́чною,/ преудо́брен во обои́х был еси́, Нисси́йский Григо́рие,/ Боговеща́нным твои́м гласом/ украша́я и веселя́ лю́ди разу́мно/ Тро́ицы Единобо́жное, прему́дре, излага́я./ Те́мже и правосла́вными иноплеме́нныя е́реси победи́в,/ держа́ву ве́ры в конце́х воздви́гл еси́./ Христу́ предстоя́ с невеще́ственными служи́тели,/ и душа́м на́шим испроси́/ мир и ве́лию ми́лость.

И ны́не, глас то́йже:

Трепета́ше рука́ Крести́телева,/ егда́ пречи́стому Твоему́ верху́ косну́ся./ Возврати́ся Иорда́н река́ вспя́ть,/ не дерза́ющи служи́ти Тебе́:/ я́же бо устыде́ся Иису́са Нави́на,/ ка́ко Творца́ своего́ устраши́тися не имя́ше?/ Но все испо́лнил еси́ смотре́ние, Спа́се наш/ да спасе́ши мир явле́нием Твои́м,/ Едине Человеколю́бче.

На стихо́вне, стихи́ры, глас 2.

Подо́бен: До́ме Евфра́фов:

Пе́ние новоле́пное/ да пое́т вся тварь/ от Де́вы ро́ждшемуся Христу́,/ и кре́щшемуся во Иорда́не днесь.

Стих: Мо́ре виде и побеже́,/ Иорда́н возврати́ся вспя́ть.

Труба́ проро́ческая,/ Предте́ча да вопие́т:/ сотвори́те Го́споду,/ кре́щшемуся в струя́х,/ плоды́ изря́днейших дея́ний.

Стих: Что ти есть, мо́ре, я́ко побегло еси́?/ И тебе́, Иорда́не, я́ко возврати́лся еси́ вспя́ть?

Возсия́ сро́дный с высоты́/ Боже́ственный Дух,/ в виде голубине,/ зри́мь несказа́нно,/ ны́не Христу́ притече́.

Сла́ва, глас 4:

Житие́ Боже́ственно испра́вив,/ виде́нием дея́ние уясни́л еси́,/ Богоявле́нне Григо́рие,/ му́дрость бо возлюби́в жела́нием Боже́ственным,/ из уст Ду́ха благода́тию обогати́лся еси́/ и я́ко сот ме́да,/ сла́дость твои́х слове́с иска́пая,/ при́сно весели́ши ра́зумы Боже́ственными Це́рковь Бо́жию./ Те́мже на Небесе́х святи́тельски водворя́яся,/ о нас непреста́нно моли́ся,/ соверша́ющих па́мять твою́.

И ны́не, глас то́йже:

Тебе́ в Ду́се и огни́ очища́юща грех ми́ра,/ зря́ Крести́тель гряду́ща к себе,/ ужаса́яся и трепе́ща вопия́ше, глаго́ля:/ не сме́ю держа́ти верх Твой пречи́стый,/ Ты мя освяти́, Влады́ко,/ Боже́ственным явле́нием Твои́м,/ Еди́не Человеколю́бче.

Тропа́рь, глас 4:

Бо́же оте́ц наших,/ Творя́й при́сно с нами по Твое́й кро́тости,/ не отстави ми́лость Твою́ от нас,/ по моли́твами их в мире упра́ви живо́т наш.

Сла́ва, и ны́не, пра́здника, глас 1:

Во Иорда́не креща́ющуся Тебе́, Го́споди,/ Тро́ическое яви́ся поклоне́ние:/ Роди́телев бо глас свиде́тельствоваше Тебе́,/ возлю́бленнаго Тя Сы́на имену́я,/ и Дух в ви́де голуби́не,/ изве́ствоваше словесе́ утвержде́ние./ Явле́йся Христе́ Бо́же,/ и мир просвеще́й, сла́ва Тебе́.

На повече́рии

Пое́тся возсле́дование преподо́бнаго Маркиа́на.

Кано́н. Глас 1

Песнь 1

Ирмо́с: Песнь побе́дную пои́м вси́ Бо́гу,/ сотво́ршему ди́вная чудеса́ мы́шцею высо́кою, и спа́сшему Изра́иля,/ я́ко просла́вися.

Струя́ми погре́бшему грех, Христу́ прилепля́яся, неосла́бными манове́нии,/ изсуши́л еси́ пото́ки страсте́й, Богому́дре Маркиа́не.

Христо́с креща́яся, очища́ет истле́вшее страстьми́ на́ше неможе́ние, Ему́же угоди́л еси́, Маркиа́не, приле́жным, о́тче, воздержа́нием.

Богоро́дичен: Де́ва пребыла́ еси́ по рождестве́, Бо́га бо родила́ еси́,/ Его́же вели́кий Предте́ча во Иорда́нских струя́х крести́ с тре́петом мно́гим,/ Пречи́стая Влады́чице.

Песнь 3

Ирмо́с: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми Не́бо утверже́й второ́е,/ и основа́вый на вода́х зе́млю, Всеси́льне.

Иорда́нския струи́, Го́споди, низше́д освяти́л еси́ днесь/ и я́коже да́р и честно́е и кра́сное приноше́ние/ прия́л еси́ сла́внаго Маркиа́на/ сла́вити Тя.

Облага́яй не́бо о́блаки/ Госпо́дь, оде́ждою облече́ тя свяще́нною, священноде́йствующа,/ и А́нгелом гове́йною, я́ко А́нгела на земли́ с пло́тию пожи́вшаго.

Анастаси́и Богому́дрыя свяще́нен хра́м создал еси́,/ украси́в свяще́нными и честны́ми возложе́ньми,/ сего́ ра́ди с не́ю, Маркиа́не, всели́лся еси́.

Богоро́дичен: Грех пра́отца, И́же из Тебе́ рожде́йся, При́снодево,/ во Иорда́нстей реце́ потопля́ет, я́ко Благоутро́бен./ Его́же Предте́ча крести́ти повеле́н быв, спря́ташеся.

Песнь 4

Ирмо́с: Ду́хом прови́дя, проро́че Аввакуме, Словесе́ воплоще́ние,/ пропове́дал еси́, вопия́:/ внегда́ прибли́житися ле́том, позна́ешися:/ внегда́ приити́ вре́мени, пока́жешися./ Сла́ва си́ле Твое́й, Го́споди.

Игра́йте, го́ры, лику́йте, хо́лми:/ Иису́с креща́ется Един чи́стый,/ преподо́бнаго па́мять уясни́вый,/ И́мже де́монов вся лесть омрачи́ся, и вселе́нная просвети́ся.

Умертви́в воздержа́нием пло́тския сла́сти,/ Боже́ственным твои́м проглаго́ланием оживи́л еси́ мертвецы́,/ в погребе́ние облобыза́я, о́тче, и а́бие умре́ти повелева́я,/ до́ндеже прии́дет всех о́бщее воскресе́ние.

Житие́ твое́ добро́тою Бо́же́ственных доброде́телей укра́шено, уясня́ет ве́рныя,/ моще́й же твои́х ра́ка облиста́ет лучи́ чуде́с/ ве́рою приступа́ющим, о́тче, и ве́рою восхваля́ющим тя.

Богоро́дичен: Исто́чник Ты спасе́ния родила́ еси́ Христа́,/ освяща́ющаго исто́чники Креще́нием,/ Его́же Иорда́н ви́дев возврати́ся стра́хом,/ Иоа́нн креща́яй ужасе́ся,/ Чи́стая Де́во Всепе́тая.

Песнь 5

Ирмо́с: Тво́й мир да́ждь нам, Сы́не Бо́жий,/ ино́го бо ра́зве Тебе́ Бо́га не зна́ем,/ И́мя Твое́ имену́ем, я́ко Бог живы́х и ме́ртвых еси́.

Змие́в ты сокруши́л еси́ гла́вы Креще́нием, Го́споди Бо́же Всеси́льне,/ вла́сть да́вый и си́лу Маркиа́ну Бо́же́ственному на де́монския ле́сти.

Расточи́л еси́, разда́в ни́щим, твое́ име́ние,/ Богому́дре всеблаже́нне:/ те́мже твоя́ пребыва́ет па́мять во ве́ки и пра́вда.

Умири́л еси́ смуще́ния страсте́й по́мысл, преподо́бне:/ храм же созда́л еси́ Боже́ственнаго ми́ра/ имену́емый, в хвалу́ Госпо́дню, И́же всех ми́ра.

Богоро́дичен: Де́ва по Рожде́стве́ яви́лася еси́ вои́стинну, Чи́стая,/ Бо́га бо родила́ еси́,/ Его́же Иоа́нн в вода́х Иорда́нских омыва́ет, на обновле́ние ми́ра.

Песнь 6

Ирмо́с: Проро́ка Ио́ну подража́я, вопию́:/ живо́т мой, Бла́же, свободи́ из тли́/ и спаси́ мя, Спа́се ми́ра, зову́ща:/ сла́ва Тебе́.

Пото́к сла́дости подая́ нам, Иорда́нскими струя́ми крести́ся Христо́с,/ и́же днесь преподо́бнаго просвети́ успе́ние.

Мирополо́жница мы́сленная моще́й ра́ка яви́ся твои́х,/ свяще́нне Маркиа́не,/ источа́ющи чуде́с ми́ро к тебе́ притека́ющим.

Миродохнове́нными моли́твами отгна́л еси́ огня́ клоко́чущаго стремле́ние,/ спасл еси́ хра́м невреди́м,/ его́же создал еси́, Богоблаже́нне.

Богоро́дичен: Де́ва дои́ши Пита́теля всех,/ Его́же Предте́ча ви́дев, взыгра́ся вопия́:/ Избавле́ние и Спасе́ние всех яви́ся.

Седален, глас 8

Подо́бен: Прему́дрости:

Писа́ния от младе́нства Свяще́нная испыту́я, Богоно́се Маркиа́не,/ Боже́ственне просия́л еси́ благоче́стия уче́ньми,/ Сы́на бо и Сло́ва Отцу́ Единосу́щна,/ и Боже́ственному Ду́ху пропове́дал еси́ Сопресто́льна./ Те́мже А́риево и Македо́ниево нече́стие обличи́л еси́, и ве́ру уясни́л еси́, правосла́вно сла́витися./ Моли́ Христа Бо́га грехо́в оставле́ние пода́ти/ чту́щим с любо́вию па́мять твою́.

Песнь 7

Ирмо́с: Су́щим в пещи́ отроко́м Твои́м, Спа́се,/ не прикосну́ся ниже́ стужи́ о́гнь./ Тогда́ трие́, я́ко еди́неми усты́, поя́ху,/ и благословля́ху глаго́люще:/ благослове́н Бог оте́ц на́ших.

Жи́зни наста́ исто́чник, вода́ми омыва́ющий прегреше́ния на́ша,/ Бо́жие Единоро́дное Безнача́льное Сло́во,/ Ему́же благоугоди́ Маркиа́н сла́вный, прело́жся к Нему́.

Благомо́щными бде́нии вои́стинну успи́л еси́ стра́сти неудободе́ржныя души́/ и усну́в во глубоча́йшей ста́рости, блаже́нне, к Све́ту отше́л еси́,/ я́ко дне сын и Христо́в служи́тель.

Ору́жие, е́же дре́во жи́зни храня́щее, плещи́ тебе́ да́рует, му́дре./ Те́мже ра́дости ра́йския наслажда́ешися,/ воспева́я Вино́внаго спасе́ния на́шего,/ Маркиа́не свяще́нне.

Богоро́дичен: Не опали́в Твои́х ложе́сн, Христо́с ражда́ется, Чи́стая, из Тебе́ боголе́пно,/ Его́же ви́дев Иоа́нн вопия́ше:/ Иису́с креща́ется, спасе́ние ве́рных и избавле́ние.

Песнь 8

Ирмо́с: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ бла́гослови́те, лю́дие,/ и превозноси́те во вся ве́ки.

Челове́ки породи́л еси́ Креще́нием Твои́м, Бо́же Многоми́лостиве,/ днесь от земли́ к неизрече́нней сла́ве прие́мый уго́дника Твоего́ Маркиа́на Боже́ственнаго.

Ца́рскою ви́дяще тя лю́дие свяще́ннии оде́ждею облече́на,/ внегда́ священноде́йствовати,/ удиви́шася, о́тче, и согласно Христа́ всех Царя́ воспе́ша, всеблаже́нне.

Воздержа́ние стяжа́л еси́, и непреста́нную моли́тву,/ вознося́щее смире́ние, и любо́вь и́стинную и безстра́стие, о́тче,/ сего́ ра́ди Христо́с благода́ть тебе́ подаде́ чуде́с во ве́ки.

Богоро́дичен: Вмеща́еши Невмести́маго, Де́во, па́че ума́,/ Его́же име́я Предте́ча крести́ти, ужаса́яся и трепе́ща вопия́ше:/ О́гнь сый, Христе́, не опали́ мене́, любо́вию пою́ща Тя.

Песнь 9

Ирмо́с: Живоприе́мный исто́чник приснотеку́щий,/ светоно́сный свети́льник благода́ти,/ хра́м одушевле́нный, сень пречи́стую,/ Небесе́ и земли́ простра́ннейшую,/ Богоро́дицу, ве́рнии, велича́ем.

Торжеству́йте днесь, челове́цы,/ ре́ки и го́ры, игра́йте:/ Иису́с креща́ется, Спас яви́ся,/ и спрославля́ет Свои́м явле́нием Маркиа́на свято́е преставле́ние.

Жела́ний кра́йнейшее дости́гл еси́, отреши́вся уз теле́сных, Богоно́сне преподо́бне,/ зря́ све́тлости святи́телей, проро́ков,/ и апо́столов: с ни́миже нас чту́щих тя помина́й.

Богоро́дичен: Но́сиши Бо́га на руку́, пита́ющаго Богоде́льною си́лою вся́ческая,/ Его́же ви́дев Предте́ча Креще́ния прося́ща, недоумева́ет у́жасом, Богороди́тельнице,/ и исполня́ет со стра́хом повеле́нное.

Стихи́ры, глас 1

Подо́бен: Всехва́льнии:

О́тче свяще́ннейше,/ твоего́ жития́ светлостьми́ вселе́нная просвети́ся,/ и омрачи́ся де́монская лесть,/ неду́зи отгоня́ются то́чию прикоснове́нием ра́ки твоея́:/ Боже́ственная бо благода́ть твоя мо́щи осия́вши,/ страсте́й реши́т омраче́ние.

О́тче досточу́дне,/ хра́м себе́ сотвори́л еси́ Присносу́щнаго Божества́,/ хра́мы же воздви́гл еси́ свяще́нныя/ Боже́ственней Тро́ице на похвале́ние,/ ме́ртвыя же возста́вил еси́ глаго́лом,/ и ми́лостивен стяжа́л еси́ нрав,/ разда́л еси́ бога́тство прося́щим со усе́рдием.

Наготу́ проси́вшаго я́ве, о́тче, покры́л еси́,/ наг сам входя́ во хра́м святы́й,/ Боже́ственною же оде́ждою тя Христо́с облече́,/ Боже́ственная соверша́юща та́инства,/ ея́же удиви́шася добро́те ви́девшии,/ и Бо́жия тя позна́вше уго́дника.

Сла́ва, и ны́не, глас то́йже:

Бою́ся Твоего́ прише́ствия, Христе́,/ оба́че повеле́нию Твоему́ не проти́влюся ра́б Твой,/ се́ ру́ку мою́ простира́ю со стра́хом:/ ви́жду бо свята́го с высоты́ сходя́ща Ду́ха, Влады́ко,/ Твоего́ Единоче́стнаго/ и Отцу́ Безнача́льному Сопресто́льна,/ свиде́тельствующа Тя пло́тию креща́ема.

На у́трени

По 1-й стихоло́гии седален, глас 3.

Подо́бен: Де́ва днесь:

Влады́ка днесь на Иорда́н прии́де, крести́вся в вода́х от Боже́ственнаго Предте́чи./ Свы́ше же оте́ц свиде́тельствоваше:/ Сей есть Сын Мой, в Не́мже благоизво́лих:/ и Дух яви́ся стра́нным ви́дом голуби́ным над Ним.

Сла́ва, и ны́не, то́йже.

По 2-й стихоло́гии седален, глас 4.

Подо́бен: Удиви́ся Ио́сиф:

Богоявле́ния вре́мя, Христо́с яви́ся нам во Иорда́не реце́./ Прииди́те, почерпе́м, ве́рнии, во́ду оставле́ния грехо́в на́ших:/ Христо́с бо пло́тию прии́де, овча́те ищя́ зверьми́ похище́ннаго,/ и обре́т, введе́ я́ко Благоутро́бен в ра́й па́ки./ Христо́с яви́ся на Иорда́не, и мир просвети́.

Сла́ва, и ны́не, то́йже.

Кано́н пра́здника пе́рвый со ирмо́сом на 6, глас 2 (зри страницу 238) и святы́х два́ кано́на. Ин кано́н свята́го Григо́рия, глас 5.

Песнь 1

Ирмо́с: Коня́ и вса́дника в мо́ре Чермно́е,/ сокруша́яй бра́ни, мы́шцею высо́кою/ Христо́с истрясе́, Изра́иля же спасе́,/ побе́дную песнь пою́ща.

Бе́здна сый прему́дрости, и ра́зума сокро́вище,/ и самобла́гости Исто́чник сый,/ дае́ши ми́, Христе́, сла́вныя Твоея́ Це́ркве пе́сньми свети́льника пе́ти Григо́риа.

Приими́, учи́телей, Григо́рие, све́тлое удобре́ние,/ о́тче, убо́гое пе́ние твое́й приноси́мое от любве́ па́мяти,/ в не́йже Христа́ нам уми́лостиви.

Обре́те очище́ну свяще́нную твою́ душу от страсте́й тиме́ния, Сия́ние Непристу́пное./ Те́мже я́ко всели́вся в тя, о́тче,/ свет тя показа́, науча́юща земны́я концы́.

Сло́вом, свя́щеннотаинниче, бога́тым же и му́дрым,/ че́стну́ю Це́рковь богосло́вити научи́л еси́ Единицу Тричи́сленную,/ и Тро́ицу Сопресто́льну и Единоче́стну, о Григо́рие!

Богоро́дичен: Ве́ра да вменя́ется еди́на,/ а не показа́ние су́щих па́че ума́ чуде́с, Богороди́тельнице Де́во, Твои́х,/ и́бо Непостижи́маго Бо́га Сло́ва родила́ еси́, обле́кшася в челове́чество.

Ин кано́н Дометиа́на, глас 1.

Песнь 1

Ирмо́с: Твоя́ победи́тельная десни́ца/ боголе́пно в кре́пости просла́вися:/ та́ бо, Безсме́ртне,/ я́ко всемогу́щая, проти́вныя сотре́,/ изра́ильтяном пу́ть глубины́ новосоде́лавшая.

Воста́ния пло́ти, и страсте́й наше́ствия, Богоприя́тне,/ и востаю́щую в души́ мое́й укроти́ бра́нь,/ в ми́рне, о́тче, устрое́нии соблюди́.

Жела́нием и любо́вию неукло́нною, Вы́шней прему́дрости прикосну́вся,/ плоть покори́л еси́, и су́щая земна́я оттря́сл еси́, преподо́бне,/ и Бог и́стинно в прича́стии бы́л еси́.

Дометиа́н чу́дный пома́лу от земли́ возвыша́емь,/ прии́де от си́лы худы́я к соверше́нней си́ле,/ и восхожде́ния в се́рдцы положи́.

Богоро́дичен: Вода́ми омочи́в пло́ти, е́же прия́т Госпо́дь смеше́ние,/ от Твои́х соде́ла де́вственных крове́й челове́чество,/ ко ополче́нием проти́вных непобо́рно.

Ин. Песнь 3

Ирмо́с: Водрузи́вый на ничесо́мже зе́млю повеле́нием Твои́м,/ и пове́сивый неодержи́мо тяготе́ющую,/ на недви́жимем, Христе́, ка́мени за́поведей Твои́х,/ Це́рковь Твою́ утверди́,/ Едине Бла́же и Человеколю́бче.

Пло́ти у́бо влады́це уму́ взыгра́ния, Всецарю́ же ум покори́л еси́./ Те́мже, непреткнове́нно пу́ть за́поведей проше́д,/ ты Тро́ицы оби́телище бы́л еси́ ле́потно, Григо́рие.

Подо́бно я́ростное у́бо на зми́я души́ вооружи́л еси́, всеблаже́нне,/ жела́ние же Бо́гу все ку́пно просте́р,/ к недомы́сленней и неизме́нней добро́те впери́л еси́, преподо́бне.

Дея́нию виде́ние, о́тче, приложи́л еси́,/ те́мже о́бласть Це́ркве тебе́ принося́ вруча́ет Христо́с,/ ю́же у́бо непоро́чно я́ко неботаи́нник упра́вил еси́ изря́днейший,/ всеблаже́нне Григо́рие.

Проходя́ доброде́телей преде́л, Григо́рие,/ и восхожде́ния в се́рдцы твое́м ты полага́я,/ от земли́ взя́лся еси́, непреста́нным тече́нием к Небе́сному жи́тельству,/ пре́жде от пло́ти изше́ствия твоего́.

Богоро́дичен: Ты, Ма́ти Бо́жия, несочта́нно родила́ еси́/ из нетле́ннаго Отца́ Возсия́вшаго, без боле́зней ма́терних./ Те́мже Тя Богоро́дицу, воплоще́ннаго ро́ждшую Сло́ва, правосла́вно пропове́дуем.

Ин.

Ирмо́с: Еди́не ве́дый челове́ческаго существа́ не́мощь,/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й:/ одушевле́нный хра́ме,/ неизрече́нныя сла́вы Твоея́, Человеколю́бче.

В кре́пости свое́й враг преве́тхий, твоея́ души́ не моги́й кре́пости поколеба́ти,/ ухищря́ет во вре́мя твоего́ разреше́ния, та́йнами пти́ц худы́х низложи́ти.

Велехвале́нием свои́м, пра́ведно изничто́жествуется приуязвле́нием зми́й окая́нный,/ и в вид пе́сиих му́х преврати́ся, не́мощию множа́йшею,/ и под нога́ми лежи́т пра́ведных кра́сными попира́емь.

Богоро́дичен: Из Тебе́ рожде́йся без семе́не Сын Преве́чный, Дево Ма́ти, мир обнови́,/ сокрове́ннаго зми́я вода́ми в Креще́нии Свое́м умертви́в Госпо́дь,/ и тле́ния челове́ки изба́вив.

Конда́к и и́кос пра́здника.

Конда́к Григо́рия, глас 2.

Подо́бен: В моли́твах:

Це́ркве Боже́ственный иера́рх,/ и прему́дрости честны́й тайноглаго́льник,/ Нисси́йский бо́дрый ум Григо́рий,/ со А́нгелы ликовству́я,/ и наслажда́яся Боже́ственным све́том,/ мо́лится непреста́нно о всех нас.

И седа́лен, глас 3.

Подо́бен: Боже́ственныя ве́ры:

Боже́ственное осия́ние насле́довал еси́, житие́ невеще́ственно пожи́в,/ тезоимени́тным свяще́нством просия́л еси́,/ преесте́ственно бо уясни́в уче́ньми,/ правосла́вием мир утверди́л еси́, о́тче преподо́бне./ Христа́ Бо́га моли́, дарова́ти нам ве́лию ми́лость.

Сла́ва, ин седа́лен Дометиа́на, глас 1.

Подо́бен: Ка́мени запеча́тану:

Свяще́нства украша́емь, о́тче, пома́занием Богода́нным,/ уясни́л еси́ сие́ Боже́ственными добро́тами доброде́телей,/ и Боже́ственным ко Христу́ повинове́нием,/ и сконча́в твое́ тече́ние, на Небесе́х вопие́ши со А́нгелы:/ сла́ва благоутро́бию Твоему́, Спа́се,/ сла́ва Ца́рствию Твоему́,/ сла́ва смотре́нию Твоему́, Еди́не Человеколю́бче.

И ны́не, пра́здника, глас и подо́бен то́йже:

Иису́су ро́ждшуся от Де́вы Мари́и, и во Иорда́не кре́щшуся от Иоа́нна,/ Дух сни́де на Него́ зри́мый в ви́де голуби́не./ Сего́ ра́ди проро́к со А́нгелы глаго́лаше, зовы́й:/ сла́ва прише́ствию Твоему́, Христе́,/ сла́ва Ца́рствию Твоему́,/ сла́ва смотре́нию Твоему́, Еди́не Человеколю́бче.

Ин. Песнь 4

Ирмо́с: Боже́ственное Твое́ разуме́в истоща́ние,/ прозорли́во Авваку́м, Христе́, со тре́петом вопия́ше Тебе́:/ во спасе́ние люде́й Твоих,/ спасти́ пома́занныя Твоя́ прише́л еси́.

Я́ко сто́лп ви́ден был еси́ всесве́тел/ житие́м же и сло́вом, те́плою правосла́вия, Григо́рие, разжже́н ре́вностию,/ Но́ваго Изра́иля предводя́.

Благода́ть прии́м духо́вную,/ ве́тхаго зако́на раздра́л еси́ оде́жду писа́ния,/ и сокрове́нную добро́ту нам ра́зума откры́л еси́.

Всех доброде́телей ви́ды Христо́с показу́я блаже́нствы, Григо́рие, тебе́ вве́ри,/ я́ко служи́телю Сло́ва, простра́нно сказа́ти конце́м.

Богоро́дичен: Без смеше́ния у́бо зачала́ еси́ нерастле́нно во утро́бе,/ и пре́жде боле́зни родила́ еси́,/ и по рождестве́ Де́ва, Бо́га пло́тию ро́ждши, сохрани́лася еси́.

Ин

Ирмо́с: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние.

Зако́н благода́ти показа́л еси́ бы́ти сень,/ су́щим в зако́не Бо́жии евре́ем чту́щим, му́дре,/ и Ева́нгелие и́стиннаго Богоявле́ния та́инство,/ Христу́ взыва́я:/ сла́ва си́ле Твое́й, Го́споди.

Облиста́в я́ко звезда́ от восто́ка многосве́тлая, Це́рковь просвеща́еши,/ пропове́дая Христа́, му́дрыми показа́ньми всеблагоче́стно пра́вды Со́лнца, Тому́ взыва́я:/ сла́ва си́ле Твое́й, Го́споди.

Зло́бы вся́кия отто́ргнувся, и любве́ вре́менныя, о́тче, со тща́нием,/ и просвети́л еси́ све́том оте́чества твоего́ концы́, му́дре,/ и сим бога́тство одожди́л еси́, оби́льнейшим бога́тства коли́чеством.

Богоро́дичен: Сло́во, я́ко Бог Сый Неви́димый,/ прии́м от Жены́ челове́чо естество́ ви́димо,/ соверша́ет и очища́ет в реце́, И́же греха́ чу́ждий,/ па́дшаго очища́я прегреше́ния.

Ин. Песнь 5

Ирмо́с: Одея́йся све́том, я́ко ри́зою,/ к Тебе́ у́тренюю, и Тебе́ зову́:/ ду́шу мою́ просвети́ омраче́нную, Христе́,/ я́ко Еди́н Бла́гоутро́бен.

Ты, я́ко о́гнь, попали́л еси́ ересе́й терноно́сная плете́ния слове́с,/ ве́рных же умы́ просвети́л еси́,/ блаже́нне тайново́дче Григо́рие.

Евно́миево ты изобличи́л еси́ беззако́ние, и сего́ словеса́ неудобоизбе́жная,/ сете́й же пругла зе́льная³⁰, я́ко паучи́нная тка́ния, разори́л еси́.

Обличи́л еси́, всеизря́днейше, безбо́жнейшаго Македо́ниа,/ Боже́ственный Дух безсту́дно укори́вшаго,/ я́ко неприча́стна сему́ су́ща, Григо́рие.

Богоро́дичен: Ты пра́вду же и избавле́ние нам ро́ждши – Христа – безсе́менно,/ свобо́дно соде́яла еси́ от кля́твы, Богоро́дице, естество́ пра́отца.

Ин

Ирмо́с: Просвети́вый сия́нием прише́ствия Твоего́, Христе́,/ и освети́вый Кресто́м Твои́м ми́ра концы́, сердца́ просвети́ све́том Твоего́ Богоразу́мия,/ правосла́вно пою́щих Тя.

Призре́ на зе́млю Влады́ка тва́ри,/ и сея́ поколеба́шася, Богому́дре, основа́ния, и лю́те сотрясо́шася,/ тебе́ же душе́внаго му́жества, о́тче, от моли́твы не уклони́.

Не терпе́л еси́ ху́лящих слы́шати, сла́вне, на Высоту́,/ и глаго́лати непра́вду безу́мныя,/ но те́х обрати́л еси́ па́стырским твои́м жезло́м,/ и неду́жное исцели́л еси́.

Еди́но естество́ во Христе́, иму́щим пропове́дати, Богоглаго́ливе, ника́коже попусти́л еси́ сло́жное,/ но те́х улови́л еси́ уче́ний твои́х мре́жею,/ и к све́ту возве́л еси́.

Богоро́дичен: Услади́ вод го́ресть со́лию Елиссе́й./ Тво́й же, Богома́ти, Сын и Бог,/ кре́щся в воде́, греха́ го́ресть и боле́знь отъя́т.

Ин. Песнь 6

Ирмо́с: Неистовству́ющееся бу́рею душетле́нною,/ Влады́ко Христе́, страсте́й мо́ре укроти́,/ и от тли́ возведи́ мя,/ я́ко Благоутро́бен.

Смире́нное мудрова́ние стяжа́в,/ всем же кро́ток боре́ц показа́лся еси́, Григо́рие,/ проти́ву тща́щимся ума́лити сла́ву Христо́ву.

А́риево отчужде́ние Тро́ицы,/ сло́вом бога́тным де́рзостное разделе́ние, Григо́рие,/ и всеконе́чно низложи́л еси́ мудрова́ния.

Неуче́нно соедине́ние Тро́ическое, смеше́ние му́дрствуя,/ тобо́ю Саве́ллий обличи́ся богобо́рец, Григо́рие всеблаже́нне.

Богоро́дичен: Де́ва роди́, и ро́ждши пребы́сть чиста́,/ на рука́х Нося́щаго вся́ческая, я́ко вои́стинну, Де́во Ма́ти, носи́вши.

Ин

Ирмо́с: Обы́де нас после́дняя бе́здна,/ несть избавля́яй,/ вмени́хомся я́ко о́вцы заколе́ния,/ спаси́ лю́ди Твоя́, Бо́же наш:/ ты бо кре́пость немощству́ющих и исправле́ние.

Изба́вишася я́ко от се́ти, преподо́бне, сме́ртныя бе́дствующии лю́дие,/ и страсте́й мно́жество дале́че моли́твами твои́ми отгна́ся,/ и́бо са́ми пе́рвии тя име́ша засту́пника.

Потреби́л еси́ моли́твою, всему́дре, стремле́ние неду́га,/ к Де́ве и Ма́тери Изба́вителя ско́ро прите́к,/ не бо́ стерпе́л еси́ я́ко па́стырь сый,/ бе́дствующей па́стве пренебрега́тися.

Богоро́дичен: Ужасо́шася А́нгельстии чи́ни, зря́ще Неви́димаго,/ из Де́вы ро́ждшася пло́тию/ и невеще́ственно сла́вимаго в реце́ крести́тися приходя́ща.

Конда́к, глас 1.

Подо́бен: Лик А́нгельский:

О́ком душе́вным бо́дрствуя, святи́телю,/ бодр па́стырь яви́лся еси́ ми́ру,/ и жезло́м му́дрости твоея́, и те́плым предста́тельством твои́м,/ вся отгна́л еси́ злосла́вныя я́ко во́лки,/ невре́дно соблю́д ста́до,/ Григо́рие всему́дре.

И́кос:

Ле́ностию окая́нный отпадо́х, и к сме́рти усну́х,/ но я́ко па́стырь бо́дрейший воздви́гни мя, о́тче, и стра́сти моя́ успи́, зле му́чащия мя,/ я́ко да воста́в, чи́сте воспою́ твое́ светоно́сное преставле́ние,/ е́же Влады́ка вселе́нныя просла́ви досто́йно,/ я́ко раба́ ве́рнейшаго, я́ко учи́теля всему́драго,/ я́ко дру́га и таи́нника, и я́ко строи́теля Свои́х преда́ний,/ и́хже до́бре сохрани́л еси́ пома́зание нескве́рно, Григо́рие всему́дре.

Ин. Песнь 7

Ирмо́с: Превозноси́мый отце́в Госпо́дь,/ пла́мень угаси́,/ о́троки ороси́, согласно пою́щия:/ Бо́же, бла́гослове́н еси́.

Жела́нием соедини́вся Трисо́лнечнаго Божества́ сия́нию, Григо́рие,/ всем я́ко зерца́ло сия́я, блиста́еши све́та зари́.

Сокро́вище – словеса́ твоя́, оте́чески оста́вил еси́,/ обы́чай души́ очище́ние, и ра́зума исполне́ние, ве́рою песнопою́щим:/ Бо́же, благослове́н еси́.

Пе́рваго Ума́, и вино́вна, Отца́ возвести́л еси́,/ Сло́ва у́бо Роди́теля, ку́пно же Производи́теля Духа, Тро́ицу песнопоя́:/ Бо́же, благослове́н еси́.

Богоро́дичен: Еди́ну у́бо Ипоста́сь во двою́ естеству́, Всенепоро́чная,/ родила́ еси́ воплоще́нна Бо́га, Ему́же вси́ песнопое́м:/ Бо́же, бла́гослове́н еси́.

Ин.

Ирмо́с: Тебе́ у́мную, Богоро́дице, пе́щь/ разсмотря́ем, ве́рнии:/ я́коже бо о́троки спасе́ три Превозноси́мый,/ мир обнови́ во чре́ве Твое́м всеце́л,/ хва́льный отце́в Бог и препросла́влен.

Нело́жное ве́рным соверши́ся обетова́ние проявле́нно:/ Боже́ственный бо Дометиа́н, благода́ти сподо́бися реши́ти неду́ги, и отгоня́ти де́моны,/ хва́льнаго провозвеща́я Бо́га препросла́вленнаго.

На земли́ с на́ми быв, и пло́тски пожи́в,/ подаде́ после́довавшим Ему́ и возлю́бльшим Его́, чудоде́йствия благода́ти,/ хва́льный отце́в Бог и препросла́вленный.

Злочести́выя низложи́ е́реси Боже́ственный Дометиа́н, Севи́рова уче́ния/ и непрело́жную ве́ру и Правосла́вную боголе́пно назна́мена,/ хва́льнаго возвеща́я Бо́га и препросла́вленнаго.

Богоро́дичен: Оте́ческаго не отступи́ естества́, Бо́же́ственное Сло́во вопло́щся из Девы:/ Ту́ю бо изве́стно соблюде́, пребы́вшу нескве́рну в рождестве́,/ и прие́млет е́же от Отца́ свиде́тельство Христо́с,/ препросла́вленный во ве́ки.

Ин. Песнь 8

Ирмо́с: Тебе́ Вседе́телю,/ в пещи́ о́троцы всеми́рный лик спле́тше, поя́ху:/ дела́ вся́кая, Го́спода по́йте/ и превозноси́те во вся ве́ки.

Всю́ зарю́ Уте́шителеву, блаже́нне, прия́л еси́ наше́дшую, зовя́, преподо́бне:/ вся дела́, Го́спода по́йте, и превозноси́те во вся ве́ки.

Истека́ют нам, по Боже́ственному сло́ву Христо́ву, из чре́ва твоего́ ре́ки ра́зума:/ вои́стинну бо исто́чника непреста́нна благода́ть показа́ миру тя, о́тче, во ве́ки.

О чу́дныя бра́тския дво́ицы,/ пло́тию же сро́дныя, и Боже́ственныя мудрова́нием!/ Сию́ чту́ще, Васи́лиа досто́йно вку́пе с Григо́рием почти́м во ве́ки.

Свет мы́сленный в тя всели́вся, о́тче, свещу́ тя негаси́му ми́рови поста́вил есть,/ Еди́наго Све́та пою́ща Трисо́лнечна и Боже́ственна,/ Его́же превозно́сим во вся ве́ки.

Богоро́дичен: Тебе́ па́че ума́ Богому́жным сло́вом ро́ждшую Го́спода и де́вствующую,/ вся дела́ досто́йно благослови́м, и превозно́сим во вся ве́ки.

Ин

Ирмо́с: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.

Превше́л еси́ весь зако́н естества́ челове́ча,/ Бо́гу же прилепи́лся еси́, Богоглаго́ливе, жела́ний Кра́йнейшему, поя́ Ему́:/ благослови́те, вся дела́, Го́спода, и превозноси́те во вся ве́ки.

Услы́шав Боже́ственныя за́поведи, расточи́л еси́ оби́льно бога́тство тре́бующим,/ благопокоре́ния по́мыслом, вопия́, досточу́дне:/ благослови́те, вся дела́, Го́спода, и превозноси́те во вся ве́ки.

Исцеле́ний, Дометиа́не, неоску́ден бы́л еси́,/ источа́я пи́во, исто́чник, и пото́к сла́дости, и река́ ми́ра вопию́щим:/ вся дела́, Го́спода по́йте, и превозноси́те во вся ве́ки.

Богоро́дичен: В пещи́ Тя обра́зно прописа́ша о́троцы, Дево,/ и в купине́ прообрази́ Моисе́й,/ и Дави́д зря́ Тя ро́ждшую Младе́нца безму́жно, Го́спода сла́вы,/ Его́же превозно́сим во вся ве́ки.

Ин. Песнь 9

Ирмо́с: Иса́ие лику́й,/ Де́ва име́ во чре́ве, и роди́ Сы́на Емману́ила,/ Бо́га же и Челове́ка, Восто́к И́мя Ему́./ Его́же велича́юще, Де́ву ублажа́ем.

Исправле́ний же и слове́с твои́х блиста́ния, Григо́рие,/ восхвали́ти ум не моги́й я́ве наш,/ испове́дует побежде́ние благопохва́льно,/ твое́ же возвеща́ет па́че си́лы похвале́ние.

Таи́нниче Небе́сных изря́днейше,/ Тро́ице ны́не предстоя́ со а́нгельским ли́ком, и проро́ческим,/ му́чеников же и пра́ведных, и патриа́рхов,/ помяни́ нас, воспева́ющих твою́ па́мять, Григо́рие.

Назира́еши свы́ше защища́я ны́не,/ святи́телю, Це́ркви Христо́вы,/ побе́ды да́руя ве́рным лю́дем и рабо́тное сокруши́ и́го,/ твоя спаса́я певцы́ моли́твами твои́ми, Григо́рие.

Богоро́дичен: Я́ко ро́ждши, Всечи́стая, тва́ри Соде́теля,/ по всему́ Рожде́ннаго но́сиши нача́ло, несосу́дное иму́щи вели́чие и преесте́ственное./ Те́мже Рожде́ству́ Твоему́ покланя́ющеся, Тя сла́вим.

Ин

Ирмо́с: О́браз чи́стаго Рождества́ Твоего́/ огнепали́мая купина́ показа́ неопа́льная./ И ны́не на нас напа́стей свире́пеющую угаси́ти, мо́лимся, пе́щь,/ да Тя, Богоро́дице, непреста́нно велича́ем.

Уста́вил еси́, о́тче, жела́ния любле́ний, удержа́в соверше́ннейшее,/ и прия́ша тя патриа́рхов селе́ния, и пра́ведных и преподо́бных чини,/ с ни́миже мо́лиши о нас Вседержи́теля.

Имя́ше я́коже име́ние че́стно твое́ оте́чество, те́ло твое́ многострада́льное,/ скры́вшее свои́ми не́драми, сла́вне, ма́терскими устреми́вшееся движе́ньми:/ тобо́ю бо наслажда́тися чу́ждим не терпя́ше.

Гряди́ по́мощь бы́ти мне в напа́стех жития́ и обстоя́ниих,/ и утиши́ воздвиза́ющуюся бу́рю на мя страсте́й,/ и в ти́хо приведи́ приста́нище, ве́тром, о́тче, моли́твы твоея́.

Богоро́дичен: Стоя́ше да́же до Тебе́ смерть,/ е́же по нам бы́ти, за е́же спасти́ ны,/ Пресу́щне Сы́не Бо́жий, благоволи́вшаго из безму́жныя Ма́тере,/ и вода́ми ны́ очи́стити, и огне́м Боже́ственным Кре́ще́ния.

Свети́лен.

Подо́бен: Посети́л ны́:

Па́стыря до́браго Григо́риа всему́драго, Ниссе́ев председа́теля,/ Васи́лиа прему́драго единонра́внаго бра́та по пло́ти,/ пра́зднственными пе́сньми просла́вим, вси.

Сла́ва, и ны́не, пра́здника:

Яви́ся Спас, Благода́ть и И́стина во струя́х Иорда́нских,/ и су́щия во тме и се́ни спя́щия просвети́л есть,/ и́бо прии́де и яви́ся Свет Непристу́пный.

На стихо́вне стихи́ры, глас 2.

Подо́бен: До́ме Евфра́фов:

Ны́не стра́нно Спас/ челове́ком да́рует очище́ние,/ кроме́ изваря́я огня́,/ и назида́я ду́ши,/ без сокруше́ния.

Стих: Мо́ре ви́де и побеже́,/ Иорда́н возврати́ся вспять.

Во́ду Боже́ственныя жи́зни,/ от исто́чников спаси́тельных,/ лю́дие, с весе́лием/ почерпи́те усе́рдно,/ душ на избавле́ние.

Стих: Что ти есть, мо́ре, я́ко побе́гло еси́?/ И тебе́, Иорда́не, я́ко возврати́лся еси́ вспять?

Прии́де Просвеще́ние,/ Благода́ть яви́ся,/ Избавле́ние наста́,/ мир просвети́ся,/ лю́дие, ра́дости испо́лнитеся.

Сла́ва, глас 1:

Пра́выя ве́ры до́блий подви́жниче,/ спострада́вый я́ко до́бр во́ин Христа́ Бо́га,/ и Воево́де угоди́вый:/ подвиза́йся и ны́не по Це́ркви до́брым/ по́двигом, соблюда́я ю твои́ми догма́тами/ на недви́жимем основа́нии, Григо́рие.

И ны́не, глас 8. Иоа́нна мона́ха:

Го́споди, испо́лнити хотя́,/ я́же уста́вил еси́ от ве́ка,/ от всея́ тва́ри служи́тели та́йны Твоея́ прия́л еси́:/ от А́нгел – Гаврии́ла, от челове́к – Де́ву,/ от Небе́с звезду́, и от во́д – Иорда́н,/ в не́мже беззако́ние мирско́е потреби́л еси́,/ Спа́се наш, сла́ва Тебе́.

На литурги́и

Блаже́нна, от кано́на пра́здника песнь 5-я, со ирмосо́м на 4, и свята́го, Песнь 6– я, на 4: Проки́мен: Честна́ пред го́сподем: Стих: Что возда́м Го́сподеви о всех, я́же воздаде́ ми? Апо́стол к Кори́нфяном, зача́ло 151. Аллилу́иа, глас 2: Свяще́нницы Твои́ облеку́тся в пра́вду, и преподо́бнии Твои́ возра́дуются: Ева́нгелие от Матфе́а, зача́ло 34, от полу́. Прича́стен: В па́мять ве́чную бу́дет пра́ведник: